Read Tangkhul Naga 2 WUNGNAOBING 8 Bible Online

2 WUNGNAOBING 8 - Tangkhul Naga bible

2 WUNGNAOBING 8

¹Chitharan Elishana nao ringung ngasak kahai ava̱va̱ chili hānghaisai, “Thuilu, nashi shimkhurna vākapai apam akhali thuihaolu, kaja apam hili kum shini chāmrei rākhavai PROHOna kasohaira.”

²Chieina Varewui mi china kahāng athishurda preiva̱ china ashi shimkhurli ngasoda Philistinewui ramli kum shini apama.

³Kum shiniwui thili Philistinewui eina latkhaung tharan, preiva̱ china, awui shimlui chi hanmilui khavai awungali vāpoi.

⁴Atam chili awungana Varewui mipāwui rao Gehazili chan ngazekta, “Elishana sākahai kahaka ot saikora ili hānglu.” da ngahānsai.

⁵Elishana kathili ringkhangasakwui tui ana awungali hāngmahungda leilakha, yanglu, anaomayara ringung ngasak kahai preiva̱ china awui shim hanmi khavai awungali pokida rāchamrāsai. Kala Gehazina hānga, “Amei, O awunga, Elishana ringung khangasaka naomayara, kala ava̱va̱ chi hina.”

⁶Awungana khangahān tharan preiva̱ china hāngsera. Chieina awungana otva̱ akhali kasoda hānga, “Preiva̱ hiwui shim kala ngalei saikora, kala ashi thuikahaiwui eina thuilaga arui rāshungda ngalei chiwui eina samkaphang heiun hanmiserhaolu.”

⁷Elishana Damascusli khavā atamli, Syriawui awunga Ben-hadadli kazāsai; kala “Varewui mi chi rāhaira.” da kahāng eina,

⁸awungana Hazaelli hānga, “Mikhavai ot akha khuiphunglaga Varewui mi chili, kakazā hiwui eina ina kharai masamphangrakhala? da Varewui mipā chiwui eina PROHOwui kachithei chi angahānkhuilu.”

⁹Chieina Hazaelna ali asamphang khavai Damascusli samkaphang otyur saikora ut hangmatiphun khuivai. Kala ana vāda awui mangāli anganingda hānga, “Nanaomayara, Syriawui awunga Ben-hadadna, ‘Kakazā hiwui eina I kharai masamphangrakhala?’ da angahān khavai ili nawuili kashirātna.”

¹⁰Elishana ali hānga, “Ungulu kala ali hānglu, ‘Na railakra’; kha a thiphalungra da PROHOna ili chitheimihaira.”

¹¹Kala ana mavaishiranglakha eina tangda ali mik yanggaziya. Kala Varewui mi china chapa.

¹²Hazaelna hānga, “Ishameina khisāda kachapkhala?” Ana ngahānkai, “Khikhalajila nana Israel mibingli makaphā ot sāki kaji chi ina thei: nana athumwui raipan sa̱tāmihaora, yaronnaobing raighai eina yaitupthathaora, angangnaosanlila ngapothatra kala nao khavaibinglila awuk rāmphutmira.”

¹³Chieina Hazaelna hānga, “Narao iya fa kathāna, chiyākha hakkhamahā ot ina kathāda sāshaprakhala?” Elishana ngahānkai, “Na Syriawui awunga sāra da PROHOna ili chitheimihaira.”

¹⁴Chieina ana Elishawui eina thuihaowa, kala akhavāna, “Elishana khi hāngkhala?” da ngahāna. Ana hānga, “Na makahatlakla raira da hānga.”

¹⁵Kha akhama kathā ana fakham khavai kachon akha tara̱li rurkhuilaga, a mathiranglakha eina tangda amaili farormi. Kala Hazaelna awunga sāhaowa.

¹⁶Ahabwui nao, Israelwui awunga Joramna mungda kaphangā kum, Jehoshaphatwui nao, awunga Jehoramna Judahli mungphoka.

¹⁷ Ana mungkaphok atamli a kum thumrāda khani kāshunghairasai kala Jerusalemli ana kum chishat munga.

¹⁸Israelwui awungabingna kasā thāda, kala Ahabwui shimkhurna kasā thāda anala sai; kaja Ahabwui naongalāva̱ chi apreiva̱na. Kala PROHOwui mikyanli makhayā otmāng sai.

¹⁹Chithālala, awui rao Davidwui mangā eina Judah shimānchao khavai masāmana, kaja a eina awui naomayarabingli thaomei akha katang mavaila mira da ngashithaisai.

²⁰Awui thotli Edomna Judahli rai sai, kala athum khalattawui vang awunga akha phāsanghaowa.

²¹Chieina Joramna awui siguigari khuiphungserlaga Zairli vai kala ngayāshong a eina awui siguigari kathānbingli ngasoda, athumli kuinamda leikasā Edomnaobingli angarara; kha awui raimibing shimli yāmungserhaowa.

²²Chiwui vang eina Edomna Judahli aja eina tangda ngararching kajina. Libnahnala atam chichangli rai sai.

²³Joramwui kasā khavā kala ana kasāsā Judah awungabingwui Thotrinchān Lairikli makapiserhaimala?

²⁴ Joram thihaida avāva̱ ngarāli ngasoda Davidwui keinungli chifahaowa; kala anaomayara Ahaziahna awui mahut thuishina.

²⁵Ahabwui nao, Israelwui awunga, Joramna mungda tharāda kakhane kum, Jehoramwui nao Ahaziahna Judahli mungphoka,

²⁶Ahaziahna mungkaphok atamli kum maga̱da khani kāshunghairasai kala Jerusalemli kumkha munga. Ava̱va̱li Athaliah hoi; Israelwui awunga Omriwui ara̱na.

²⁷Ala Ahabwui shimkhurna kazat thāda PROHOwui mikyanli makaphā otmāng sai; Ahabshi ngalā khuihaoda awova̱shi shimkhurna kasā chi tākam eina sāpapama.

²⁸Ana Ahabwui nao Joramli ngasoda Syriawui awunga Hazaelli rai ngarar khavai Ramoth-gileadli vai, kala Joramli khamā za̱haowa.

²⁹Ramahli Syriawui awunga Hazaelli ngararlaga khamā za̱mihaoda khamā ngafa khavai Awunga Joramna Jezreelli latunga. Kala Judahwui awunga Jehoramwui nao Ahaziahna Ahabwui nao Joramli kakazā ayang khavai Jezreelli tai.