Read Tangkhul Naga 2 THOTRINCHĀN 18 Bible Online

2 THOTRINCHĀN 18 - Tangkhul Naga bible

2 THOTRINCHĀN 18

¹Chitharan Jehoshaphat kashāngla shānghao, khayāla kalākhaoda Ahabshili ngalā ngakhota.

²Kum kashāng kahaiwui thili ana Ahabli samphang khavai Samariali tai. Ahabna awui vang kala ali khangayurbingwui vang mukvāla yaola kachungkha taithatmi, kala Ramoth-gileadli rai sākhavai sui.

³Judahwui awunga Jehoshaphatli Israelwui awunga Ahabna, “Ramoth-gileadli na ili mangasovarakhala?” da ngahāna. Jehoshaphatna, “Ini khani akhana, iwui mibing nawui mibingpapama, rai khangararli ithumla nali ngasora” da hānga.

⁴Jehoshaphatna Israelwui awungali, “PROHOli ngahānrifalu” da hānga.

⁵Chieina Israelwui awungana marān shāmati hokhuilaga hānga, “Ramoth-gileadli rai vāsāsikā makasā phāmeirakhala?” “Vangararlu, Varena awungawui pāngli horsangmira.” da athumna ngahānkai.

⁶Kha Jehoshaphatna, “Hili lāngda ngasankapai PROHOwui marān khangatei maleiluimala?” da hānga.

⁷Israelwui awungana Jehoshaphatli hānga, “PROHOli ngasanmi khavai marān akha, Micaiah hoda Imlahwui nao akhala lei; kha iva ali yangkharinga, kaja atam kachida ana iwui vang kaphā akhanida mahāngmimana, kha makaphāmang marānmi.” Kha Jehoshaphatna, “Awungana chithāda mahāngmialu” da hānga.

⁸Chieina Israelwui awungana awui otva̱ akhali hokhuida, “Thaklak eina Imlahwui nao Micaiahli ahokhuilu” da kasoi.

⁹Israelwui awunga eina Judahwui awunga Jehoshaphatna aniwui wungnao sāri shaksāda wungpamkhongli pamda; anina Samariawui ngavei zangkhavai ranpumli leilakha marānbingna aniwui mangāli marānsai.

¹⁰Kala Chenaanahwui nao Zedekiahna mariwui seingaji akha sākhuilaga “PROHOna hithāda kahāngna, ‘Syrianaobing mashimān ngasakranglakha eina tangda nathumna hieina ngasoda muivāra’” da hānga.

¹¹Marān saikoranala, chi tākam eina “Ramoth-Gileadli vāda maikhayā ngasalu; kaja PROHOna athumli awungawui pāngli horsangmira.” da marānmisera.

¹²Micaiahli akahopa china ali hānga, “Yanglu, marānbingna khokkha sāda kahāng tui chili awungana mayāngai; nala athumwui thāda awungali ningyang ungkhavai hānglu.”

¹³Kha Micaiahna ngahānkai, “PROHOwui ming singda kahāngna, iwui Varena kahāng chi ina hāngra.”

¹⁴Awungawuili khavā chitharan awungana, “Micaiah, ithumna Ramoth-Gileadli rai kasā phameirakā makasā phāmeirakhala?” da ngahāna. Ana ngahānkai, “Vada maikhayā ngasalu; athumli nawui pāngli horsangmimāngra.”

¹⁵Kha awungana hānga, “Nana PROHOwui ming singda khamashung tui chi hāngkhavai ina kayākhashida pohairakhala?”

¹⁶Ana hānga, “Yaokahoma makhalei thāda Israel saikorali kaphungli chaiyāng kahai chi ina thei, kala PROHOna, ‘Athumwui akhavā maleimana, kachichā shimli chingri eina latunghaoranu’ da hānga.”

¹⁷Israelwui awungana Jehoshaphatli hānga, “Zakkashi maningla khamathā akhanida ana mamarānmimara da ina nali mahāngmala?”

¹⁸Micaiahna hānga, “Chiwui vang eina PROHOwui tui nganālu: PROHOna wungpamkhongli pamda kazingramwui ashangva̱ china awui yāshong uishong khanganing ina thei;

¹⁹kala PROHOna, ‘Ramoth-Gileadli rai sālaga Israelwui awunga Ahab thikhavai khipāna asuinikhala?’ da ngahāna. Akhana akha hāng, khangatei akhana khangatei akha hānga.

²⁰Chiwui thili manglā akhana mangāshong rāda PROHOwui mangāli anganingda hānga, ‘Ina ali asuiga.’ PROHOna ali, ‘Kathāda asuirakhala?’ da ngahāna.

²¹Ana hānga, ‘Ina kakapika manglā akha sāda vālaga marānbingli kakapik tui matui ngasakra.’ Ana hānga, ‘Nana ali vasuida ungshungra vālu, chithāda vāsālu.’

²²Chiwui vang eina ara yanglu, nawui marānbingwui khamorli kakapika manglā PROHOna sangmihaira; kala nawui pongli PROHOna makaphā hānghaira.”

²³Chieina Chenaanahwui naomayara Zedekiahna Micaiahwui ngalemli vālaga amaisorli akapheda hānga, “PROHOwui manglā china kachishongwui eina iwui eina shoklaga nali rāhāngkhala?”

²⁴Micaiahna hānga, “Yanglu, nana alunga kāli zangyāmngathumthang theinaora.”

²⁵Israelwui awungana hānga, “Micaiahli tukkhuilaga keinungwui rammunga Amon eina awungawui naomayara Joashwui pāngli khuivāmihaolu;

²⁶kala hānglu, awungana hithāda hānga, ‘I chingri eina malatungranglakha eina tangda mi hi phātop sanghaisālu, kala kashakazā kateteo mizā mimangmalu.”

²⁷Micaiahna hānga, “Nana chingri eina latungsi kaje ili PROHOna chitheikhami maningmara.” Kala ana, “Nathumla shāserlu” da hānga.

²⁸Israelwui awunga eina Judahwui awunga Jehoshaphatna Ramoth-gileadli vai.

²⁹Kala Israelwui awungana Jehoshaphatli hānga, “Ili mathei khavai sāri ngacheikhuilaga ina raipamli vāra, nava wungsāri shaksāpapamlu.” Kala Israelwui awungana sāri onkhuilaga raipamli vāhaowa.

³⁰Chitharan Syriawui awungana awui siguigari kathānabingli, Israelwui awunga maningla, kharei kateo khipālikha mangararalu da kasohaisai.

³¹Siguigariwui raikhokabing china Jehoshaphatli kathei eina “Israelwui awunga leili” da hānga. Kala athumna ali ngarar khavai ngareiunga; chieina Jehoshaphatna ali ngachonmi khavai ngakaowa; kala PROHOna ali ngachonmi. Varena athumli khuithuimihaowa,

³²kaja siguigariwui kathānabingna Israelwui awunga maningmana da kathei eina ali makharomluila latunghaowa.

³³Kha mi akhana malā eina kāpta Israelwui awungawui chāngvei eina thikom ngachaili thaiphutsangmihaowa. Chieina awui siguigari kasingali “Ili khamā za̱haira, chieina ngareikhuida ili raipamwui eina khuithuihaolu” da hānga.

³⁴Chithang rai khangarar pangshunhaida Israelwui awungana siguigarili shailaga Syriawui raimili ngazin eina tangda ngasungyanga; chiwui thili zimik tunngasha̱da thihaowa.