Read Tangkhul Naga 2 THOTRINCHĀN 13 Bible Online

2 THOTRINCHĀN 13 - Tangkhul Naga bible

2 THOTRINCHĀN 13

¹Awunga Jeroboamna mungda tharāda kachishat kum Abijahna Judahli mungphoka.

²Ana Jerusalemli kum kathum munga. Ava̱va̱wui ming Micaiah hoi, Gibeahli khalei Uzielwui naongalāva̱na. Chitharan Abijah eina Jeroboam rai ngararsai.

³Abijahna rai khamarāka mi lakh matili ngasoda raipamli vai; kala Jeroboamna ali ngasung khavai, kapingpinga raimi lakh chishatli kapangkhuida ngasung ngasaka.

⁴Chieina Abijahna, Ephraim Kaphungramli khalei Zemaraim kaphungtungli nganingda hānga, “Ili nganālu!” O Jeroboam kala Israel saikora!

⁵“Israelwui PROHO Varena Israelli katang mavaila mungkhavai wungpam hi David kala awui naomayarabingli makaikapai tuingashit sāda khami matheirānmala?

⁶Chithālala Nebatwui nao Jeroboam, Davidwui nao Solomonwui raona ngakarthuida awui akhavāli ngakaishi;

⁷kala Solomonwui naomayara Rehoboam nganuihaoda maphaningkhuikathei kala mangasungkharar atamli khikha masakhavai makhangatun mi kaikhana Rehoboamli kasira.

⁸Nathum mi chungmeihaowa da kala Jeroboamna nathumwui vang varebing sākakhui sināwui seinao khaleiwui vang, Varewui wungram Davidwui naongarāwui pāng eina nganurkhuishapra da phaningla?

⁹Nathumna PROHOwui pāngmonbing, Aaronwui naongarā kala Levibingli kashamhaida nathum khalattawui vang pāngmon ngalei khangateiwui yurbing thāda phākasang maningmala? Kachikathāthāna mukvānao akha maningakha yaovā shini khuirālaga tharchikatakha vare makhaningwui pāngmon sāngasaka.

¹⁰“Kha ithumwui vanga PROHO chi ithumwui Varena kala ithumna mahorhailakmana. Ithumwuiva Aaronwui naomayarabingna pāngmon sāda PROHOli otram ngatha̱mi, kala Levinaobingna pāngmonbingli ngachonmi.

¹¹Ngathor ngazin kachida athumna rikkatā kachigat eina nganamkaphā otyur chigatchingda sinā khamathing eina sākakhui tabletungli maiyankhamui runghaichinga, kala sināwui thaomeishongli shārkhavai thaomei ngazin kachida ngarānmi; kaja ithumwui PROHO Varewui kakaso ithumna mayonchinga, kha nathumna ali malaihaowa.

¹²Yanglu, Varena ithumwui mangāli thānmida lei, kala awui pāngmonbingna nathumli rai sākhavai athumwui talla̱ khongkhavai ngarānhaira. O Israelwui naobing; navā ngarāwui PROHO Vare chili rai masālu; kaja nathum mayuimara.”

¹³Jeroboamna khanukshong kuimareida ngathirai sākhavai chihohaowa; chithāda Judahwui mangāshongla awui raimi kala khanukshongla awui raimina kuiphinhaowa,

¹⁴Judahna yangkhavā tharan mangāshongla khanukshongla yanggashemānghaowa, kala athumna PROHOli ngakaowa, kala pāngmonbingna talla̱ khonghaowa.

¹⁵Chiwui thili Judahwui mibingna raivao vaoshoka. Judahwui mibingna vaokashok tharan Varena Abijah eina Judahwui mangāli Jeroboamli maikashi mihaowa.

¹⁶Israelpashi yāmhaida Varena Judahpashiwui pāngli horsangmi.

¹⁷Abijahna thānda ashina kachungkha shaothata; chithāda sāda chithang Israelwui kapangkakhui raimi lakh phangā thisanghaowa.

¹⁸Chithāda sāda atam chili Judahna yuihaoda Israelli maikashi mihaowa; khikhalajila athumna avāva̱ ngarāwui Vareli chihama.

¹⁹Abijahna Jeroboamli kharomvāda keinung kachungkha, Bethel kala chiwui kha̱bing, Jeshanah kala chiwui kha̱bing, Ephron kala chiwui kha̱bing khuihaowa.

²⁰Abijahwui thotli Jeroboamna mangakarthukluithuwa; kala PROHOna ali kazā ngasakta thihaowa.

²¹Kha Abijah malinglak eina okthuisai. Ana ngalā tharāda mati khui, kala naomayara maga̱da khani naongalāva̱ tharāda tharuk leisai.

²²Abijahwui kasākhavā khangatatei, awui kasāsā kala ana hāngkahai tui marān Iddowui thotchan lairikli kapiserhaida lei.