Read Tangkhul Naga 2 THOTRINCHĀN 22 Bible Online

2 THOTRINCHĀN 22 - Tangkhul Naga bible

2 THOTRINCHĀN 22

¹ Arabnaobingli ngasokharā athumna anaomayarabingli sāthatser kahaiwui vang Jerusalemli kapamabingna Jehoramwui naomayara paisho Ahaziahli awunga sāngasaka. Chiwui vang Judahwui awunga Jehoramwui naomayara Ahaziahna Judahli munga.

²Ahaziahna mungkaphok tharan a kum hangmati da khani kāhairasai, kala Jerusalemli kumkha munga. Ava̱va̱li Athaliah hoi, Omriwui ara̱va̱na.

³Ava̱va̱na makaphā makhayā kasāwui pongli hāngchitheihaoda anala Ahabwui shimkhurwui apongli zata.

⁴Ahabwui shimkhurna kasā thāda anala PROHOwui mikyanli makaphā otmāng sai; kaja avāva̱ thikahaiwui thili athumna ali hāngchitheiya, chi awui kalā shikhavai ngasāhaowa.

⁵Athumwui tamkachithei athishurda Israel awunga Ahabwui naomayara Joramli ngasoda Syriawui awunga Hazaelli rai sākhavai Ramoth-gileadli vai. Kala Syriapāshina Joramli khamā zamihaowa;

⁶Syriawui awunga Hazaelli khangarar tharan Ramothli sākaza̱ khamā chi ngahā khavai Jezreelli latunga. Ahabwui nao Joram kazā kahaiwui vang Judahwui awunga Jehoramwui naomayara Ahaziahna angahān khavai Jezreelli tai.

⁷ Kha Ahaziahna Joramli akhangahān eina awui konglui khavai ngasāra kaji hi Varena ngarān kahaina. Kaja, ana chili khavā tharan ana Joramli ngasoda, PROHOna Ahabwui shimkhurli shimān ngasak khavai thao neomi kahaiya Nimshiwui nao Jehuli asamphanga.

⁸Jehuna Ahabwui shimkurli bichar sāda leilakha, Judahwui wungnaobing kala Ahaziahli ngasokazat achinā ngarāwui naomayarabingli samphangda ana athumli shaothatserhaowa.

⁹Ahaziahlila phākhavā eina Samariali yāmngathumsāda tukkhuilaga Jehuwuili tukungda sāthathaowa. Athumna ali chifami, kaja, “PROHOli ningtongda phāda shitkasanga Jehoshaphatwui ara̱na” da athumna hānga. Kala Ahaziahwui shimkhurli wungram chi mungkashap akhala maleithuwa.

¹⁰ Anaomayara Ahaziah thihaira da kathei tharan, ava̱va̱ Athaliahna Judah shimkhurwui wungnaobingli sāthatserhaowa.

¹¹Kha awungawui naongalāva̱ Jeho-shabe-athna Ahaziahwui naomayara Joashli sāthathaoki kaji awungawui naomayarabingwui eina ngathumda khuilaga ali khayangva̱li ngasoda petkā akhali thumhaowa. Hithāda sāda awunga Jehoramwui naongalāva̱, pāngmon Jehoiadawui preiva̱, kaja Jeho-shabe-athna Ahaziahwui azarva̱na, ana awui naoli thumhaida chiwui vang Athaliahna masāthatthuwa;

¹²kala Athaliahna ngalei chili munglakha eina tangda Joashna kum tharuk Vareshimli yāmngathumpamda athumli ngasopama.