Read Tangkhul Naga 2 THOTRINCHĀN 15 Bible Online

2 THOTRINCHĀN 15 - Tangkhul Naga bible

2 THOTRINCHĀN 15

¹Odedwui naomayara Azariahli Varewui Manglā zangmida,

²ana Asali angaroklaga hānga, “Ili nganālu, Asa, kala Judah eina Benjaminshila: Nathumna PROHOli ngasolakha eina tangda anala nathumli ngasomira. Nathumna ali phaakha ali samphangra; kha nathumna ali malaihaiakha anala nathumli malaihaora.

³Atam kasāngkhawui vang Israelna khamashunga Vare mavaila leisai, tamchitheimi khavai pāngmonla, ainla maleisāmana;

⁴kha athumna sipkasa tharan Israelwui PROHO Vareli mai ngareiungda kaphā eina athumna samphanga.

⁵Atam chitharan, khaung khavāla chingri kahai maleisāmana, kaja athumwui ngaleili hapkakhano kalākashi pemtinghai.

⁶Yur eina yur, ngalei eina ngalei ngarar ngarokta akha̱ sathuihairasai; kaja Varena kachotkachāng yur kachungkha eina chotngasaka.

⁷Kha nathum pingmeilu! nathumwui otsak mangazan ngasakhailu, kaja nathumwui ot kasāwui sāman samphangra.”

⁸Odedwui naomayara Azriahwui phongkhami tui chi shālaga Asana ninglumturhaowa, kala ana ningkakachaiya meoma̱bing, Judah eina Benjaminli, kala Ephraim kaphung ngaleili ana akhuida keinungli khalaleila hormiserhaowa; kala PROHOwui shim zangkhavaiwui mangāli khalei hanphut chi chiphokhui.

⁹Kala ana Judah eina Benjaminshi saikora, kala athumli ngasokazatbing, kaja Asali Varena ngasomiya da kathei chitharan Israel kachungkha athumwui pam chihohailaga athumwuili rāyāmkasang Ephraimnaobing, Manassehnaobing kala Simeonnaobing saikorali kazipkhuisera.

¹⁰Asana mungda tharāda kaphangā kum, kachāng kakathumali athumna Jerusalemli kazipa.

¹¹Chithang athumna ngapon kakhui mukvā shāshini, kala yao thingshini chieina PROHOli pha̱phayai.

¹²Kala athum avāva̱ ngarāwui PROHO Vare chili yāngla ningla tongda shitkasang eina tuingashit sāngaroka;

¹³kala sha̱naola, mayarnaola, khararnaosan mateila Israelwui PROHO Vareli mashurakha shaothatra da mayāngaroka.

¹⁴Athumna PROHOli panglāk eina vaoda, talla̱, seingajila singda tuingashit khui.

¹⁵Judah saikorana khangashit chiwui vang mathāna; kaja athumna ningtongda ngashita kala PROHOli phāngairereo eina phai, kala athumna ali samphangda PROHOna kuimareida chingrihai ngasaka.

¹⁶ Ava̱va̱ Maacah eina tangda awungva̱ masā ngasakthuwa; kaja ana ningkakachai Asherahwui meoma̱ sākhui. Asana awui meoma̱ sāteklaga sākazamhaida Kidron kongli riktāmihaowa.

¹⁷Kha Israelwui eina kajujui apambing chi mapheimihaithuwa. Chithālala, Asawui mirin peida awui wuklung kathar eina okthui.

¹⁸Sināla lupāsā khorkhong saikora, avāva̱wuila, awuila khangashit sāda lemmet ot ana PROHOwui shimli khuikāsera.

¹⁹Kala awui khamung zingkum thumrāda phangā kākashung eina tangda rai mangararlakmana.