Read Tangkhul Naga 2 WUNGNAOBING 5 Bible Online

2 WUNGNAOBING 5 - Tangkhul Naga bible

2 WUNGNAOBING 5

¹Syria awungawui raimi kathāna Naaman kaho chili awui akhavāna lumlaka, khikhalajila awui mangā eina PROHOna Syriabingli rai yuingasaka. Kapanga kala kapinga mi akhana, kha phārrei kazai.

²Atam akhali Syrianaobingna rai sālaga Israelwui ngalānao akha tukungda, ngalāva̱ china Naaman preiva̱li otram ngatha̱misai.

³Ana achonva̱li hānga, “Ishameina Samariali khalei marānli samphangsi kaje chong! Awui phārrei kazat hi ana raimishapra.”

⁴Chieina Naamanna awui akhavāli, “Israelwui ngalāva̱ china hithāda hānga.” da saikora ahānga.

⁵Syriawui awungana hānga, “Arui vaulu, kala Israelwui awungali ina chithi akha kapisangmira.” Chieina ana, lupāsā thing thumra, sinātang thing tharuk kala phanit kachon tharā da khuiphunglaga vai.

⁶Ana Israel awungali kakapi chithi khuikaphung chili hithāda kapihaisai: “Chithi hi nali rākashung tharan, theimilu kaja, iwui rao Naamanli awui phārrei kazat hi raimi khavai nali ina kachihona.”

⁷Chithi chi Israelwui awungana pālaga kachon serkhakta hānga, “I Varela? Thikhangasak kala ringkhangasak ina sāshapa jihaida mi akhawui phārrei kazat hi raimi khavai ili pao hi kachiphunla? Yangla, ili kathāda khararkhuisikhala kajiwui shongfa kaphāna.”

⁸Kha Israelwui awungana kachon serkhāka da kashā tharan, Varewui mi Elishana mi chihovāda awungali ahāng ngasaka, “Nana khisāda kachon serkakhakkhala? Ali iwuili chihorālu, kala Israelli marān akha lei kaji theikhuiranu.”

⁹Chieina Naamanna awui sigui, siguigari tongphungda Elishawui khāmongli anganinga.

¹⁰Elishana paome akhali, “Jordanli shini shida apheohaolu, chithākha naphasāli kazāt makāluimara, tharchaohaora” da ali shokhāng ngasaka.

¹¹Kha Naaman malungvāthaida “Yanglu, ana iwuili shoknganingda, awui PROHO Vareli mingzaida kazatpamli awui pāng khangkāda iwui kazat raimilakra da phaningkasāna.

¹²Damascusli khalei kongbing, Abana eina Pharparwui tara̱na Israelwui tara̱li maphāmeimala? Ina chili pheolaga matharrarmarala?” Hi hānglaga ana ngareikhuida malungvātsir eina thuihaowa.

¹³Kha awui raobingna ali anganaida hānga, “Avā, marān akhana kahaka ot akha sālu da hāngakha, nana chi masāngaimarala? Chithakha, ‘Pheohailaga tharhaolu’ da kahāng tharan chi sāyangakha kayākha phāmeira?”

¹⁴Chieina ana Jordanli tāda, Varewui mi china kahāng thāda ngaphum shini shiya, kala awui kazāt tharchaohaida phasā angangnaowui thāda unghaowa.

¹⁵Chiwui thili ala, ali khangasobingla, Varewui mi chili latungda awui mangāli nganingda hānga, “Israelli maningla okathuili Vare khangatei maleimana da ina theihaira; chieina ara narao iwui khami hi kakhuimilu.”

¹⁶Kha ana hānga, “Ina otram ngatha̱khami PROHOwui ming singda kahāngna, ina khikhala makhuimara.” Khuikhavai panglāk eina hānga, kha ana mamayāthuwa.

¹⁷Chieina Naamanna hānga, “Makhuimara jiakha ina kapona, narao ili gadhā khaniphun ngalei khamilu; kaja, aja eina thuida narao ina PROHOli maningla rikkatā kachigat kala pha̱kaphayā nilala khangatei vareli masāluimara.

¹⁸PROHOna narao ili himāng khayangmiranu kaja: iwui akhavāna Rimmonwui shimli zangda, ipāngtheili zunglaga khokharum tharan, ila Rimmonwui shimli kui mashunkazang tharan otsak chili PROHOna naraoli kapheomiranu.”

¹⁹Ana, “Chingri eina ungulu.” da hānga. Kha Naaman thuida shangshei kahai tharan,

²⁰Varewui mi Elishawui rao Gehazina hānga, “Yanglu, Syriawui Naamanna khuikharā ot iwui akhavāna akhala makhuila chihomihaira. PROHOwui ming singda kahāngna ina kharomvālaga awui eina ngayarda akhuira.”

²¹Chithāda Gehazina Naamanli kharomvai. Mi akha kharomkharā chi Naamanna kathei eina, siguigaritungwui eina tunglaga angarokta hānga, “Khikha leihaola?”

²²Ana ngahānkai, “Khikha maleimana,” iwui akhavāna nali, “Ephraim kaphungramwui eina marānwui naomayara khani iwuili aruicham rāda lei; nali kapona aniwui vang lupāsa thing kathum kala phanit kachon khani mikhavai ahānglu da chiwui vang ili kachihona.”

²³Naamanna hānga, “Lupāsā thingtharuk kakhuimilu.” Kala ali lupāsā thingtharuk khaoli shaksālaga, phanit kachon khani eina ngasoda awui rao khanili chiphuna; kala anina Gehaziwui mangāli phungungmi.

²⁴Kala ana kaphung kākashung eina khuilaga shimli haihaowa, kala anili chizathaowa.

²⁵Awui akhavāwui mangāli zangda zangnganinga kala Elishana hānga, “Gehazi, na kali khavākhala?” Ana hānga, “Narao I kalikha mavāmana.”

²⁶Kha ana hānga, “Mi china siguitungwui eina tunglaga nali rākhangarok atamli I manglā eina nali mangasosāmala? Pheisā kashankachon, olive eina drakhā yāmgui, yao eina sei, raomayarnao eina sha̱nao, khuikapai atamla?

²⁷Chiwui vang eina Naamanwui phārrei chi nali kāra kala nashi shimkhur ara̱-azā thot kachida kazāchingra.” Pham thāda charshi eina phārrei kazāda awui eina shokhaowa.