Read Tangkhul Naga 2 THOTRINCHĀN 20 Bible Online

2 THOTRINCHĀN 20 - Tangkhul Naga bible

2 THOTRINCHĀN 20

¹Hiwui thili Moabnaobing eina Amonnaobingna, kala Meunbing kaikhali ngasoda Jehoshaphatli rai sākhavai rai.

²Mi kaikhana Jehoshaphatli ahānga, “Nali rai sākhavai shamadru makānda, Edomwui eina mi kachungkha rārāli; kala yanglu, athum Hazazon-tamar (chiya, Engedi)li leida lei.”

³Chieina Jehoshaphatna ngacheehaida akhalatta PROHOli seihā sai, kala Judah saikorali kakhum eina pamserlu da kasoi.

⁴PROHOwui eina khangachon samphang khavai Judahna kazipa; Judahwui keinung saikorawui eina PROHOli seihā sākhavai athumna rai.

⁵PROHOwui shimli, yāngkhup kadhar sākahai chili Judah eina Jerusalemwui kazip chili Jehoshaphatna nganingda hānga,

⁶“O PROHO, ishāvā ngarāwui Vare, kazingramli Vare chi na maningmala? Yurbingwui wungram saikoralila nana khamung maningmala? Sāshapla pangshapla nawui pāngli lei, chiwui vang nali khipānakha mangasungrarmana.

⁷ O ithumwui Vare, nawui mi Israelnaobingwui mangāli apam hili leikasābingli nana kashammihaida nawui ngasotnao Abrahamwui ara̱-azāli katang makhavaiwui vang khami maningmala?

⁸Athumna chili pamda namingwui vang kathara shimla hili sakāhaira, kala,

⁹‘Ithumwuitungli kalākashi raakha, rai nilala, kazāt nilala, bichar kasā nilala, chāmrei nilala, namingwui vang sākahai shim hili nawui mangāli nganingda, ithumwui kakhanang kachot nali hāngphatta ngakaoakha nana shāmida huimira da hānghaira.’

¹⁰“Ara yanglu, Israelnaobing Egyptwui eina kashok tharan nana rai masā khangasaka Amonnao, Moabnao, kala Seir Kaphungwui mibingna,

¹¹yanglu, nana mikahai shimlui hi athumna sāman khami thāda ithumli kashamhailaga khuilui khavai rārāli.

¹²O Ithumwui Vare, athumwuitungli mashun bichar masāmimarala? Kaja ithumli ngarar khavai rarāda khalei mi chungnāhaoda ithum khikha masāthukthura. Ithumna khisarakhala da matheithura, kha ithumna nali yangdalei.”

¹³Judahwui mi saikorana athumwui naoshinaobing, naongarā, preiva̱ ngarāli ngasoda PROHOwui mangāli nganingsera.

¹⁴Levipa Asaphwui ara̱, Mattaniahwui naomayara Je-ielwui naomayara, Benaiahwui naomayara, Zechariahwui nao Jahazielna yarui kazipwui alungli nganinglakha PROHOwui manglāna awuitungli rai.

¹⁵Kala ana hānga, “Nganālu, Judah eina Jerusalemwui mi saikora, kala Awunga Jehoshaphat: PROHOna nathumli hithāda hānga, ‘Mi kachungkha kakazip hiwui vang mangacheelu, mangangalu; kaja rai hi nathumwui maningmana kha Varewuina.’

¹⁶Akhama athumli ngarar khavai tālu; yanglu, athumna Zizwui ashan chili rārā, Jeruel lamhāngwui zingshoshong akatang tampākli nathumna athumli samphangra.

¹⁷ Nathumna rai hili ngarar khavai maleimana; nathumwui pam khuida nganingpamlaga nathumwui vang PROHOna yuikhami chi yanglu. O Judah eina Jerusalem! Mangachee kala mangangalu; akhama athumli vāngararlu, kala PROHOna nathumli ngasomira.”

¹⁸Chieina Jehoshaphatna amai ngaleili mashunzanga, kala Judah eina Jerusalemwui mibingla PROHOwui mangāli mashunzangda PROHOli khoruma.

¹⁹Kala Levinaobing, chiya Kohath eina Corahshina thuinganingda Israelwui PROHO Vareli panglāk eina vaoda masot chigata.

²⁰Athumna ngathorthakva̱ ngakarthuida Tekoawui lamhāngli vai; athumna khavā tharan Jehoshaphatna nganingda hānga, “Judah eina Jerusalemwui mibing ili nganālu! Nathumwui PROHO Vareli shitsanglu, ana nathumli nganaomira; awui marānbingli shitsanglu, nathumna ungkashunga ngasāra.”

²¹Mibingli ana hāngchithei kahai thili, kathar sāri ngavaida laasak eina PROHOli masot mikhavai ana mi phāsanglaga athumna raimi mangāli zatmamānda hānga. “PROHOli ningkashi milu! kaja awui makhangachei leikashi katang mavaimana!”

²²Athumna laa sāda masot mikaphok tharan, Judahli ngararkida kharā Ammonnao, Moabnao, kala Seir Kaphungwui mibingli PROHOna ngathirai sāda athumli maishi ngasakhaowa.

²³Kaja, Ammonnaobing eina Moabnaobingna Seir kaphungwui mibingli ngararda zāikhayāngthatserhaowa, kala Seirwui mibingli sāthatser kahaiwui thili athum akha eina akha sāthat ngaroka.

²⁴Judahnaobingna lamhāng chiwui raikānphung dolan eina kāngashānkhayang tharan, yanglu, kathi angunmāng leisai; akhala mayāmshokmana.

²⁵Jehoshaphat eina awui mibingna ot akhangapon chitharan seila, thāngthāngla, kashankachon kala aman kasaka ot kachungkha leisāda athum khalattawui vang maphungkharar sāda apongkhui. Kathumthang langpongda phunglala ot chi chunglākhaoda makānmana.

²⁶Khamatethang athumna Beracahwui Leiwukli kazipa, kaja chili athumna PROHOli sochikata: chiwui vang aja eina tangda apam chili Beracahwui Leiwuk da kahona.

²⁷Chiwui thili Judah eina Jerusalemwui mi kachiva̱ Jehoshaphatna thānda mathānthup eina Jerusalemli latunga kaja athumwui yangkashebingli PROHOna yuingasakhaowa.

²⁸Jerusalemli tingteilāla, lyre kala talla̱la singda PROHOwui shimli kai.

²⁹Israelwui vang yangkashebingli PROHOna ngararmi kaji shālaga ngalei saikorawui wungrambing Vareli ngacheeyikhaowa.

³⁰Chithāda Jehoshaphatwui wungram chingrihaowa, kaja Varena awui kuikhamareili chingrihai ngasakhaowa.

³¹Jehoshaphatna chithāda Judahli munga. Ana Jerusalemli mungkaphok tharan kum thumrāda phangā kāshunghairasai, kala Jerusalemli kum maga̱da phangā munga. Ava̱va̱wui ming Azubah hoi, Shilhiwui naongalāva̱na.

³²Ana avāva̱ Asawui shongzat tākam eina makailakla zatsai; kala PROHOwui mikyanli khamashung ot sai.

³³Kha mibingna, awova̱ ngarāwui Vareli ning horsangchao makajiwui vang, kajujuiwui kameopam masākhayāngmihaithuwa.

³⁴Jehoshaphatwui kasāsā, khare eina thuilaga katang eina tangda Hananiwui naomayara Jehuwui Thotrinchān lairik, kaja Israel Awungabingwui Lairikli kapiserhaida lei.

³⁵ Hiwui thili Judahwui awunga Jehoshaphatna, makhangaronga ot kasā Israelwui awunga Ahaziahli ngashika.

³⁶Ali ngashiklaga Tarshishli vākhavai, Ezion-geberli jahas sākhui.

³⁷Kha Mareshahli khalei Dodavahuwui naomayara Eliezerna Jehoshaphatli, “Ahaziahli khangasowui vang nana sākahai PROHOna shimān ngasakra.” da marānmi. Jahasbing chi kaihaida Tarshish mavāpaithuwa.