Read Tangkhul Naga 2 THOTRINCHĀN 23 Bible Online

2 THOTRINCHĀN 23 - Tangkhul Naga bible

2 THOTRINCHĀN 23

¹Kashine kum Jehoiadana malung khanamkhuihaoda shāshāwui raimi kathānabingli khangashit akha sai, athum chiya: Jerohamwui naomayara Azariah, Jehohananwui naomayara Ishmael, Obedwui naomayara Azariah, Adaiahwui naomayara Ma-aseiah, kala Zichriwui naomayara Elishaphatna.

²Athumna Judahwui keinung kuimareida vālaga Levipashi kala Israel avāva̱ ngarāwui wungva̱bing saikorali kazipkhuida Jerusalemli rāsera.

³Kala kazip kahai saikorana awungali ngasoda Khorumshimli tuingashit akha sai. Kala Jehoiadana hānga, “Yanglu, awungawui naomayara! PROHOna Davidwui naongarāwui pongli hāngkahai thāda ana mungranu.

⁴Nathumna sāki kaji ot chi hina: pāngmonbingla, Levibingla sabbaththang ot makasā atamli, khum kathumwui akhana ngavei mayonra,

⁵khumkhana awungawui shimli pamra, kala khumkhana Shimphunga Ngaveili pamra; kala mi saikorana PROHOwui shim yāngkhuppamli pamserki kajina.

⁶Pāngmonbing, Levinaobing, kaja otram ngatha̱ khavai kathara athum maningla khipākha PROHOwui shimli mazangpaimana, kha PROHOna kakaso athishurda sāki kajina.

⁷Levipashina kachichāwui zeighai singlaga awungali kuinamda pamra; kala shimli kazazang mi chili sāthatra. Zanglala shoklala awungali ngasoshon ngasothaiki kajina.”

⁸Pāngmon Jehoiadana kahāng athishurda Levinaobing eina Judah saikorana chithāda sai. Sabbathwui ot saukida kharābingla, thuiuki kajibingla kachichāwui mingayar athishurda makailakla sai; kaja pāngmon Jehoiadana khipālikha shimli maung ngasakmana.

⁹Kala pāngmon Jehoiadana kathānabingli David awungawui kazei, chāngvei kahakla kateola, Khorumshimli haikasā saikora chi khuimi;

¹⁰mi saikora awungawui mayon khavai kachichāwui zeighai singlaga, shim chiwui azing zingtun kala hanphutpam eina shim chi kuimareida nganing ngasaka.

¹¹Chiwui thili ana awunganao chi khuishoklaga kuihon ngahonmi, ngashit kahai lairik chisina; kala Jehoiadashi vānao ngarāna tharchisin khavai thao neomida chi awungana da vāoshoka, kala athumna, “Awungali okpeiranu” da hānga.

¹²Mibingna awungali masot mida ngaunlop kahai chi Athaliahna kashā tharan, ana mibingli PROHOwui shimli ayanga;

¹³kala ana khayang tharan, zangkhavaili awungana awui pākra̱ ngalemli nganingsai, kala kathānabing eina talla̱ kakhongbingna awungawui ngalemli nganingda ngalei chiwui mi saikora mathānthup eina, talla̱ khongda laakasā, laawui akap akai eina ngasolaga athumna mathānda sochigatsai. Athaliahna kachon serkhākta, “Khayomna! Khayomna!” da hānga.

¹⁴Chieina pāngmon Jehoiadana raimi kathānabing chili kasoda hānga, “Ali raimiwui ngachaili ayarli khuishoklu; kala awui thi kashura chili raighai eina sāthatra.” Kaja pāngmon china, “Ali PROHOwui shimlungli masāthatalu.” da hānga.

¹⁵Chieina athumna ali tukkhuilaga awungawui shimwui sigui ngavei zangkhavaili vāda chili athumna sāthathaowa.

¹⁶Kala Jehoiadana, ala, mibingla, kala awungala, athum PROHOwui mi sarāda tuingashit sāngasaka.

¹⁷Chiwui thili mibing china Baalwui shim apheimihailaga hanphutla, meoma̱la, akha̱ sāda shaokhaimiserhaowa, kala Baalwui pāngmon Mattanlila hanphut ngalemli shaothathaowa.

¹⁸Kala Jehoiadana PROHOwui shim mayon khavai, Levishiwui pāngmonbingli hāngchithei kahai thāda, kala Levibingli Davidna PROHOwui shimwui yangmi khavai ngayeikhami thāda Moseswui ainli kapi kahai chi shurda PROHOli rikkatāchigat chi Davidwui kakaso thāda laa sāda chigat ngasaka.

¹⁹Makatharabing PROHOwui shimli mazang khavai ngaveili shantri pamngasaka.

²⁰Kala ana kathānabing, khangamkhareibing, mibingwui rammungabing, kala ngalei chiwui mi saikorali hokhuilaga, awungali, PROHOwui shim eina tāda atung ngavei kānshoklaga awungawui shimli thānungmi. Kala wungpamkhongli athumna awungali chipama.

²¹Chiwui vang ngalei chiwui mi saikora mathānhaowa; kala Athaliahli raighai eina sāthat kahai thili keinung chi chingrihaowa.