Read Tangkhul Naga 2 THOTRINCHĀN 17 Bible Online

2 THOTRINCHĀN 17 - Tangkhul Naga bible

2 THOTRINCHĀN 17

¹ Anaomayara Jehoshaphatna awui mahut thuishina, kala Israelli ngarar khavai ngaziplak eina thuiphunga.

²Judahwui raipan sākahai keinung kachiva̱li raimi haisera, kala Judahwui apam kachiva̱li raimi pamkhavai sāda raimi haivāsera.

³Rida avāva̱na zatkasa athishurda kazatwui vang Jehoshaphatli PROHOna ngasomi; ana Baalli mashitsangmana,

⁴Israelwui thāda athumwui thi mashurla kha avāva̱wui Vareli phāda awui ningkhami athishurda zata.

⁵Chiwui vang PROHOna awui pāngli awui wungram sakāmi, kala Judah saikorana shai chigatta khayā kālak, shānglak eina okthui.

⁶PROHOli chihanchaoda malung pinglak eina ana kajujuipambing kala Asherim chi Judah ngaleiwui eina khuithuimiserhaowa.

⁷Ana mungda kakathuma kum, awui wungnaobing, Ben-hail, Obadiah, Zechariah, Nethanel, kala Micaiah athumli, Judahwui keinung keinungli tamchithei khavai chihoi;

⁸athumli ngasoda Levinaobing, Shemaiah, Nethaniah, Zebadiah, Asahel, Shemiramoth, Jehonathan, Adonijah, Tobijah kala Tobadonijahli chihovai; chili lāngda Levinaobingli ngasoda pāngmon Elishama eina Jehoramla chihovai.

⁹Athumna PROHOwui ain lairik chi singda Judah ngaleili tamchithei; athumna Judahwui keinung saikorali kuimareida mibingli tamchitheivai.

¹⁰Judahli kuimareida khalei wungram kachida PROHOli khangachee rāshunghaoda Jehoshaphatli athumna rai mangararlengthuwa.

¹¹Philistinenaobing kaikhana Jehoshaphatli otla, lupāsāla shai chigata; kala Arabwui mibingna yaovā thingshini shāshini kala mevā thingshini khuirāmi.

¹²Kala Jehoshaphat mataimeida reisanga. Ana Judah ngaleili raipan kala lan kazipshim kachungkha sāsanga,

¹³kala Jerusalemli awui raimi kala kapingpinga raimi kachungkha lei.

¹⁴Avāva̱ ngarāwui shimkhurwui eina shānkakhui chi hina: Judahwui thingthingwui raithānbing: Adnahna kapingpinga mi lakh-kathumwui raithāna sai,

¹⁵awui thili Jehohananna lakh-khani thinghangchishatwui raithāna sai;

¹⁶awui thi kazanga Zichriwui naomayara Amasiah, PROHOli otram ngatha̱ khavai akhalatta kachigatpa china lakh-khanili thāna;

¹⁷Benjaminwuili kapinga Eliadana chāngvei kaphung malā kasinga lakh-khanili thāna,

¹⁸awui thili Jehozabadna zei-khai kasing lakh akha thinghangchishatli thāna.

¹⁹Awungana Judah ngaleili raipan sākā kahai keinung apamli chipam kahai chili lāngda hibing hina awungawui otram ngatha̱ khavaina.