Read Tangkhul Naga 1 THOTRINCHĀN 26 Bible Online

1 THOTRINCHĀN 26 - Tangkhul Naga bible

1 THOTRINCHĀN 26

¹Ngavei khamayonabingwui ngayarkakhai chiya: Corahshiwuili, Corewui naomayara Meshelemiah, Asaphwui naomayarawui eina.

²Meshelemiahwui naomayarabing: Zechariahna naochizaina, Jedia-elna kakhane, Zebadiahna kakathuma, Jathni-elna khamate,

³Elamna kaphangā, Jehohananna katharuka, Eli-e-ho-enaina kashine.

⁴ Obed-edomwui naomayarabing: Shemaiahna naochizaina, Jehozabadna kakhane, Joahna kakathuma, Sacharna khamate, Nethanelna kaphangā,

⁵Ammielna katharuka, Issacharna kashine, Pe-ullethaina kachishata; kaja Varena ali somi.

⁶Anaomayara Shemaiahlila mayarnao pharāmida athumna avāva̱ ngarā shimkhurbingwui khamunga sāsera, kaja athum kashapa mimānga.

⁷Shemaiahwui naomayarabing: Othni, Repha-el, Obed, kala Elzabad, achināngarā sāshapa mimānga, Elihu eina Semachiah.

⁸Saikora hi Obed-edomwui naomayarabingwui einana, athumwui naobing kala chinaongarā, otram ngatha̱kashapa misera, Obed-edomwui eina mi hangtharukta khanina.

⁹Meshelemiahla naomayara kala chinaongarā kapingpinga tharāda chishat lei.

¹⁰Merariwui naomayara Hosahla naomayara lei: Shimrina wungva̱ sai (naochizai maninglala avāva̱na ali khararra sāngasakhaowa),

¹¹Hilkiahna kakhane, Tebaliahna kakathuma, Zechariahna khamate; Hosahwui naomayarabing kala chinaongarā ashi tharāda kathumna.

¹²Ngavei khamayonbingwui ngayarkakhai chi, athumwui wungva̱bingwui athishurda, achinā ngarāwui thāda PROHOwui shimli otsin nganingripa;

¹³ngaveiwui vang kharei kateo ngaraichada avāva̱ ngarāwui shimkhur eina kalā yanga.

¹⁴Zingsho ngavei Shelemiahshili tāhaowa. Shinglak kahaiya anaomayara Zechariahwui kalā khayang eina atungshong tāhaowa.

¹⁵Azingshong Obededomshiwuili tai, kala anaomayarabingli pongshim singngasaka.

¹⁶Zingtunshongwui ngavei eina atung shangkhavaili khalei Shallecheth ngavei Shuppim eina Hosahli tai. Kala atam ngaraichāchā eina mayon ngaroka.

¹⁷Thangkachida zingshoshong mi tharuk, atungshong mati, azingshong mati kala pongshimli khanirip;

¹⁸kala parbarwui vang zingtunshongwui shongfali mati kala parbarli khani da sai.

¹⁹Athum hi Corah eina Merariwui mibing ngachaili ngavei khamayon otpam khangayarna.

²⁰Levishiwui eina, Ahijahna Khorumshimwui lanshim kala dharkatkhami lan kasinga sai.

²¹Ladanwui naomayarabing Gershonbingwui eina rākhamaronbing Ladan shimkhurwuinada, avāva̱ ngarā shimkhurwui wungva̱bing, Gershonwui eina kharā Ladanwui naomayarabing chi:

²²Jehieliwui naomayarabing, Zetham eina achinā Joelna PROHOwui shimwui lanshim singa.

²³Amramnaobing, Izharnaobing, Hebronnaobing, kala Uzzielnaobing—

²⁴athumwui lankasing pamli, Moseswui nao Gershomwui Shebuelna khareia otva̱ sai.

²⁵Awui achinā ngarā: Eliezerwui eina awui naomayara Rehabiah, awui nao Jeshaiah, awui nao Joram, kala awui nao Zichri, awui nao Shelomoth.

²⁶Shelomoth eina achinā ngarāna, David awunga, kala avāva̱ ngarā shimkhurwui wungva̱bing, thing-thing kala shāshāwui otva̱bing, kala raimi kathānabingna tharchigat kahai lanbing chi singa.

²⁷Rai yuida ngaponkakhuiwui otbing chi PROHOwui shimwui otkasali shichin khavai tharchigata.

²⁸Chili lāngda, marān Samuelna, Kishwui nao Saulna, Nerwui nao Abnerna, Zeruiahwui nao Joabna tharchigat kahai lemmet saikora chi Shelomothli ngasoda achinā ngarāna yangmisera.

²⁹Izharshiwui eina Chenaniahshi vānaongarāli Israelwui vang otva̱ sami khavai kala bichar kasaa sākhavai phāsanga.

³⁰Hebronpashiwui eina Hashabiahshi chinaongarā kashapa mibing thingkha shashinili, Jordan zingtunshongli khalei PROHOwui ot kasāli, awungawui otram khangatha̱li Israelnaobingli yangmi khavai sanga.

³¹Hebronpashi shimkhur saikorawui alungli Jerijahna wungva̱ sai. (Davidna mungda hangkhamate kum phākhayang tharan Gileadwui Jazerli shaplak kahai mi kachungkha leisai).

³²Awunga Davidna ali ngasoda achināngarā thingkhani laga shāshini, kashapa, Reubenpashi, Gadpashi kala Manasseh ngayarpakwuitungli otsak kachiva̱ Varewui otram khangatha̱li awungawui otsakli yangmi khavai khuisanga.