Read Tangkhul Naga 1 THOTRINCHĀN 15 Bible Online

1 THOTRINCHĀN 15 - Tangkhul Naga bible

1 THOTRINCHĀN 15

¹ Davidna awui vang David keinungli shim sākhui; kala Varewui ningkhami oko haikhavai kachonshim akha sākhui.

² Kala Davidna hānga, “Levinaobing maningla Varewui ningkhami oko khipānakha maphungpaimana, kaja PROHOwui ningkhami oko chi phungkhavai kala otram ngatha̱ching khavai PROHOna Levinaobingli kapangkakhuina.”

³Kala PROHOwui ningkhami oko chi ana ngarān kahai apam chili unghai khavai Israel saikora Jerusalemli kazip ngasaksera.

⁴Kala Davidna Aaronwui naomayara eina Levinaobingli kazipkhui:

⁵Kohathshi shimkhurwui wungva̱ Urielna thānda achinābing shākha maga̱,

⁶Merarishiwui wungva̱ Asaiahna thānda shākhani maga̱,

⁷Gershomshiwui wungva̱ Joelna thānda shākha thumrā.

⁸Eli-zaphanshiwui wungva̱ Shemaiahna thānda shākhani;

⁹Hebronshiwui wungva̱ Elielna thānda hangchishat;

¹⁰Uzzielshiwui wungva̱ Amminadabna thānda shākha tharāda khanina.

¹¹Chiwui thili Davidna pāngmonbing Zadok eina Abiathar, kala Levipa Uriel, Asaiah, Joel, Shemaiah, Eliel, kala Amminadabli vāhokhui ngasakta,

¹²athumli hānga, “Nathum hi Levi shangwui avāva̱ ngarā shimkhurwui kathānasera, nathumla, nachinā ngarāla tharmathengserlaga Israelwui PROHO Varewui ningkhami oko akhuida ina ngarān kahai shim chili unghailu.

¹³Kharethang nathumna makaphungwui vang, ithumwui PROHO Varena ithumwuitungli malungkhavāt rāngasakhaowa, kaja tharchisin kahai chili ithumna mangasharthuwa.”

¹⁴Chiwui vang eina Israelwui PROHO Varewui ningkhami oko chi akhui khavai Levinaobing eina pāngmonbingna tharmatheng ngasaka.

¹⁵Kala PROHOwui tui Mosesna kakaso athishurda Levinaobingna Varewui ningkhami oko chi thingphān sanglaga athum yartuili ngava̱ ngasaka.

¹⁶Levinaobingwui chinaongarā laa kasābingna ringkaphāwui laa kajuikhon eina laawui akap-akai tingteilā, lyre kala kortar ngasoda sakhangayibing kapangrālu da Davidna Levinaobingwui khareiabinglila kasoi.

¹⁷Chiwui vang eina Levinaobingna: Joelwui naomayara Heman; awui achinā Berechiahwui naomayara Asaph; Merariwui naomayarabing kala achināngarā, Kushaiahwui naomayara Ethan athum hili phāsanga;

¹⁸athumli ngasoda kakhane athi kazangbing: Zechariah, Ja-aziel, Shemiramoth, Jehiel, Unni, Eliab, Benaiah, Ma-aseiah, Mattithiah, Eliphelehu, kala Mikneiah; kala, ngavei khamayona Obed-edom eina Je-ielna.

¹⁹Laa kasābing, Heman, Asaph kala Ethan athumna pithrai kortar singa;

²⁰Zechariah, Azi-el, Shemiramoth, Jehiel, Unni, Eliab, Ma-aseiah, kala Benaiah athumna tingteilā huida Alamothwui laakhano athishurda sai;

²¹kha Mattithiah, Eliphelehu, Mikneiah, Obed-edom, Je-iel, kala Azaziah athumna thānda lyre singlaga Sheminithwui laakhano eina sai.

²²Leviwui laa kathān Chenaniahna laa chi thānra, kaja chi ana sathei.

²³Berechiah eina Elkanahna ningkhami oko chi khamayona sāra.

²⁴Shebaniah, Joshaphat, Nethanel, Amasai, Zechariah, Benaiah, kala Eliezer, pāngmonbing china Varewui ningkhami oko mangā chili talla̱ ̱ khongra. Obed-edom eina Jehiahnala ningkhami oko wui vang khamayona sai.

²⁵Chithāda sāda Davidla, Israelwui ararnaobingla, thingthingwui raimi kathānabingla zangda Obed-edomwui shim eina PROHOwui tuingashitwui oko chi khamathān eina ngasoda akhui.

²⁶PROHOwui tuingashit oko khangava̱ Levinaobingli Varena ngachonkhamiwui vang athumna mukvā shini kala yaovā shini da pha̱phayai.

²⁷Davidna khamayinga phahon katuma sāri khamathā ngavai; ningkhami oko khangava̱ Levinaobingla, laa kasābingla, kala laa thanme Chenaniahla chithāda ngavaisera; kala Davidna ephod ngachai.

²⁸Chithāda sāda Israel saikorana PROHOwui tuingashitwui oko chi vaolaga angajikhon, talla̱ ̱, kortar, kala tingteilā eina lyre ngasoda unga.

²⁹PROHOwui tuingashit oko chi Davidwui keinungli khuikhaung eina, Saulwui naongalāva̱ Michalna charfali yangshoka, kala Awunga Davidna mathānthup eina pheichak kasā chi theida yangkharinglakhaowa.