Read Tangkhul Naga 1 THOTRINCHĀN 27 Bible Online

1 THOTRINCHĀN 27 - Tangkhul Naga bible

1 THOTRINCHĀN 27

¹Hi Israel mibingwui shānkakhui avāva̱ ngarā shimkhurwui akhavābing, thing-thing kala shāshāwui kathānabing, kumshirinda, kachāngchāng, ngatak-ngatāda, awungali otram khangatha̱bingwui aming chi hina; meiphung ava̱va̱li mi thingmaga̱da-matiti lei.

²Zabdi-elwui nao Jashobe-amna kachāng khareli khum kharewui kathānana; awui khumkaili mi thingmaga̱da matina.

³A hi Perezwui atheina kala kachāng kharewui raithānabingwui kathānana.

⁴Ahohpa Dodaina kachāng kala khumkai kakhanewui kathānana, awuili mi thingmaga̱da matina.

⁵Kachāng kakathumawui kakathuma kathāna chi pāngmon Jehoiadawui nao Benaiahna, awuili mi thingmaga̱da matina.

⁶Aming kazata thumrāwui ngachaili kathāna Benaiah china; awui nao Ammizabadna awui khumkaiwui yangkhamena.

⁷Joabwui achinā Asahelna kachāng khamatewui kathāna khamatena; awui azingli anaomayara Zebadiah zanga; awuili mi thingmaga̱da matina.

⁸Kachāng kaphangāwui kaphangā kathāna chi Izrahipa Shamhuthna, awuili mi thingmaga̱da matina.

⁹Katharuka kachāngwui katharuka kathāna Tekoipa Ikkeshwui nao Irana, awuili mi thingmaga̱da matina.

¹⁰Kashine kachāngwui, kathāna kashine chi Pelonpa Ephraimwui naomayara Helez; awuili mi thingmaga̱da matina.

¹¹Kachishata kachāngwui kachishata kathāna chi Zerahipa Hushathiwui Sibbecaina, awuili mi thingmaga̱da matina.

¹²Kachiko kachāngwui kachikopachi, Benjaminpa Anathothwui Abi-ezer; awuili mi thingmaga̱da matina.

¹³Katharā kachāngwui katharāpāchi Zerahipa Netophahwui Maharaina; awuili mi thingmaga̱da matina.

¹⁴Tharāda kharewui kachāng tharāda kharewuipachi, Ephraimbingwui eina Pirathonwui Benaiah; awuili mi thingmaga̱da matina.

¹⁵Tharāda kakhane kachāngwui, tharāda kakhanewui kathāna chi Othni-elwui Netophathpa Heldaina; awuili mi thingmaga̱da matina.

¹⁶Israel shangbingwuitungli: Reuben mibingwui vang Zichriwui nao Eliezerna otva̱wui kathāna sai; Simeon mibingwuili Maacahwui nao Shephatiahna otva̱na;

¹⁷Levishiwuili Kemuelwui nao Hashabiah; Aaronshiwuili Zadok;

¹⁸Judahshiwuili Davidwui achinā Elihu; Issacharshiwuili Michaelwui nao Omri;

¹⁹Zebulunshiwuili Obadiahwui nao Ishamaiah; Naphtalishiwuili Azri-elwui nao Jeremoth;

²⁰Ephraimshiwuili Azaziahwui nao Hoshea; Manasseh ngayarpakshiwuili Pedaiahwui nao Joel;

²¹Gileadli khalei Manassehshi ngayarpakwuili Zechariahwui nao Iddo; Benjaminshiwuili Abnerwui nao Ja-asiel;

²²Danshiwuili Jerohamwui nao Azarel. Athum hi Israel shangbingwui kathānabingna.

²³ Davidna kum maga̱wui azingli khaleibing chi mashānmana, kaja PROHOna Israelli kazingramwui sirāyakha ngasā ngasakra da ngashitmihai.

²⁴ Zeruiahwui nao Joabna mishān shanphoka; kha mashānkupmana; chithālala hiwui vang Israelwuitungli malungkhavāt tāhaowa, chieina mashing chi David awungawui thotrinchānli machanthuwa.

²⁵Adi-elwui nao Azmavethna awungawui lanshimbing yanga, kala keinungwuila, ram chiwui kha̱ kha̱wuila kala mayon khavai dolan saikorawui lanshim chi Uzziahwui nao Jonathanna yanga;

²⁶luikhavabingwuitungli Chelubwui nao Ezrina yangmi;

²⁷drakhā yāmgui khavābingli Ramathpa Shime-ina yanga; kala drakhāra̱ haikhavai saikora chili Shiphmipa Zabdina yanga.

²⁸Shephelahli khalei olive eina sycamorerong Gederpa Baal-hananna yanga; kala thao kazip khavai shimli Joashna yanga.

²⁹Sharon seihomphungli khalei sei Sharonpa Shitraina yanga; kala tampākli khalei sha̱kei saikorali Adlaiwui nao Shaphatna yanga.

³⁰Utbingli Ishmaelpa Obilna yanga; kala gadhā alābingli Meronothpa Jehdeiahna yanga. Yao eina me Hagripa Jazizna yanga.

³¹Athum hina Awunga Davidwui lan singmebingna.

³²Davidwui avāgato Jonathanna, lairik kathema mi sāthuihaoda kala theishingkakhuia mi akha sākasāwui vang ana ngakuime sai; Hachmoniwui naomayara Jehiel anina awungawui nao mayarnaobingli tamchithei.

³³Ahithophelna awungawui ngakuime sai, kala Archiwui Hushai hi awungawui ngasotnaona.

³⁴Ahithophelwui thili Benaiahwui nao Jehoiada eina Abiatharna thuishina. Kala Joabna awungawui raimi katongawui kathāna akhavā sai.