Read Tangkhul Naga 1 THOTRINCHĀN 17 Bible Online

1 THOTRINCHĀN 17 - Tangkhul Naga bible

1 THOTRINCHĀN 17

¹Davidna awui shimli pamlakha marān Nathanli hānga, “Yanglu, ina cedarthing eina kasā shimli pamda lei; kha PROHOwui tuingashit okova kachonshimli haili.”

²Chieina Nathanna, “Nawui kaphaning athishurda sālu kaja Varena nali ngasomida lei.” da Davidli hānga.

³Kha chithang ngayā PROHOwui tui china Nathanli rāhānga,

⁴“Vāda iwui rao Davidli ahānglu, kaja ‘PROHOna kahāngna: Nana iwui pamkhavai shim masāpaimara.

⁵Kaja Israelli thānkashok eina thuida aja eina tangda ina shimli mapamlakrangli; kha kachonshim akhawui eina kachonshim akhali, kasompam akhawui eina akhali zatrāhaira.

⁶Ina Israel saikorali ngasoda apam saikorali kazat hili Israelwui wungva̱-wungvābing, iwui mibingli homluda kaso kahaibingli; “Khiwui vang nathumna ili cedarthingwui shim masāmimakhala” da ngathinghairala?’

⁷“Chiwui vang eina iwui rao Davidli nana hithāda hāngra, ‘Ashangva̱wui PROHOna kahāngna, nana yaobingli shurzatta seihomphungli zatlakha, iwui Israel mibingwui wungnao sāranu da nali ina hokhui;

⁸nawui kazazatpamli ina ngasomi; kala nawui yangkashebingli nawui eina shimān ngasaka; kala okathuili khangamabingwui ming thāda nalila aming kazat akha sāngasakra.

⁹Iwui mibing Israelwui vang apam akha phākhuida athumli chili pamngasakra, athumna chili chipamda masheikhautluimara; kala khare kachāngwui thāda sakashi mibingna athumli masāshimānluimara,

¹⁰iwui Israel mibingli mungkhavai wungva̱-wungvābing phākasangwui eina thuida; ina nawui yangkashibingli shimithaora. Chili lāngda PROHOna nawui shim akha sakāmira da ina kahāng hina.

¹¹Nawui mirin peihaida navā ngarāwuili vauki kaji tharan, nawui naothei reisang ngasakta, nanao akhali awui wungram sākāmira.

¹²Ana iwui vang shim akha sākāmira, kala awui wungram ina sākāmida katang mavaimara.

¹³ A iwui nao sāra, I awui avāva̱ sāra; rida leikasābingwui eina iwui makhangachei leikashi khuithui kahai thāda ina awui eina makhuithuimara,

¹⁴kha katang mavaila iwui shimli kala iwui wungramli leingasakra kala awui wungpamkhong katang mavaimara kaji ungshungra.’”

¹⁵Tuibing hiwui athishurda kala rākachithei hiwui athishurda Nathanna Davidli ahānga.

¹⁶Chieina Awunga Davidna PROHOwui mangāli zangpamda hānga, “O PROHO Vare, I khina da, kala iwui shimkhur hi khina da nana hiyākha phaningkhamikhala?

¹⁷O Varivara, hiya nawui miktāli kateo otsak ngasāsai, hili lāngmeida, naoda rāki kaji naraowui shimkhurla, kala naoda rāki kaji thotbingla chitheimihaira, O PROHO Vare!

¹⁸Naraoli khayā kākhangasakwui vang David ina khi hāngluirakhala? Kaja naraoli nana katheina.

¹⁹Narao iwui vang, O PROHO, kala nawui ningkachāng athishurda hiyākha hakkhamatai ot saikora hi samida kachitheila chitheimihaira.

²⁰Ithumna kashā athishurda, O PROHO nakathā, kala Vare khangatei maleiluimana.

²¹Varewui mi ngasā khavai ana vāngatangda, hakkhamahā khangachee otsak eina nakhalatta naming leingasakta, Egyptwui eina ngatangkhui khavai athumwui mangāli khalei yurbingli kashamshokkhame nawui Israel mibing thāda okathuili yur khangatei kali leilikhala?

²²Israel mibing nawui mi sāching khavai nana sākhuihaira; kala, O PROHO, na athumwui Vare sāhaira.

²³Ara, O PROHO, naraowui pongli kala awui shimkhurwui pongli nana hāngkahai athishurda mashimānda ungkashung ngasāranu;

²⁴kala naming katang mavaila mingmayangmeiranu, kala ‘Israelwui Vare, saikorawui PROHO hi Israelwui Vare papama’ da hāngmihaira, kala narao Davidwui shimkhur mashimānda leichingra.

²⁵Kaja, iwui Vare nana, naraowui shim sākāmira da nana ali rachitheimihaira; chiwui vang narao ina nawui mangāli seihā sākashapna.

²⁶PROHO, nava Varena; kaphā ot hi narao ili ngashitsangmihaira;

²⁷ara chiwui vang eina, narao iwui shimkhurli sokhami china nali ringkaphā ngasā ngasakranu, chithāda nawui mangāli leichingranu; kaja, O PROHO, nana somi kahai chi mashimānda leichingki kajina.”