Read Tangkhul Naga 2 WUNGNAOBING 4 Bible Online

2 WUNGNAOBING 4 - Tangkhul Naga bible

2 WUNGNAOBING 4

¹Chitharan marānbingwui naomayara akhawui preiva̱na Elishali vaoda hānga, “Narao igahara thihaowa; narao PROHOli ngacheelaka, kha lupā kachishutana inaomayara khanili awui rao sākhavai khuira jihaowa.”

²Elishana hānga, “Nawui vang ina khi sāmipaira? Nashi shimli khi leimameikhala ili hānglu?” Ana hānga, “Thao hamnaoli sangkahai chi maningla narao iwuili ot khangatei maleiluimana.”

³Chieina ana hānga, “Vāda khongnainaobingwui eina ham khamasai apokhuilu, shapmeikha majialu.

⁴Chiwui thili nala nanao khanila, khāmong shungnarhailaga, thao chi heisanglu; kala pemkahaibing chi ngateida haimamānlu.”

⁵Chieina ana unglaga ashi va̱naongarā khāmong shunghaowa, kala ana thao chi heisangmamān anina ava̱va̱li ham chi khuivāmimamāna.

⁶Ham pemser kahai tharan, nao chili “Ili ham khangateila khuirāmiluilu” da poi. Ana, “Khangatei maleiluithura” da hānga. Chieina thao longkatāla ngasāmhaowa.

⁷Ana Varewui mi chili akahāng eina, ana hānga, “Ungulu, thao chi ungyorlaga leiman runhaolu, kala katai china nashi va̱naongarā yorzālu.”

⁸Thangkha Elishana Shunemli vāda chili kashanga preinao akha okthuisāda ali phakazā hoi. Chieina ana chishong vākān kachida phazā khavai chili vāzanga.

⁹Preiva̱ china agaharali hānga, “Ishiwuishong rākānching kajipa hi Varewui kathara mina da ina theikhuihaira.

¹⁰Ishi shimtungli phākhonao ngaveikhuilaga shimnao akha sākhuida chili awui pet, table, chaoki hailaga, a kharā atamli ana chili pikhuikhui jiranu.”

¹¹Thangkha ana rālaga shim chili zangda ngasāmkhui.

¹²Kala awui rao Gehazili hānga, “Shunempava̱li hokhuilu.” Akaho eina ana awui mangāli anganinga.

¹³Kala Gehazili hānga, “Preiva̱ hili hānglu, kaja, yanglu, iniwui vang nana ngalang kachungkha zarmihaira, nawui vang khi sāmi ngasakngaikhala? Awungali kala raimi kathānali nawui vang hāngmikapai khaleila?” da hānglu. Ana ngahānkai, “Iya iwui mibingli ngayurpamda lei.”

¹⁴Chieina ana hānga, “Thakha nawui vang khi sāmirakhala?” Gehazina ngahānkai “Ava mayarnao maleimana, agaharala sārhaira.”

¹⁵Ana, “Ali hokhuilu” da hānga. Ali akaho eina ana khāmongpheili rānganinga.

¹⁶Kala ana hānga, “Zingkuma hitharan, na naomayarnao akha nganaosara.” Ana hānga, “O Varewui mi, narao ili kakapik tui mahāngalu.”

¹⁷Kha preiva̱ chi nao vaihaoda, Elishana kahāng tākam eina atam ungkashung tharan, luira̱dungli mayarnao akha pharākhui.

¹⁸Nao chi kharar tharan, thangkha, avāva̱li ngasoda mā kahāt vai.

¹⁹Ana avāva̱li, “Iya, ikui, ikui!” da hānga. Awui raoli, “Ava̱va̱li khuiungmihaolu” da kasoi.

²⁰Ana vamkhuilaga khuiungkhami tharan ava̱va̱na ngashun pongda vampama, chiwui thili thihaowa.

²¹Chieina apreiva̱ china Varewui mina pikhavai kāli khuikāda petli chipethaiphunglaga khāmong shunghailaga shokhaowa.

²²Kala agaharali ahokhuida hānga, “Rao akha eina ngasoda gadhā akha chihomilu, kaja Varewui mi chili ina thaklāk eina vālaga latungluira.”

²³Ana hānga, “Khiwui vang aja nana ali vārakhala? Aja changwokla maningmana, Sabbathla maningmana.” Ana hānga, “Khikhala mathāmara,”

²⁴Chieina ana gadhā shaksākhuida raopali hānga, “Gadha chi thākta thaolu kala ina mahāngakha shongzā masuitā ngasaklu.”

²⁵Chithāda ana zatta Varewui mi khaleipam Carmel Kaphungli vai. Varewui mi china preiva̱ chili kathei tharan awui rao Gehazili hānga, “Yanglu — Shunempava̱ rārāda lei!

²⁶ngasamvāda angaroklu laga, ‘Na ringphāda leila? Nagaharala ringphāda leila? Nanaomayarala ringphāda leila?’ da angahānlu.” Preiva̱ china ngahānkai, “Khikha mathāmana.”

²⁷Kaphung kākashung tharan Varewui mipāwui phei asingkhui. Chieina Gehazina shimenshok khavai sai. Kha Varewui mi china, “Aningkhānranu; wukkhananglāk eina leidalei kala PROHOna thumhaida ili khikha mahāngmana.”

²⁸Preiva̱ china hānga, “Ishameili ina nao khamilu da pokhuila? Ili makapikalu da mahāngmala?”

²⁹Ana Gehazili hānga, “Shānneira̱ neilu, kala iwui khāmshui singlaga zatulu. Mi samphanglala mangahānalu, mina ngahānlala mangahānkālu. Kala iwui khāmshui hi nao chiwui maitungli parlu.”

³⁰Nao chiwui ava̱va̱na hānga, “PROHOwui ming singda kahāngna, nanala thei, I nali machiholakmara.” Chieina ana ngakarthuida preiva̱wui thi shuruwa.

³¹Gehazina rida vālaga khāmshui chi nao chiwui maitungli parhaiya, kha akhak mashokmana, ringdalei kajiwui machut khavaila matheimana. Chieina ana angarokta hānga, “Nao chi mathuiranga.”

³²Elishana shimli kākhayang tharan nao chi kathi eina awui petli chipethaikasā chi thei.

³³ Chieina ana zanglaga animang khāmong tākhailaga PROHOli seihā sai.

³⁴ Kala ana nao chiwuitungli kāngapumlaga, awui khamor eina naowui khamor, awui mik eina naowui mik, ngasunlaga, naowui pāng khanili awui pāng parkharor eina phasā lumunghaowa.

³⁵Chiwui thili ngakarthuilaga shimlungli akhashida zatung zatvā sai kala nao chiwuitungli kāngapumlui; chieina nao chi shini shida hākthishoka; kala mik rakhaowa.

³⁶Ana Gehazili hokhuilaga hānga, “Shunempava̱li hokhuilu.” Kala ana hokhui. Preiva̱ china khavā tharan ana hānga, “Nanaoli vamkhuilu.”

³⁷Preiva̱ china vāda apheizingli ngakhumshāmzanga; kala nao chi vamkhuiphungda shokhaowa.

³⁸Zāt kasak kashok atam tharan Elishana Gilgalli vālui. Marānbingwui naomayarabingna awui ngalemli pamda leilakha awui raoli, “Ham kahaka chi phumkālaga marānbingwui vang han hangmilu.” da hānga.

³⁹Athumwui ngachaili akhana hanthothāp aphākhui khavai luili vai kala lamwui pha̱shim leisāda ngapheokha aphākhui. Kala khihankhala kaji matheila hanhamli lepsangserhaowa.

⁴⁰Kala athumna shaikhavai yāmsangmi. Han chi shailaga athumna, “O Varewui mi, hiya khamui hanna!” da hānga. Kala mashaipaithuwa.

⁴¹Ana hānga, “Kashakazā chi khuirālu.” Kala ana zāt chi khuilaga ham chili horsangda hānga, “Mibing zākhavai yāmsangmilu.” Chiwui thili khikha mathāluithuwa.

⁴²Baal-shalishahwui mi akhana Varewui mi chili, matheikhare kashakazā, nāpai khamuitang maga̱, mā khanganao borākha khuirāmi. Elishana hānga, “Mibingli shaikhavai chi mihaolu.”

⁴³Kha awui raona hānga, “Mi shākha khalei hili kathāda mimameirakhala?” Ana hānglui, “Athumli shaikhavai mihaolu; kaja PROHOna hithāda hānga, athumna shailaga kataila taira.”

⁴⁴Chieina ana athumli yaowa. Kala PROHOwui tui athishurda athumna shailaga kataila tailui.