Read Tangkhul Naga 1 THOTRINCHĀN 29 Bible Online

1 THOTRINCHĀN 29 - Tangkhul Naga bible

1 THOTRINCHĀN 29

¹ David awungana kazipta khalei saikora chili hānga, “Varena kapangkhui kahaiya iwui nao Solomon hi nganuida lei, kala matheithangmeiranga; kha sāki kaji ot mangā haklaka; kaja konung hi miwui vang maningmara, kha PROHO Varewui vangna.

²Chiwui vang iwui kashap eina tangda ngarānsang kahaina; sinā otwui vang sinā, lupāsā otwui vang lupāsā, pithrai otwui vang pithraisā, mari otwui vang marisā, thing otwui vang thing, chili lāngda onyx eina ngalung aman kasaka kachungkha kala yeksang khavai antimony machu khalei aman kasaka ngalungyur kachungkha kala marbleyur ngarānsanghaida lei.

³Chiwuitungli, kathara shim hiwui vang, khalei chili ngasoda ikhalattawui sinā, lupāsāwui lan ngateida kaziphaili; iwui Varewui shim hili ina mikhangaiwui vang Varewui shim sākhavai ningtongda chigat kahaina;

⁴chiya: Ophirwui sinā matric ton shākha, langkazazak kahai lupāsā matric ton shākhani; hieina phākholi napki kajina,

⁵kala them kathembingna sāki kaji ot saikorawui vang sināwui ot, lupāsāwui ot sāvaira. Chieina aja khipāna PROHOli khalatta tharchigatta mingairereo eina chigatrakhala?”

⁶Chiwui thili avāva̱ ngarāwui shimkhurwui wungva̱bingna lemmet chigata, shang-shangwui kathānabing, thing-thingwui kala shāshāwui kathānabing, kala awungawui otva̱ saikoranala kachichā chigat eina chigat ngaroka.

⁷Varewui shim sākhavai athumna kachigat chi sinā matric ton shākha hangshini, lupāsā matric ton shākathum hangmati, pithrai matric ton shātharuk maga̱, kala marisā matric ton thingkathum shāmati kāshunga.

⁸Aman kasaka ngalung khaleibingnala chigatserda PROHOwui shimwui lanshim chili Gershompa Jehielwui pāngli kaziphai.

⁹Chiwui thili mibingna mingairereo eina PROHOwui vang chigat khangarokwui vang mibingna mathānthup eina ringphangaroka; David awungala mathanlākhaowa.

¹⁰Chiwui vang yarui saikorawui mangāli Davidna PROHOli sochikatta hānga, “O PROHO, ishāvā Israelwui Vare, katang mavaila namāngli sochikatchingranu.

¹¹ O PROHO, reikhamataiya chi nawuina, sāshap vāshapla, tekhamateila, khayuila kala ngamkhamataila nawuina; kaja kazinglila okathuilila khalei saikora nawuisera; wungramla, O PROHO, nawuina, kala saikorawuitungli akui sāda naming reimataimeithuiya.

¹²Kashāngla, khayāla nawui eina shoksera, saikorali nana khamungna. Sāshap vāshap nawui pāngli lei; reikhangasakla pingkhangasakla napangli leisera.

¹³Ara ithumwui Vare, ithumna nali ningshi, kala tekhamatei namingli sochikatli.

¹⁴“Kha I, kala iwui mibingna nawui mangāli khinida hithāda chigatngairereo chigatshaprakhala? Kaja ot saikora nawui eina kashokna, nawui chi ithumna nali milui kajina.

¹⁵Kaja nawui mangāli ishāvāngarā thāda ithumla kha̱ram kazat kathāna; okathuili ithum mirin hiya amahā kathāna, rungshing kahai khipākha maleimana.

¹⁶O PROHO, ithumwui Vare, kathara namingwui vang, kala nawui shim sākhavai ithumwui khalalei kachigat hi nawui eina samkaphangna, kala nawuisera.

¹⁷Nana wuklung tamyangda mashungrik kahaili ningyangkhaung lei kaji ina thei, iwui Vare, ot saikora hi ina ningtongda kachigatna, kala hili khalei nawui mibing saikorana nawui vang mathanthathup eina kachigatna kaji ara ina theihaira.

¹⁸O PROHO, Abrahamwui, Isaacwui, Israelwui kala ishāvā ngarāwui Vare, nawui mibingwui ningli hikathā kaphaning kala kharin hi katang mavaila haimilu, kala athumwui ning nawuili haimichinglu.

¹⁹Ningtongda nawui ningkhami, shiyan-chikan, tuingashit, kakaso saikora mayonshap khavai inaomayara Solomonli khamayāmilu, kala ina ngarān kahai dolan hi ali sākup ngasakmilu.”

²⁰Chiwui thili Davidna saikora kazip chili hānga, “Nathumwui PROHO Vareli solu.” Chieina athumna PROHO Vareli masot chigatta khoruma kala awungalila khayākashi mi.

²¹Kala athumna PROHOli pha̱kaphayā sai, akhama kathā PROHOli rikkatā kachigat sāda mukvā thingkha, yaovā thingkha, kala yaonao thingkha, ra̱shak kachigat zangda Israel saikorawui vang mavātlakla pha̱phayai;

²²kala chithang PROHOwui mangāli athumna mathānthup eina phāshak phazāngaruma. Athumna Davidwui nao Solomonli kakhane sāda awunga sangda thao neomi, kala Zadokli pāngmon sanga.

²³ Chieina avāva̱ Davidwui mahut shinda Solomonna PROHOwui wungpamkhongli awunga sāda mataisangkhangai mataisanga, kala Israel saikorana awui kahāng nganai.

²⁴Kathāna saikora, kapingabingla, kala Awunga Davidwui naomayarabingla Solomonli Awungana da mayāserhaowa.

²⁵Israel saikorawui mikyanli PROHOna Solomonli khayā kāngasaka, kala Israelli awui mangāli awunga sakasābingli masomilakrangkasa ngamkhamatai awuitungli somi.

²⁶Chithāda Jessewui nao Davidna Israel saikorawuitungli munga.

²⁷ Ana Israelli khamung kum hangmatina; ana Hebronli kum shini, kala Jerusalemli thumrāda kathum munga.

²⁸Shānglak kala khayakālak eina okthuida atam shirākha ringda sarlak eina thihaowa; kala awui nao Solomonna awui mahut shina.

²⁹Awunga Davidwui otsak, khare eina thuilaga khanao eina tangda, marān Samuelwui Thotrinchānli, Nathan marānwui Thotrinchānli, kala Gad marānwui Thotrinchānli kapiserhaida lei,

³⁰kala chieina ngasoda ana khamungwui tuila, awui sākashap ot saikora, kala awuitungli, Israelwuitungli, kala wungram kachiva̱wuitungli kashoshok saikora hāngserhaida lei.