Read Tangkhul Naga 2 THOTRINCHĀN 10 Bible Online

2 THOTRINCHĀN 10 - Tangkhul Naga bible

2 THOTRINCHĀN 10

¹ Rehoboamna Shechemli vai, kaja Israel saikorana ali awunga sāngasak khavai Shechemli vāserhaowa.

²Nebatwui naomayara Jeroboamna pao chi kashā tharan (kaja atam chili Egyptli leisai, kaja Awunga Solomonwui eina chili ayāmngayin kahaina), Egyptwui eina latunga.

³Athumna mi chihoda alila ahokhui; Jeroboam kala Israelnao saikorana Rehoboamli ahānga,

⁴“Navāna ithumli kharita kashai chiphuna. Ara chiwui vang navāwui kharita otphun kala kashai chi ngaveng ngasakakha ithum nali otram ngatha̱mipapamra.” da athumna hānga.

⁵Ana hānga, “Kathumthangwui thili rāluinaolu.” Chieina mibing chi thuihaowa.

⁶Chiwui thili awunga Rehoboamna avāva̱ Solomon ringlakha leikasā khararnaobingli ngasanda, “Mibing hili ngahānkā khavai nathumna ili kathāda hangchitheirakhala?” da ngahāna.

⁷Athumna hānga, “Nana aja athumli lumashanda ningyāng ungngasakakha, kala leikashitui eina hāngakha athumna nawui rao sāchingra.”

⁸Kha khararnaobingwui tui horhaida ali rarkākharuma awui ngasotnaobing kala awui khamashitabingli ngasana.

⁹“Kala ana athumli hithāda hānga,” “Ithumwuitungli navāwui kharita kashai chiphun kahai chi ngaveng ngasakmilu da ili rakahāngbing chili ithumna ngahānkā khavai nathumna ili khi hānglu jikhala?”

¹⁰Ali rarkākharum awui ngasotnaobing china hānga, “Nali kahāng ‘Navāna ithumli kharita kashai chiphuna, kha ara nana ithumli ngaveng ngasakmilu’ da kahāngbing chili hithāda hānglu, ‘Ishāvāwui kashānli iwui ngāngpairi reimei.

¹¹Ishāvāna nathumli kharita kashai kachiphun chili, ara ina ritmeida chiphunra. Ishāvāna lijei eina hāngkhamachin chili ina seithat eina hāngmachinra’ da hānglu.”

¹²Chieina “Kakathumathang iwuili raluishitlu” da awungana kahāng athishurda Jeroboam kala mi saikorana kakathumathang Rehoboamwuili vai.

¹³Kala khararnaobingna kahāng chi makhuila awungana athumli tui khālāk eina,

¹⁴“Ishāvāna nathumli kharit kashai chiphuna, kha ina chili ritmei ngasakra; ishāvāna nathumli leijei eina hāngmachina, kha ina nathumli seithat eina hāngmachinra” da naoshinaobingna kahāng athishurda hānga.

¹⁵Chithāda awungana mibingwui kahāng makhuisangmithuwa; kaja Nebatwui nao Jeroboamwui pongli PROHOwui tui Shilonpa Ahijahna hāngkahai chi ungshung khavaina.

¹⁶Athumwui kapo chi makhuisangkhami theilaga Israel saikorana awungali ngahānkai, “Davidshili ithumwui yar khi leikhala? Jessewui naomayarawui eina ithumna shimlui samphangkharān maleimana. Nathum kachichāshi shimli ungulu, O Israel! Nashi shimkhur aningkhānranu, David.” Chieina Israel saikora athum shimli ungserhaowa.

¹⁷Kha Judahwui keinungli kapam Israelnaobingle Rehoboamna munga.

¹⁸Thoukainaoli kashina Hadoramli Awunga Rehoboamna chiho khavā eina ali Israelwui mibingna lunggui eina horthathaowa. Kala Awunga Rehoboamna ngalāngda siguigari tonglaga Jerusalemli yāmung haowa.

¹⁹Chiwui vang eina aja eina tangda Davidwui shimkhurli Israelna ngakaikashina.