Read Tangkhul Naga 1 THOTRINCHĀN 21 Bible Online

1 THOTRINCHĀN 21 - Tangkhul Naga bible

1 THOTRINCHĀN 21

¹Satanna Israelli yangshihaida, mi mashing shānkhavai Davidli rāsui.

²Chieina Davidna Joab kala raimi kathānabingli hānga, “Beer-sheba eina thuida Dan eina tangda mi mashing shānkhuilaga kayākha leikhala kaji ili unghānglu.”

³Kha Joabna hānga, “Arui leida khalei hili PROHOna shākha shida ngarumsangmiranu! Athum hi, iwui amei awunga, ishāmei nawui mi maningsermala? Chithākha ishāmeina khiwui vang theingaihaokhala? Khiwui vang Israelli khayon rāngasakngaikhala?”

⁴Kha Joabwui tuili awungawui tuina yuihaowa. Chieina Joabna Israelwui apam saikorali vālaga Jerusalemli latunga.

⁵Kala mibing shānkakhui mashing chi Joabna Davidli khuiungmi. Israel saikorawui alungli raighai singkathei mi thingnamkha kala lakhkha leisai; kala Judahwui alungli raighai singkathei lakh mati thinghangshini leisai.

⁶Kha chili Levibing eina Benjaminbing mashānsangmana, kaja awungawui tui chi Joabna mamayāngaithuwa.

⁷Kha otsak hili Varena maringphāmada Israelli tandi mi.

⁸Davidna Vareli hānga, “Ina sākahai hili morei haklak eina sāhaira. Kha ara ina nali seihā sali, naraowui khayonkhamāng hi kakhuithuimihaolu; kaja ina mangma̱lak eina sāhaira.”

⁹Chieina Davidwui marān Gadli PROHOna hānga,

¹⁰“Vāda Davidli hānglu, ‘PROHOna kahāngna, ina ot kathum hi khamina hiwui ngachaili akha kapangkhuilu, ina chi nali sāmira.’”

¹¹Chieina Gadna Davidli ahānga, “PROHOna kahāngna, ‘Nana ningkachāng chi khuilu:

¹²Kum kathum chāmrei khuirakā; yangkashiwui raighaina nali yuida kachāng kathum sākashimān khuinika; maningkha PROHOwui raighai eina sākathat, kaja, kathumthangwui vang kazātkashi rāda kazingraowui pāngli Israelnaobing apam kachida thitha̱nikhala?’ Arui machuklaga hānglu, ili kachihopāli khi unghānglu kajikhala.”

¹³Chieina Davidna Gadli hānga, “I wuk-khananglākhaira; I PROHOwui pāngli tāzangtha̱ga, kaja awui lukhamashan hakmahālaka; kha ili miwui pāngli matāzang ngasakmialu.”

¹⁴Chiwui vang Israelwui alungli PROHOna kazātkashi chihorai; kala mi thinghangshini pitā ngasakhaowa.

¹⁵Kala Varena kazingrao chili Jerusalem shimān ngasak khavai chihovai; kha ana shimān ngasakura kaji tharan PROHOna chi theilaga, ana zakkashi saki kajiwui eina ning ngacheihaowa. Kala shimān ngasakkida khalei kazingrao chili, “Shaphaira, napāng khalanhaolu.” da hānga. Atam chili kazingrao chi Jebuspa Ornanwui lanpum ngalemli nganingsai.

¹⁶Davidna yangkakā eina PROHOwui kazingrao china okathui eina kazingram ngachaili nganingkasā thei, kala apāngli raighai singlaga Jerusalemshong katingvai. Chieina David kala kathānabingna bora ngavaida ngakhumshamsanga.

¹⁷Kala Davidna Vareli hānga, “Mi mashing shānkhui khavai kakaso chi ina maningmala? Makaphā-makhayā morei kasaa chi ina. Kha yaonaobing hina khi sāhaokhala? O PROHO iwui Vare, ina seihā sali, napāng iwuitungli kala ishāvāwui shimkhurtungli tāranu; kha kazātkashi hi nawui mibingwuitungli matā ngasakmialu.”

¹⁸Chieina PROHOwui kazingrao china Davidli, Jebuspa Ornanwui lanpumli PROHO wui vang Davidna hanphut akha sakā khavai Gadli kasoi.

¹⁹PROHOwui ming singda Gadwui tui kahāng thāda Davidna vai.

²⁰Chitharan Ornanna kehu zaisai; ana kapeivāda kazingrao chili thei, chieina ali ngasokasā anaomayara mati zangda athum khalatta ngathumhaowa.

²¹Davidna Ornanwuili khavā eina Ornanna Davidli thei, kala awui lanpumwui eina angaroklaga khayāshilak eina akhoruma.

²²Davidna Ornanli hānga, “PROHOwui hanphut sākā khavai nawui lanpum hi ili aman mirān chieina yorsangmilu, chieina kazātkashi chi mibingwui eina hanthuihaora.”

²³Chieina Ornanna Davidli hānga, “Khuimilu; kala ishāmei awungana phāra kaji chi sāmilu; yanglu, rikkatāchigatwui vang iwui mukvā lei, thingwui vang okkaithing lei, kala muisakchigatwui vang kehula lei, ina saikora hi mikahaina.”

²⁴Kha awunga Davidna Ornanli hānga, “Kha ina aman chi peida mira; nawui chi PROHO wui vang ina thāda makhuimara, chili lāngda aman makazanga ot chi rikkatāchigat PROHOli ina machigatmara.”

²⁵Chieina apam chiwui aman sinā onlaga shātharuk Davidna Ornanli mi.

²⁶Kala Davidna apam chiwuitungli hanphut akha sākhuida PROHOli rikkatā kachigat, ningyatchigatla sāda PROHOli ngakaowa, kala ana ngahānkāmida rikkatā kachigatungli kazingramwui eina mei tāmi.

²⁷Chiwui thili PROHOna kazingrao chili kasoda raighai chi ahonli sangluihaowa.

²⁸Jebuspa Ornanwui lanpumli PROHOna ngahānkākhami chi theida Davidna apam chili pha̱kaphayā ot sai.

²⁹Kaja Mosesna lamhāngli leilakha sākakhui PROHOwui tabernacle kala rikkatā kachigatwui hanphut chi atam chitharan Gibeonwui kajui apamli haihaisai;

³⁰kha Davidna Vareli ngasan khavai apam chili mavārarthuwa, kaja PROHOwui kazingraowui raighaili ngacheehaowa.