Read Tangkhul Naga 2 WUNGNAOBING 9 Bible Online

2 WUNGNAOBING 9 - Tangkhul Naga bible

2 WUNGNAOBING 9

¹ Chiwui thili Elishana marānwui nao akhali hokhuida hānga, “Shānneira̱ neilaga thaokhong hi khuiphungda Ramoth-gileadli vālu.

²Kala nana vākashung eina, Nimshiwui ara̱, kaja Jehoshaphatwui naomayara Jehuli phākhuilu, ngasotnaobingwui eina hokhuilaga shimlungli thānzanglu.

³Kala thaokhong chi khuida akuili heirorda hānglu, ‘PROHOna hithāda hānga, Israelwui awunga sākhavai nali tharchisinkhamina.’ Chiwui thili khāmong sholaga yāmhaolu; mapamnganaoalu.”

⁴Chieina marān yaronnao china Ramoth-gileadli vai.

⁵Vākashung tharan yanglu, rai kathānabing chan ngazeksai; kala ana, “O raimi kathāna, ina nali hāngkhavai akha leili” da hānga. Jehuna, “Kachipālikhala?” da ngahāna. Ana, “O raimi kathāna nalina.” da hānga.

⁶ Chieina ana ngakarthuida shimlungli zanga; kala yaronnao china akuitungli thao heirorda ali hānga, “Israelwui PROHO Varena hithāda hānga, ‘Ina PROHOwui miyur, Israelwui awunga sākhavai tharchisinkhamina.

⁷Nawui akhavā Ahab shimkhurli nana yaitāra, kaja iwui rao marānbingli kala PROHOwui raobingli ashee tākhangasakwui vang Jezebelwuitungli athut hāngsangmira.

⁸Kaja Ahabwui shimkhur tongda mutngasakra; Israelli khalei Ahabwui mayarnaobing, raobingla, khān khaleibingla mataila muthaora.

⁹Kala Ahabwui shimkhur, Nebatwui nao Jeroboamwui shimkhur thāda kala Ahijahwui nao Baashawui shimkhurli kasā thāda sāmira.

¹⁰ Kala Jezreel ngaleili Jezebelli fana shaira kala ali khipānakha machifamara.’” Chiwui thili ana khāmong shoshoklaga yāmhaowa.

¹¹Jehuna awui akhavāwui raimibingwuili kashok eina athumna, “Khikha mathamala? Kapā chi hili khi rākasākhala?” da ngahāna. Ana hānga, “Nathumna ali thei, kala awui tuila shāhaira.”

¹²Athumna, “Matheimana, ithumlila hānglu.” da ngahāna. Ana hānga, “Ana ili hithāda hānga, ‘PROHOna hithāda hānga, Israelli awunga sākhavai ina nali tharchisinkhamina.’”

¹³Chieina athumna katotsisi kachichāwui kachon raikhuilaga chonkhavai tungli hammi kala talla̱ khonglaga, “Jehu awungana” da vaosera.

¹⁴Chithāda sāda Jehoshaphatwui nao, kaja Nimshiwui ara̱ Jehuna Joramli mithit khalen sai. (Chitharan Joramna Israel saikorali thānda Syriawui awunga Hazaelli ngarar khavai Ramoth-gileadli leisai;

¹⁵kha Syriawui awunga Hazaelli khangarar tharan khamā za̱kahaiwui vang awunga Joramna khamā ngafa khavai Jezreelli hanunghairasai). Chieina Jehuna hānga, “Nathumna iwui thāda phaninga jiakha keinung hiwui eina Jezreelli khipākha pao vāhāng khavai mathuiaranu.”

¹⁶Chiwui thili Jehuna awui siguigari tonglaga Jezreelli vai, kaja Joram chili pisai. Judahwui awunga Ahaziahla Joramli samphang khavai chili tāhairasai.

¹⁷Chitharan Jezreelwui raikānshim tungli shantri nganingkasāpa china Jehulong rākharā chi kathei eina, “Ina raimi rārāda khalei thei.” da hānga. Joramna hānga, “Sigui katonga raimi akha angarok ngasaklaga ‘Pao khamathāla?’ da angahānkhui ngasaklu.”

¹⁸Chieina sigui tonglaga mi akhana, “Awungana kahāngna, ‘Pao khamathāla?’” Jehuna, “Chingri kahai pao chi na khisarakhala? Ngareikhuida iwui thi shurlu.” da hānga. Kala shantripa china hānga, “Paome chi athumli asamphanghaira, kha malatungmana.”

¹⁹Chieina ana kakhane sigui katonga mi akha chiholuida, “Awungana, ‘Chingri kahai paola?’ da ngahāna”. Jehuna, “Chingri kahai pao chi na khi savairakhala? Ngareikhuida iwui thili shurlu” da hānga.

²⁰Shantri china hānglui, “Ala athumli asamphanghaira, kha a malatungluimana. Sigui kathao chi Nimshiwui nao Jehuwui kathao thāli; kaja a yāng eina thaozatta lei.”

²¹Joramna, “Khangarān sālu” da hānga. Athumna awui siguigari khangarān sāmi. Chieina Israelwui awunga Joram eina Judahwui awunga Ahaziahna kachichāwui siguigari tongriplaga Jehuli angaroka, kala Jezreelpa Nabothwui luipamli anina Jehuli asamphanga.

²²Joramna Jehuli kathei eina, “Jehu, pao khamathāla?” da hānga. Ana ngahānkai, “Nava̱ Jezebelwui mangāli khayor otsak eina laivākashon hiyākha ngayaoda leilakha khi chingri kahai leirakhala?”

²³Chieina Joramna sigui ngareikhuilaga, “Khayomna, O Ahaziah!” da hānglaga yāmhaowa.

²⁴Jehuna awui malā yāng eina hunlaga kakāp eina Joramwui yartui khani ngachaili kāpsanghaida malāthing chi amalungli zanghaowa, kala awui siguigari lungli yuisanghaowa.

²⁵ Jehuna awui ngachonme Bidkarli hānga, “Ali khuilaga Jezreelwui Nabothshi luili ahorhaolu, kaja avāva̱ Ahabli ngasoda inina uishong yāshong tongzatlakha PROHOna awuitungli marān kahai tui chi phaningunglu:

²⁶‘Aya ina Naboth kala anaomayarawui ashee kathei chiwui vang— da PROHOna hānga—Ina ngalei hiwui apam hili athut khuira.’ Chiwui vang eina ara PROHOwui tui athishurda ali khuilaga ngalei chiwui apam chili ahorhaolu.”

²⁷Judahwui awunga Ahaziahna chi kathei tharan Beth-hagganshong yāmvāhaowa. Kala Jehuna ali kharomvāda “Alila kāplu,” da hānga; chieina Ibleam ngalemli khalei Gurwui shongshan akakā chili athumna kāphaowa. Kala ana Megiddoli yāmvālaga chili athihaowa.

²⁸Awui raobingna siguigari eina Jerusalemli khuiunglaga avāva̱ ngarāli ngasoda Davidwui keinungli chifahaowa.

²⁹Ahabwui nao Joramna mungda kum tharāda akha kākashung eina Ahaziahna Judahli mungphoka.

³⁰Jehuna Jezreelli khavā tharan Jezebelna shāhaoda mikphungli kajal neokhui, kui sekkazaklaga charfawui eina yangshoka.

³¹Jehuna ngaveili akazang tharan sha̱naopava̱na hānga, “Nawui akhavāli shaokathata Zimri, hi chingri kahaila?”

³²Ana charfali yangkāda hānga, “Iwui mijang khipālongkhala? Khipa leili?” Ahonga khani kathum yangshokra sai.

³³“Ali hortāhaolu” da Jehuna hānga. Chieina athumna ali hortāhaowa; kala awui ashee phākholila, siguilila chakrorserhaowa, kala awuitungli kānaikazama.

³⁴Chiwui thili ana alungli zangda phazākhuilaga hānga, “Ara khonshi kahai preiva̱ hili chifahaolu, kaja ala awungawui naongalāva̱na.”

³⁵Kha athumna achifahaokida kashok tharan akuira̱, phei kala pāngmayā maningla aphasā akhala maleisāthuwa.

³⁶ Athumna hanungda ungkahāng tharan ana hānga, “Hi PROHOna awui rao Tishbewui Elijahli hithāda hāngngasakhaisai kaja, ‘Jezreelwui ngaleili fabingna Jezebelwui asā shaira;

³⁷kala Jezebelwui angun chi Jezreelwui ngaleili pai thāhaida hi Jezebelna da khipānakha mahāngrarmara.’”