Read Tangkhul Naga 1 THOTRINCHĀN 13 Bible Online

1 THOTRINCHĀN 13 - Tangkhul Naga bible

1 THOTRINCHĀN 13

¹ Thingthingwui kala shāshāwui raithānbing, kala kathāna kachiva̱li Davidna ngasanyangsera.

²Kala Israel yarui saikorali hānga, “Nathumna hi phāra jiakha, kala PROHO ithumwui Varewui khamayaakha, ithumna Israel apam saikorali khalei ichināngarāli pao milaga, pāngmonbingla, Levibingla, seizat khalei keinungli kapam athum saikorala ngarumda ithumwuili rāseranu.

³Laga Saulwui atamli horhaikasā, Varewui ningkhami oko chi akhuiluisa.”

⁴Yarui kazip saikorana chi phāra jihaoda mayāserhaowa.

⁵ Chiwui vang eina Kiriath-jearimwui eina Varewui oko chi akhui khavai Davidna Egyptwui Shihor eina thuilaga Hamathwui zangkhavai vāshungda khalei Israelnao saikorali kazip khuisera.

⁶ Varewui ningkhami oko PROHOwui ming eina phokkhami cherubimwuitungli chipam kahai oko chi khuiung khavai David kala Israel saikora Baalahli, kaja Judahwui Keriath-jearimli vai.

⁷Kala athumna Varewui ningkhami oko chi Abinadabwui shim eina akhuida seigari kadhar akhawuitungli khuiphunga. Uzzah eina Ahiona[5] gari chi thaozata.

⁸David kala Israel saikora mathānthup eina Varewui mangāli, athumwui yang eina, sipa̱, tingteilā, phung, kortar kala talla̱ khongda laa sai.

⁹Athumna Chidonwui lanpumli ungkashung eina Uzzahna pāng eina ningkhami oko chi yonkhui, kaja seiphei ngaphokta kongluiki jihaowa.

¹⁰Kha Uzzahna ningkhami okoli kasingwui vang PROHOna malungvāthaoda, ali sāthathaowa.

¹¹Uzzahli sāthat kahaiwui vang David malungvāthaowa; kala aja eina tangda apam chili Perez-uzza da hoda lei.

¹²Kala chithang, Davidna Vareli ngacheehaida hānga, “Kathāda ina Varewui ningkhami oko hi shimli khuiungpairakhala?”

¹³Chieina ningkhami oko chi awui shim Davidwui keinungli makhuiungmana, kha Gittpa Obed-edomwui shimli khuizanghaowa.

¹⁴ Varewui ningkhami oko chi Obed-edomwui shimli kachāng kathum haihaisai; kala Obed-edomwui shimkhurlila ashiwui khalalei saikorali Varena somi.