Read Tangkhul Naga 2 THOTRINCHĀN 14 Bible Online

2 THOTRINCHĀN 14 - Tangkhul Naga bible

2 THOTRINCHĀN 14

¹ Chithāda sāda Abijah thikahai eina avāva̱ ngarāli ngasoda Davidwui keinungli chifahaowa. Kala anaomayara Asana awui mahut thuishina.

²Awui PROHO Varewui miktāli khamashung kala kaphā ot Asana sai.

³Ana yur khangateiwui hanphutbing kala kajujui apambing khuithuimiserhaowa, kala lungshom, Asherimla shaokhaitāmiserhaida,

⁴Judahwui mibingli athumwui avāva̱ ngarāwui PROHO Vare chili phāda awui ain kala ningkhami mayon khavai kasoi.

⁵Judahwui keinungli khalei kajujuipam kala nganamkaphā riktā khavai hanphut saikorala khuithuimiserhaowa. Kala wungram chi awui atamli chingri kahai samphanga.

⁶Ngalei chi chingrihaoda Judah wungramli raipan sākasang keinung kachungkha sakai. Kaja PROHOna chingrihai khangasakwui vang atam chitharan raikhangararla maleimana.

⁷Kala ana Judahli hānga, “Ithumna keinungbing hi sakāluida pan, dolan, ngavei, kala veiruithing eina ngaveitithaosa; kaja ithumwui PROHO Vareli ithumna kaphāwui vang ana chingri ngasakhaida ngalei hi ithumwui sāchingda lei; ithumna ali phāda ana apong kachiva̱li chingri kahai mi.” Chieina athumna sakāda mataikasang samphanga.

⁸Asawui raimi, talla̱ singda kazei kasing, Judahwui eina lakh kathum kala chāngvei kaphunga, malā kahuna Benjaminwui eina lakh khani thinghangchishat leisai; athum hiya kapingpinga raimimānga.

⁹Ethiopiawui Zerahna raimi thingnamkha, kala siguigari shākathum thānlaga rai ngarar khavai Mareshah eina tangda rai.

¹⁰Asanala ali ngasung khavai Mareshahwui Zaphathahli angarānhaowa.

¹¹Kala Asana awui PROHO Vareli ngakaoda hānga, “O PROHO, khangazana eina kapangawui ngachaili ngachonkhame, na kathā khipākha maleimana. Ithumli ngachonmilu, O ithumwui PROHO Vare, kaja ithumna nali chihama, kala naming singda sorkhangasai mibing hili ngararkida zatli. O PROHO, na ithumwui Varena, mina nali mayuiaranu.”

¹²Chiwui vang eina Ethiopianaobingli Asa eina Judahwui mangāli PROHOna maikashi mihaowa, kala Ethiopianaobingna yāmhaowa.

¹³Asa eina awui mibingna Gerar eina tangda kharomvai; kala Ethiopianaobing akha eina tangda machakshokmana; kaja PROHO kala awui raimibingwui mangāli athum sāthatserhaowa. Judahwui mibingna ot kachungkha phungunghaowa.

¹⁴Kala PROHOli khangacheena pemhaoda athumna Gerar ngalemli khalei keinung saikora sākhayāngmiserhaowa. Keinung chili ot kachungkha leisāda sorkhangasai ngaponkhui.

¹⁵Shakei kakeibingwui kachonshim sakhaimida yao, ut kachungkha ngaponkhui. Chiwui thili athumna Jerusalemli latunga.