Read Tangkhul Naga 2 WUNGNAOBING 6 Bible Online

2 WUNGNAOBING 6 - Tangkhul Naga bible

2 WUNGNAOBING 6

¹Marānbingwui naomayarabingna Elishali hānga, “Yanglu, nawui azingli ot sāda khalei apam hi masha̱nāhaira.

²Jordan ngalemli ithumna thing akharip ata̱khuilaga chiwuili pamkhavai shim akha asākhuiga.” Ana, “Vālu.” da hānga.

³Chieina athum akhana hānga, “Naraobingli khangasovāmilu.” Ana, “Ila vara.” da ngahānkai.

⁴Chieina athumli ngasovai. Athumna Jordanli khavā tharan thing ata̱ya.

⁵Mi akhana thing ta̱ kaja, awui ngahā tara̱lungli ngahingzanghaida, “Iyavo, Amei! Miwui masākasingna.” da hānga.

⁶Varewui mi china hānga, “Kali tāzanghaokhala?” Apam chi kachithei eina ana thing akha shātkhuilaga chili horsanga; chieina mari chi ngaphongshokrasai.

⁷Ana, “Chi khuilu.” da hānga. Chieina ana apāng eina zangngarānkhui.

⁸Atam akhali Syriawui awungana Israelli rai khangarar tharan, ana awui raobingli, “Apam hibingli iwui rāmrah sāra” da ngasanda hānga.

⁹Kha Varewui mi china Israelwui awungali pao chishātta hānga, “Ning ngasharlu hishong marāpaimara, kaja Syrianaobing hishong tāra.”

¹⁰Varewui mina kahāng apam chili Israelwui awungana chihovai. Chithāda ana hāngmathinkhamiwui vang akha khanishili lāngda kanmiya.

¹¹Syriawui awunga wukkhananglakhaoda awui raimibingli hokhuida hānga, “Ithum khipāna Israel awungawui mijang zanglikhala kaji nathum mahāngmarala?”

¹²Awui rao akhana hānga, “Khipānakha maningmana, ishāmei; O awunga; kha Israelli khalei Elisha marān chinana, nana petkāli khamatui chi, ana Israelwui awungali hangmimi kajina.”

¹³Ana hānga, “A kali leikhala, ayanglu, ina mi chihovāda atukkhuira.” “Yanglu, a Dothanli lei.” da hānga.

¹⁴Chieina ana siguila, siguigarila, raimi kachungkha chihovāda keinung chi ngayāshong akuinamhaowa.

¹⁵Varewui mi chiwui raona ngathorthakva̱ ngakarthuida ayar kashok tharan, yanglu, siguila, siguigarila, shipaila keinungli kuimareida leisai. Kala rao china, “Iyavo, akhava! kathausikhala?” da hānga.

¹⁶Ana hānga, “Mangacheealu, athumwuile inili ngasomida khaleina chungmeiya.”

¹⁷Chieina Elishana seihā sāda hānga, “O PROHO, ina nali seihā sali, ana theikhavai amik rakmilu.” Chieina PROHOna yarona chiwui amik rakngasakta theihaowa; kala yanglu, Elishali kuimareida sigui kala meiwui siguigari phungrei chi pemda leisai.

¹⁸Kala Syriawui mibingna awuishong rākatā tharan, Elishana PROHOli seihā sāda hānga, “Athumli mik ngapeomihaolu.” Chiwui thili Elishana seihā kasā athishurda athumli mik ngapeomiserhaowa.

¹⁹Elishana athumli hānga, “Shongfa chi hishong maningmana kala keinung chi hi maningmana, iwui thi shurlu kala nathumna kaphā mi chiwui pamkhavaili ina thanvāga.” Chieina ana athumli Samariali thānvai.

²⁰Athumna Samaria vāshungkhaleoda Elishana hānga, “O PROHO, athumna mik theikhavai mibing hiwui mik rakngasakmilu.” Chieina PROHOna athumwui mik rakngasaka, kala athumna theihaowa kala yanglu, athum Samariawui alungli leisai.

²¹Israelwui awungana athumli kathei tharan Elishali hānga, “Avā, ina athumli sāthathaorala? Athumli sāthathaorala?”

²²Ana ngahānkai, “Nana athumli masāthatpaimara. Tukkhui kahai mili kathāda raighai eina kala malā eina sāthatpairakhala? Kashakazā ngaranmilu, chi zālaga athumwui akhavāli unguranu.”

²³Chieina ana zātkhān kahaka akha sālaga athumli phāchizata kala athumna phāshak phaza kahaiwui thili akhavāwuili shiunhaowa. Chiwui thili Syriawui mibingna Israelli rai sākhavai marāluithuwa.

²⁴Khaleilaga Syriawui awunga Ben-hadadna awui raimi kazipkhuilaga Samariali vāda akuinamhaowa.

²⁵Athumna kuinam kahaiwui vang Samariali zāt saklakhaowa, gadhā akhali lupāsā hangchishat kala theirāthei gram shākhanili lupāsā phangā eina yora.

²⁶Chitharan Israelwui awungana phākhoshong makānkhavā eina preinao akhana vaovai, “O awunga, ishāmei! ili khangachonmilu!”

²⁷Ana hānga, “PROHOna nali mangachonmiakha ina nali khi ngachonmirarrakhala? Zātla maleimana, drakhāra̱la maleimana.

²⁸Khi maringkaphā leihaokhala?” Preiva̱ china ngahānkai, “Preiva̱ hina, ‘Nanaomayara hi aja shaihaosa kala akhama inao shainaosa.’ da hānga.

²⁹ Chieina iwui nao hangshaihaira. Akhama kathā ina ali hānga, ‘Ini shaikhavai nawui nao milu’ ji; kha awui naova thumhaowa.”

³⁰Preiva̱wui tui chi kashā eina awungana awui kachon serkhāka—chitharan ana phākho chi makānzatsai kala mibingna yangva kaja aphasāli bora ngavaisai—

³¹kala ana hānga, “Shaphatwui naomayara Elishawui kui aja ayartuitungli leisāra jiakha Varena chili lāngmeida ili sāranu.”

³²Elishana awui shimli pamsai, kala khararnaobingla ali ngasopamsai. Chitharan awungana mi akha chihovai; kha mipā chi marāshungranglakha Elishana khararnaobing chili hānga, “Miyuma hina ikui rangkhavai kathāda mi chihokhala da nathum theila? Yanglu, paome chi kharā tharan khāmong shungnamhaolu. Awui akhavāwui pheikhon awui thili shurkazat maningmala?”

³³Ana athumli hāngmahungda leilakha awungana rāhānga, “Kachotkachāng hi PROHOwui einasera, ina ali khi chihamlui khavai leikhala?”