Read Tangkhul Naga 2 THOTRINCHĀN 12 Bible Online

2 THOTRINCHĀN 12 - Tangkhul Naga bible

2 THOTRINCHĀN 12

¹Rehoboamwui wungram semkāda ngaziplak kahai tharan PROHOli malaihaowa, kala Israel saikorala ali ngasoda malaihaowa.

²Athumna ningtongda PROHOli mashitkasangwui vang, Awunga Rehoboamwui kaphangā kum, Egyptwui awunga Shishakna Jerusalemli rai ngarar khavai,

³siguigari thingkha shākhani, siguiraimi thinghangtharuk eina ngasoda rai. Kala Egyptwui eina ngasokhara mi Libyawui, Sukki-imwui, Ethiopiawui mi shānda makhuila rai.

⁴Ana Judahwui raipan sākahai keinungbing khuimamānda Jerusalem shangshunga.

⁵Chiwui thili marān Shemaiahna Rehoboam kala Judahwui wungnaobing Shishakwui vang eina Jerusalemli kazip kasāli asamphangda hānga, “PROHOna hithāda hānga, ‘Nathumna ili horkahaiwui vang inala nathumli Shishakwui pāngli horsangmi kahaina.’ ”

⁶Awungala kala Israelwui awungabingla athum khalatta ningngacheida hānga, “PROHOva khamashung khangarongana.”

⁷Athum khalatta ning ngacheihaira da PROHOna kathei tharan PROHOwui tui chi Shemaiahli rāhānga, “Athum khalatta ning ngacheihaira; ina athumli masāthatluimara, kha ina athumli huimira, kala iwui malungkhavāt Shishakwui pāng eina Jerusalemli maheitāmara.

⁸Chithālala awui rao sāngasakra, kaja ili otram ngatha̱khami, kala ngaleibingwui wungrambingli otram ngatha̱khami katheikhuivairanu.”

⁹Chiwui vang Egyptwui awunga Shishakna Jerusalemli rāngararda, PROHOwui shimli kahai lan, awungawui lan pongkorthuihaowa. Solomonna sākahai changveila khuithuiserhaoda;

¹⁰chiwui mahut Awunga Rehoboamna pithraiwui chāngvei sākhuilaga awungawui shim khāmong khamayonbingwui otvabingwui pāngli horsangmi.

¹¹Kala awungana PROHOwui shimli khavā kachida shantribing china phungzanga, kala khamayonbingwui shimli khuiungluishita.

¹²Kala ana ningkhangatei tharan Varewui malungkhavāt awui eina khuithuihaoda shimānchao maji ngasakthuwa; chili lāngda Judahwui mirin phalak eina leisai.

¹³Chithāda Awunga Rehoboamna Jerusalem sākāda munga. Ana mungkaphok tharan zingkum hangmatida akha kahairasai, kala Israel shang saikorawui eina PROHOna amingwui vang hākhui kahai keinung Jerusalemli kum tharāda shini munga. Ava̱va̱li Naamah hoi, Ammonlāna.

¹⁴Ana PROHOli ning horsangchao majithuda makaphā makhayā ot sai.

¹⁵Rehoboamwui kasākhavā, khare eina thuilaga akatang eina tangda marān Shemaiahwui kala marān Iddowui Thotchan lairikli makapiserhaimala? Rehoboam eina Jeroboam rai thingarokchingsai.

¹⁶Rehoboam thihaida avāva̱ Davidwui keinungli chifaya; kala anaomayara Abijahna awui mahut thuishina.