Read Tangkhul Naga 2 WUNGNAOBING 24 Bible Online

2 WUNGNAOBING 24 - Tangkhul Naga bible

2 WUNGNAOBING 24

¹ Awui atamli Babylonwui awunga Nebuchadnezzarna mungda kum kathum Jehoiakimna rao sāsai; chiwui thili ana ngakaishihaowa

²PROHOwui tui awui rao marānbingli hāngmi ngasak kahai chiwui athishurda ungshung khavai Chaldeanaobing, Syrianaobing, Moabnaobing kala Ammonnaobingna khum khum eina Judahli sākhayang khavai PROHOna chihovai.

³Manassehna morei sākahai saikorawui vang PROHOwui mikyanwui eina athumli khuithuihai khavai Judahli hithāda rākashokna,

⁴kala khayon makhalei mili ana ashee tākhangasak chiwui vangla zanga; kaja ana khayon makhalei mibingwui ashee eina Jerusalem pemngasakhaoda chiwui vang PROHOna ali mapheomipai thuwa.

⁵Jehoiakimwui kasā khavā kala kasāsā saikora Judah Awungabingwui Thotrinchān Lairikli makapiserhaimala?

⁶Jehoiakim thikahai eina anaomayara Jehoiachinna awui mahut thuishina.

⁷Egypt awungana awui ngaleiwui eina maraluithuwa; kaja Egypt awungawui ngasa kasā Egyptkong eina thuida Euphrateskong vākashung lam saikora Babylon awungana khuithuiserhaowa.

⁸Jehoiachinna awunga sākaphok tharan awui kum tharāda chishat kāhairasai, kala Jerusalemli kachāng kathum munga. Ava̱va̱wui ming Nehushta hoi, Jerusalemli khalei Elnathanwui naongalāva̱na.

⁹Avāva̱na kasā thāda PROHOwui mangāli ana makhayā otmāng sai.

¹⁰Atam chitharan Babylonwui awunga Nebuchadnezzarwui raobingna Jerusalemli akuinamhaowa.

¹¹Awui raobingna kuinamda leilakha Babylonwui awunga Nebuchadnezzarna keinung chili rai;

¹² Judahwui awunga Jehoiachinna Babylon awungali a kala ava̱va̱, awui raobing, awui wungnaobing kala awui konungwui otva̱bingla hamsangserhaowa. Ana mungda kachishata kum Babylonwui awungana ali phātop sanghaowa,

¹³PROHOwui shimli khalei lanbing, awungawui shimli khalei lan saikora pongthuihaowa; kala PROHOna hangmarānhaikasā chi tākam eina, PROHOwui shimli haikasā sinā eina kasā khorkhong saikora sākazammiserhaowa.

¹⁴Jerusalemwui mi saikora, kachām-khangaibing maningla, wungnao saikora, rai kapingbingla, athum thingtharā tukkhui, kachām-khangaibing maningla, pāngthem kathembing, mari kasābing chi tukthui kahaina.

¹⁵ Ana Babylonli Jehoiachinli tukvāhaowa; awungawui ava̱va̱, awungawui apreiva̱ ngarā, keinungwui akhavābing kala ngalei chiwui kharei mibing saikora Jerusalemwui eina Babylonli khuivāserhaowa;

¹⁶Babylon awungana tukkhaung raikaping saikora thingshini, pāngthem kathem, mari sākatheimāng thingkha, athum saikora raili vāshap kapangpang mimānga.

¹⁷ Kala Babylon awungana Jehoiachinwui avāgato Mattaniahli awunga sangasaklaga awui ming Zedekiah phokmi.

¹⁸ Zedekiahna awunga sākaphok tharan kum maga̱da akha kāhairasai kala Jerusalemli kum tharāda akha munga. Ava̱va̱wui ming Hamutal hoi, Libnahli khalei Jeremiahwui nao ngalāva̱na.

¹⁹Jehoiakimna kasā tākam eina anala PROHOwui mikyanli makaphā ot sai.

²⁰ Kaja athumna PROHOli malungvāt khangasakwui vang, Jerusalem eina Judahli awui eina athumli shimān khangasakna. Zedekiahna Babylonwui awungali thuingarara.