Read Tangkhul Naga 1 THOTRINCHĀN 5 Bible Online

1 THOTRINCHĀN 5 - Tangkhul Naga bible

1 THOTRINCHĀN 5

¹ Israelwui naochizai Reubenwui naomayarabing (kaja ana naochizaina jilala avāva̱wui pet sāmakhao kahaiwui vang, awui khararyar Israelwui naomayara Josephwui naobingli mihaoda, ashiwui naopharāt naotun athishurda makapihaimana.

² Judahna malinglaksālala, kala wungpam chi awui eina shoklala khararyar Josephwui ngasāhaowa).

³Israelwui naochizai Reubenwui naomayarabing: Hanok, Pallu, Hezron, kala Carmi.

⁴Joelwui naomayarabing: Shemaiah, awui naomayara Gog, awui naomayara Shime-i,

⁵ awui nao Micah, awui nao Re-aiah, awui nao Baal,

⁶awui nao Be-erah, Assyriawui awunga Tilgath-pilneserna phātopli tukvā kahai china, Reubenshi wungva̱ akhana.

⁷Awui athei shimkhurbing thot-thot eina kashān tharan: wungva̱ Je-iel, eina Zechariahna,

⁸kala Azazwui nao Bela, Shemawui nao, Nebo eina Baal-meon vāshungda Aroerli kasom Joelwui nao athumna.

⁹Ana zingshoshong Euphrateswui lamhāng zangkhavai vāshungdala soma, kaja athumwui sha̱kei Gilead ngaleili kachungkha mataisanghaowa.

¹⁰Saulwui atamli athumna Hagpashili athumna rai sāda yuikahaiwui vang Gileadwui zingsho kuimareida athumwui kachonshimli apama.

¹¹Gadwui naomayarabingna athumwui lākhavāk Bashan ngaleili Salecah tāshungda pama:

¹²Joel ashiwui wungva̱na, Shapham wungphemna, Janai eina Shaphatna Bashanli pāna.

¹³Avāva̱wui shimkhurwui theisābing: Michael, Meshullam, Sheba, Jorai, Jacan, Zia, kala Eber, athum shinina.

¹⁴Hibing hi Huriwui naomayara Abihailwui naobingna: Abihailwui nao Jaroah, awui nao Gilead, awui nao Michael, awui naomayara Jeshishai, awui naomayara Jahdo, awui naomayara Buz;

¹⁵Abdi-elwui nao Ahi, awui nao Gunina avāva̱wui shimkhurwui alungli khareiyana;

¹⁶athumna Gilead eina Bashanli khalei kha̱, Sharonwui seihomphung khaleiram saikorali vākatang eina tangda athumna chili soma.

¹⁷Ashiwui thotchan hi, Judahwui awunga Jothamwui, kala Israel awunga Jeroboamwui atamli kapisangser kahaina.

¹⁸Reubenshi, Gadshi, kala Manasseh shang ngayarpakwui alungli rai khamarāka mi zangsai, kazei chāngvei phungkathei kala malā singkathei, rai vatheiran kathethema thinghangmatida mati shāshini hangtharuk ngalāng ngalāngda ngachon kashapa leisai.

¹⁹Athumna Hagrinao, Jeturnao, kala Nodabnaoli rai atai;

²⁰athumli ngararda khangachon samkaphang tharan, Hagrinao kala athumli khangasobing saikora athumwui pāngli horsangmi; kaja athumna rai ngararmahunglakha Vareli ngakaowa, kala athumwui kapo chi ana mayāmi, khikhalajila ali athumna shitsanga.

²¹Athumwui sha̱kei ngapaikhuida khuiung kahai chiya: Ut thinghangphangā, yao lakh khani thing hangphangā, gadhā thingkhani, kala mi lakh akha kharing eina tukkhui.

²²Varena ngararmihaoda mi kachungkha sāthata. Kala athumna raithā kahai atam eina tangda chili apama.

²³Manassehwui shang ngakaipak ngalei chili pama; athumwui mi kachungkhahaoda, Bashan eina thuilaga Baal-hermon, Senir, kala Harmon Kaphung tāshunga.

²⁴Athum shangwui wungva̱bing chiya: Epher, Ishi, Eliel, Azri-el, Jeremiah, Hodaviah, kala Jahdi-el, athum hiya rai kapingpinga, aming kazata shimkhurwui wungva̱bingna.

²⁵Kha athumna avāva̱ ngarāwui Vareli ngakaishida, athumwui mangāli Varena shimān ngasak kahai apam chiwui kameoli kaphaning mibingwui thāda khayorva̱wui otsakli zathaowa.

²⁶ Chiwui vang eina Varena Assyriawui awunga Pulli kaja Tilgath-pilneserli ningli kasatsangda, ana tukthuihaowa, tukthui kahaibing: Reubennao, Gadnao, kala Manasseh shang ngakaipakta tukphunglaga, Halah, Habor, Hara, kala Gozan kongli chipamda arui eina tangda lei.