Read Tangkhul Naga 2 WUNGNAOBING 7 Bible Online

2 WUNGNAOBING 7 - Tangkhul Naga bible

2 WUNGNAOBING 7

¹Kha Elishana hānga, “PROHOwui tui nganālu: PROHOna hithāda hānga, Akhama hitharan, Samariawui ngaveili mā kg. khanili lupā akha eina yorra kala napai kg. tharukli lupāsā akha eina yorra.”

²Awungana pāngli shaikapama raimi kathāna china Varewui mi chili hānga, “PROHONA kazingramwui charfabing shomilala shaprala?” Kha ana hānga, “Nawui mik eina theichaora, kha nana chi kazā masamphangmara.”

³Chitharan phārrei kakazā mi mati ngavei zangkhavaili leisai; kala athum akha eina akha, “Khisāda mathiranglakha eina tangda hili pamrakhala? da hāngngaroka.

⁴Ithumna keinungli zangsa jilala chili zāt kasak lei; kala chili ithum thipapamra; kala ithum hili pamlala thipapamra. Chiwui vanga Syriabingwui rāmrahshong vausa, athumna mizaakha kharing samphangra, sāthatakha thihaira.”

⁵Chieina athumna zingyinlam Syria mibingwui rāmrahli vākhavai zatuwa; kha yanglu, athumna rāmrah vākashung tharan khipākha maleisāthuwa.

⁶Kaja siguigarikhon, sigui kazatkhon, raimi kachungkha kharāwui akhon thāda PROHOna Syriawui raimibingli shāngasaka; chiwui vang athum eina athum, “Yanglu, Israelwui awungana Hit awungabing eina Egyptwui awungabingli rai suilaga ithumli rai tākhavai rārāli” da hāngngaroka.

⁷Chieina athumna kachonshimla, siguila, gadhāla, rāmrahli khalei saikora nothāhailaga mathikhangai eina zingyinlam yāmserhaowa.

⁸Phārrei kakazā athum china rāmrah ngalemli vākazang tharan athumna rāmrah akhali azangda azākhui kala amangkhui; kala lupāsā, sinā kala kashankachonla angaponkhuilaga ungthumhaowa. Chiwui thili latvāluilaga rāmrah khangatei akhali apongkhuilaga chila ungthumluihaowa.

⁹Chiwui thili athum akha eina akha hāngngaroka, “Ithumna kasā hi mamashungthura. Aja hi ringkaphā chānpao samkaphangwui zimikshona; ithumna kasaikha pamda kazing kathang eina tangda ngaraipamakha ithumwuitungli tandi tāhaora; chiwui vang eina ralu ithumna awungashiwui shimkhurli ahānghaosa.”

¹⁰Chieina athumna vāda keinungwui ngavei khamayonabingli ahānga, “Ithumna Syrianaobingwui rāmrahli vai, kala yanglu, chili khikha mathei mashāmana, sigui kala gadhā hokserhaida lei, kala kachonshimbingla changlangkha leidalei.”

¹¹Chieina ngavei khamayonbing china awungawui shimkhurli hokhuida ahānga.

¹²Kala awungana ngayā ngakarthuida awui raobingli hānga, “Syrianaobingna ithumli makaphā ngarān kahai chi ina hāngga. Ithum thaidalei kaji athumna theihaoda rāmrahwui eina ayarli ayāmngathumda, ‘Athumna keinungwui eina shokkhangapon tharan, kharing eina tukkhuida keinungli zangnaora’ da phaning kahaina.”

¹³Chieina awui raimi akhana hānga, “Ishiwuili taikahai sigui phangā khuiphunglaga ayang khavai mi chihoyangsa; ashimānhailala khikha maleimana, hili pamlala saikora thitkha sāphalungra.”

¹⁴Chieina athumna sigui katonga khani khuida, “Ayangkhuilu” da awungana anili Syriawui shipaibingli shurvā ngasaka.

¹⁵Chieina athumna Jordan eina tangda shurvai, kala yanglu, Syrianaobingna katotsisi yāmkazatli makhuiphāmada horkahai kashankachonla khutlaila apam kachida tātunghaisakapa. Kala paomebing china latungda awungali unghānga.

¹⁶Chieina mibingna Syria mibingwui rāmrah angapona. Chiwui vang PROHOwui tui tākam eina mā kg. khanili lupā akha eina kala nāpai kg. tharukli lupā akha eina yora.

¹⁷Awungana pāngli shaikapama raikhoka chili ngavei mayon khavai kasohairasai; kala awungana ali vākhayang tharan Varewui mi china hāngkahai thāda, ngaveili leilakha yaruina ali naithathairasai.

¹⁸Kaja, “Akhama hitharan, Samariawui ngaveili nāpai kg. tharukli lupā akha kala mā khamathā kg. khanili lupā akha eina yorra.” da awungali Varewui mi china kahāng tharan,

¹⁹raithāna china, “PROHO a khalattana kazingramwui charfabing shomilala shaprala?” da Varewui mi chili ngahānkāhairasai. Chieina ana, “Hi nawui mik eina theichaora kha nana chi kazā masamphangmara.” da hānghairasai.

²⁰Hāngkahai tākam eina ngavei pamli mina naikazamda thihaowa.