Read Tangkhul Naga 2 THOTRINCHĀN 26 Bible Online

2 THOTRINCHĀN 26 - Tangkhul Naga bible

2 THOTRINCHĀN 26

¹Kum tharāda tharuk rarkahaiya Uzziahli Judahwui mibing saikorana avāva̱wui mahut awunga sanghaowa.

²Awunga thikahaiwui thili ana Eloth sakākhuilaga Judahli hanmi.

³Uzziahna mungkaphok tharan a kum tharāda tharuk kāshunghairasai, kala Jerusalemli kum hangphangada khani munga. Ava̱va̱wui ming Jecoliah hoi, Jerusalemlāna.

⁴Avāva̱ Amaziahna kasā thāda ana PROHOwui mangāli khamashung otmāng sai.

⁵Vareli khangachee tamkachitheia Zechariahwui atamli ana Vareli phai; kala ana PROHOli ngavaplakha eina tangda Varena ali mataisang ngasakchinga.

⁶Ana Philistinenaobingli angarara, kala Gathwui, Jabnehwui, Ashdodwui phākhobing sākhaimiserhaowa; kala Ashdodwui apamli kala Philistinewui apam khangatateilila keinung sakai.

⁷Philistineli, kala Gurbaalli khalei Arabnaobingli, kala Meunbingli khangarar tharan Varena ali ngachonmi.

⁸Ammonnaobingna Uzziahli shai misai, kala awui mingkhamayāng Egyptwui thari tāshunga, kaja a pangshap leilakhaowa.

⁹Chili lāngda Achithek Ngaveilila, Leiwuk Ngaveilila, Anglelila Uzziahna dolan sākāda ngaveitithai.

¹⁰lamhānglila dolan sākālaga ra̱khong kachungkha khonkhui; kaja Shephelahlila, tampāklila awui sha̱kei kachungkha leisai, kala kaphungramli lui khavā eina drakhā yāmgui kasā mi kachungkha phāsanga, kaja kaphungram chi tumhaoda ana ningchānglaka.

¹¹Chimāng maningla, raili vākapai shipai kachungkha, kapime Je-iel eina otva̱ Ma-aseiahna awungawui raimi kathāna Hananiahwui hāngkachithei athishurda, raimi khum khum eina leisai.

¹²Avāva̱ ngarāwui shimkhur eina rai kapingabing kaziplaga thingkhani shātharukna.

¹³Athumwui azingli, lungsanlak eina rai ngararshapa, yangkasheli ngararda awungali ngachonmi khavai raimi lakh-kathum thingshini shāphangā lei.

¹⁴Kala raimi saikorawui vang Uzziahna chāngvei, kazei, kuihon, raikachon, malā kala thailungthei ngarānmisera.

¹⁵Kala dolan kala achithekwui eina malāthing kala ngalung kāpkhavai, kathethembingna Jerusalemli akap sāshoka. Ana mapangranglakha eina tangda ali matakhak eina ngachonmihaoda, awui mingkhamayāng katāva̱lila ngayaovai.

¹⁶Kha ana kapang chitharan langsohaowa, china awui shimān khavai ngasāhaowa. Kaja awui PROHO Vareli ngakaishida PROHOwui shimli nganamkaphā thao riktā khavai hanphutpamli zanga.

¹⁷Kha pāngmon Azariahna kapingpinga PROHOwui pāngmon hangchishatli ngasoda awui thili zanga;

¹⁸athumna awunga Uzziahli hānga, “PROHOli nganamkaphā thao rikkata hi nana masārānmana, Uzziah, kha tharchigat kahai pāngmon Aaronwui naongarāwui vangna. Kathara shim hiwui eina shokulu; kaja nana khalāng ot kasā hi eina PROHOna nali khuisangmiki kaji maningmana.”

¹⁹Uzziahna pāngli nganamkaphā rikkhavai meikhong singsāda malungvāthaowa. Ana PROHOwui shimwui nganamkaphā riktā khavai hanphut ngalemli pāngmonbingli malungvātta leilakha, akhaveili phārrei[1] kazāhaowa.

²⁰ Pāngmon kharei Azariah kala pāngmon saikora ali khayang tharan akhaveili phārrei kakazā thei! Chieina athumna totot eina namshokhaowa. PROHOna kashong kharāng chi theilaga anala totot shokhaowa.

²¹Awunga Uzziah kathi eina tangda phārrei kazai, kala phārrei kakazāwui vang PROHOwui shim eina khangatei shimli pamngasakhaowa. Awungawui shimlui khayang kala ngalei khamungwui ot anaomayara Jothamna sāhaowa.

²²Khare eina thuilaga khanao eina tangda Uzziahna kasāsā Amozwui naomayara marān Isaiahna kapiserhaida lei.

²³Uzziah thikahai eina avāva̱ ngarā awungabingli chifa khavaipamli chizanhaowa, kala athumna, “A phārrei kakazā mina” da hānga. Kala anaomayara Jothamna awui mahut thuishina.