Read Tangkhul Naga 2 THOTRINCHĀN 21 Bible Online

2 THOTRINCHĀN 21 - Tangkhul Naga bible

2 THOTRINCHĀN 21

¹ Jehoshaphat thikahai eina avāva̱ ngarāli ngasoda Davidwui keinungli chifahaowa; kala anaomayara Jehoramna awui mahut thuishina.

²Avāva̱ Jehoshaphatna kapharā achinā ngarā chiya: Azariah, Jehiel, Zechariah, Azariah, Michael kala Shephatiah; athum hi Judahwui awunga Jehoshaphatwui naomayarasera.

³Avāva̱na athumli lan kaja lupāsā, sinā, kala aman kasak shimlui, Judahli khalei raipan sākahai keinung eina ngasoda yarsera; kha wungrama naochizai Jehoramli yara.

⁴Jehoramna wungpamkhongli pamda nganingkhui kahai eina achinā ngarā katongali raighai eina sāthatserhaowa, kala Israelwui wungnao kaikhalila sāthathaowa.

⁵ Jehoramna awunga sākaphok tharan kum thumrāda khani kāshunghairasai, kala Jerusalemli kum chishat munga.

⁶Ahabwui naongalāva̱li khangakumwui vang, Israelwui awunga Ahabna kala ashi shimkhurna kasā thāda ala chili zata.

⁷Kha Davidli kala awui naomayarabingli kahor akha mirada Davidli ngashit kahaiwui vang PROHOna ashi shimkhurli mashimitmimana.

⁸Awui thotli Judahli mamayāmada Edompashina thuingarara, kala athum khalattawui awunga phākhuihaowa.

⁹Chieina Jehoramna awui raimi kathānabing kala siguigari saikorali ngasoda ngayāting vālaga a eina awui raimi kathānabingli kuikhanama Edompashili sāthatserhaowa.

¹⁰Chiwui vang aja eina tangda Edombingna Judahli ngararching kajina. Atam chitharan avāva̱ ngarāwui PROHO Vareli malai kahaiwui vang, Libnahshinala thuingarara.

¹¹Chili lāngda Judahwui kaphungpambingli kajujui apambing sakālaga Jerusalemwui mibingli mashitkasang pongli thānzatta Judahli apong nguingasaka.

¹²Kala marān Elijahwui eina chithi akha chihorāda hānga, “Navā Davidwui PROHO Varena hānga, ‘Khikhalajila nana Jehoshaphatwui athi shurda makazatwui vang kala Judahwui awunga Asawui thi mashurla,

¹³kha Israelwui awungabingwui apongli shurzatta Judah eina Jerusalemwui mibingli, Ahabna Israelnaobingli mashitkasangwui pongli thānkazat thāda kasāwui vang, nali phākhamei nachinā ngarā, navāwui shimkhur mibinglila, nana shaothathaira,

¹⁴yanglu, PROHOna nawui mibingli, nanaongarāli, napreiva̱ ngarāli, kala nathumwui lanlila kalākashi kahakva akha khuirāra,

¹⁵kala nali paiphonli kazātkashi kazāra, kala thangthangwui kakazā china napaiphon ngawokphāthaora.’”

¹⁶Jehoramwuitungli malungvātkhavai, Ethiopiawui ngalemli khalei Philistianaobinglila, Arabnaobinglila PROHOna ning ngatha̱ ngasaka;

¹⁷kala athumna Judahli rai rākaida, awungawui shimli khalei athumna samkaphang lan saikora kala anaomayarabing, apreiva̱ ngarāla, saikora pongkorthuihaida, paisho Ahaziah maningla nao mayarnao akhanidala mataimimana.

¹⁸Saikora hiwui thili PROHOna awui paiphonli maraikapai kazāt kazā ngasaka.

¹⁹Khaleilaga, kum khaniwui thili, kazāt china paiphon ngawokphathaida chotchanglak eina thihaowa. Avāva̱ ngarāli khayākashiwui meifa shatkharung kasā thāda ali khayākashiwui meifa mashatrungmimana.

²⁰ Ana mungkaphok tharan kum thumrāda khani kāshunghairasai, kala Jerusalemli kum chishat munga. A kathi atamli khipākha wukmakhanangmana. Davidwui keinungli chifaya, kha awungabingwui chikhurli machifamana.