Read Tangkhul Naga 1 THOTRINCHĀN 19 Bible Online

1 THOTRINCHĀN 19 - Tangkhul Naga bible

1 THOTRINCHĀN 19

¹Khaleilaga Ammonwui awunga Nahash thihaoda anaomayarana awui mahut thuishina.

²Chieina Davidna, “Nahashwui nao Hanunli ina lumtir eina sāra, kaja avāva̱na ili ngavaplak eina leisai.” da hānga. Chiwui vang avāva̱ kathiwui vang kakhanang chithei khavai paomebing chihovai.

³Kha Ammonwui wungnaobingna Hanunli hānga, “Hāngphanep khavai Davidna mi chihokharā hi navāli khayākashina da phaningla? Nawui ngalei ngapaikhui khavai rairui chihokharā maningmala?”

⁴Chiwui vang eina Hanunna Davidwui raobing chi tukkhuilaga kui simiserhaowa, kala kachonla ngahunpat tāmihaida, shaksha̱ eina tangda ngavailaga shiunserhaowa;

⁵Pao chi kashā eina Davidna mi chihovāda angarok ngasaka, kaja, athum khayakshunhaowa. “Nathumwui morhā maphoranglakha eina tangda Jericholi pamsālu, laga ungnaolu.” da awungana hānga.

⁶Ammonnaobingna Davidli yangkharing khavai ot sāhaira da athum khalatta theikahaiwui vang, Mesopotamiawui eina, Aram-maacahwui eina, kala Zobahwui eina, siguigarila kala sigui kasing mila masā khavai, Hanun eina Ammonbingna lupāsā kg. thingthumrāda mati chiphunvai.

⁷Athumna siguigari thingthumrāda khani masākhui kala Maacahwui awungana awui raimi thānlaga Medebali rairum asai. Ammonnaobingna kha̱ kha̱wui eina mi kazipserlaga rai sākhavai vai.

⁸Chi kashā eina Davidna Joabli ngasoda kapingpinga raimibing chihoi.

⁹Ammonnaobingna raisāri shaksāriplaga keinungli zangkhavai ngaveishong ngaher eina vānganinga, kala ngasokharā awungabingna khamashā pamli pama.

¹⁰Mangāshongla, khanukshongla rai rāhaira kaji Joabna kathei tharan, Israelwui eina khamathāthā mi kapangkhuilaga Syrianaobingli ngarar khavai sai;

¹¹awui mi kateibing chi achinā Abishaili horsangmida Ammonnaobingli ngarar khavai sāhaowa.

¹²Kala ana hānga, “Syrianaobingna ili singyuihaiakha nana rāngachonmilu; kala Ammonnaobingna nali singyuihaiakha ina nali rāngachonra.

¹³Mangacheelakalu, ishi yurwui vang kala ithum Varewui keinungwui vang mayara sāda ngararsa; kala PROHOna phara kaji chi eina vairanu.”

¹⁴Chieina Joab kala ali khangaso awui mibingna Syrianaobingli ngarar khavai ngaher eina anganingda awui mangāli athum yāmhaowa.

¹⁵Syrianaobing yāmhaira kaji chi Ammonnaobingna theilaga athumla Joabwui achinā Abishaiwui eina keinungli yāmzanghaowa. Kala Joabna Jerusalemli unga.

¹⁶Syrianaobingli Israelnaobingna yuihaira kaji chi theilaga Euphrates makānda khalei Syrianaobingli ahokhui khavai paomebing chihovai, kala Hadadezerwui raimi kathāna Shophachna thana.

¹⁷Chi Davidli kahāng chitharan, Israel saikorali kazipphungda Jordan makānlaga athumli angarar khavai awui raimi ngarānpinghaowa. Davidna Syrianaobingli ngarar khavai awui raimibing ngaherda angarara.

¹⁸Israelnaobingwui mangāli Syrianaobing yāmhaowa; kala Davidna Syriawui siguigari kathao mi thingshini, phei raimi thinghangmati sāthata; kala raimi kathāna, Shophachlila sāthathaowa.

¹⁹Israelnaobingna yuihaira da Hadadezerwui raimibingna kathei eina athumna Davidli hamsangda awui mi sāhaowa. Chiwui eina thuida Syrianaobingna Ammonnaobingli mangachonluingaithuwa.