Read Tangkhul Naga 1 THOTRINCHĀN 12 Bible Online

1 THOTRINCHĀN 12 - Tangkhul Naga bible

1 THOTRINCHĀN 12

¹Davidna Ziklagli leilakha Kishwui naomayara Saulwui vang eina phongshar eina mazatkhaleng atamli, kharā mibing chi hina; athum hi kapingabingwui ngachaili zangda athumna ali raili ngachonmi.

²Athum malā kasing mimānga, kala malāthingla, kachakla, ui-ui yā-yā kāpthei; Benjaminshi shang Saulwui theisāsera.

³Kathāna chi Ahi-ezerna, awui thi Joash, Gibeahli khalei Shemaahwui naomayara tha̱thuiya; kala Azmavethwui naomayara khani Jezi-el eina Pelet; Beracah, Anothotpa Jehu,

⁴Gibeonwui Ishmaiah, a hi kapinga thumrāwui ngachaili akhana kala thumrāwui kathānana; Jeremiah, Jahaziel, Johanan, Gederahpa Jozabad,

⁵Eluzai, Jerimoth, Bealiah, Shemariah, Haruphpa Shephatiah;

⁶Elkanah, Isshiah, Azarel, Jo-ezer, Corah shangwui Jashobe-am;

⁷Gedorli khalei Jerohamwui naomayara Joelah eina Zebadiah.

⁸Davidna lamhāngli khamakang raipanlungli leilakha Gadpashi; chiya rai kapinga, raisak kathema, kazei kala chāngvei kasing khamanāngabingmānga, azakla kazingkha̱ kathā, khayongla ngahong chao kathā:

⁹Kathāna Ezer, kakhane Obadiah, kakathuma Eliab,

¹⁰khamate Mishmannah, kaphangā Jeremiah,

¹¹katharuka Attai, kashine Eliel,

¹²kachishata Johanan, kachiko Elzabad,

¹³kathara Jeremiah, tharāda akhapāna Machbannai athumna Davidwuili vai.

¹⁴Gad shangwui mi hi raimi kathāna mānga, teokhameibingna shāshāwui, hakkhameibingna thingthingwuina.

¹⁵Athumna, kachāng khare atamli, kong phongshilongda leilakha Jordan kankāda tampākli leikasābingli zingsho zingtun kashamvāserhaowa.

¹⁶Benjamin eina Judahwui mi kaikhana Davidwuili vai.

¹⁷Davidna shokngarokta hānga, “Nathumna ili khamashit eina ngachonmi khavai kharaakha iwui ning nathumli horsangchaora; kha iwui khayon maleilala yansaida yangkashibingwui pāngli horsangmi khavai kharaakha ishāvā ngarāwui Varena theiranu, kala ana hāngmachinranu.”

¹⁸Chiwui thili Amasai, thumrāwui kathāna chiwuitungli Manglāna zangmida, ana hānga: “Ithum nawuina, O David; nawui sāchingra, O Jessewui nao! Chingrihairanu, nali khangachonbinglila chingrihairanu! Kaja nawui Varena nali ngachonmi.” Chieina Davidna athumli khuisangda otva̱ sangasaksera.

¹⁹Davidna Philistinenaobingli ngasoda Saulli rai sākhavai khavā atamli Manassehwui mi kaikha rāyāmsanga. (Chithālala Davidna mangachonmana, kaja Philistinewui khamungabingna ngasanlaga, “Ithumli thikhavai, awui akhavā Saulwui mijang asāhaora” jihaowa).

²⁰Ana Ziklagli khavā eina Manassehwui mibingna Davidli rākazangbing: Adnah, Jozabad, Jedia-el, Michael, Jozabad, Elihu, kala Zillethai athum hi Manasseh shangwui raimi thingkhawui khareiyana.

²¹Ngaponzā kazatbingli Davidna khangarar tharan athumna ngachonmi, kaja, athum raikapinga kala raimi kathānabing mānga.

²²Thangkachida Davidli ngachonkhavai kharā mi machatlakmana; kala Varewui raimibing thāda shānla makhuithuwa.

²³PROHOna hāngkahai athishurda Saulwui wungram Davidli mikhavai, Hebronli leilakha awuili rākazang, raisāri kasā raimi akhumbingwui shang-shangwui mashing chi hina.

²⁴Judahwui chāngvei kazei kaphungbing thingtharuk shāchishat.

²⁵Simeonshi raikapingbing, thingshini shākha.

²⁶Leviwui thingmati shātharuk.

²⁷Aaron shimkhurwui wungnao Jehoiadali ngasoda ashi thingkathum shāshini.

²⁸Kapinga yaronnao Zadokli ngasoda avāva̱ shimkhurwui raithanmebing maga̱da khani.

²⁹Benjaminshi, kaja Saulshi theisā, thingkathum, kha chiwui ngachaili athum kachungkhana Saulshi shimkhurli ngavapta leisai.

³⁰Ephraimpāshi shimkhurwui aming kazat, raili kaping-kapanga mi thingmaga̱ shāchishat.

³¹Davidli awunga sangkhavai mingsinlaga hokakhui Manasseh shang ngayarpakwui eina thingtharāda chishat.

³²Atamwui athishurda Israelna sāphalungki kaji theithangkhamei Issacharwui kathānbing shākhanili ngasoda ashi theisā katonga.

³³Raili vākhamasuiya kala kazei chāngvei kaphunga, Davidli ning akha sāda ngachonkhame Zebulunwui mi thinghangphangā;

³⁴Naphtalishi kazei chāngvei kaphunga mi thingthumrāda shinili ngasoda raithān thingkha.

³⁵Raisāri ngavaiser kaje Danwui mi thingmaga̱da chishat shātharuk.

³⁶Raili vākhamasuiya Asherwui mi thinghangmati.

³⁷Jordan makānda khalei Reubenwui, Gadwui, kala Manassehwui ngayarpakwui eina, raisāri peida khalei mi lakh akha thingmaga̱na.

³⁸Rai kasābing athum saikorana raisāri shaksāriplaga Davidli Israel saikorawuitungli awunga sangasakchao khavai athumna Hebronli vai; chi tākam eina Israel khangateibingnala ning akha sāda Davidli awunga sangkhavai sai.

³⁹Athumna Davidli kathumthang ngasopamda phāshak phazā ngaruma, kaja achinā ngarāna athumwui vang khangarān saikora sāmi.

⁴⁰Kala luinganaili khaleibing, Issachar, Zebulun, kala Naphtaliwui eina kashakazā, sam, kashima khamui, drakhātheikao, drakhāra̱, thao, sei, yao, hikathāthā kachungkha, gadhā, ut, sigui, kala seivā eina phungrāmi, kaja Israelnaobingwui ringkaphā atamna.