Read Tangkhul Naga 2 THOTRINCHĀN 28 Bible Online

2 THOTRINCHĀN 28 - Tangkhul Naga bible

2 THOTRINCHĀN 28

¹Ahazna mungkaphok tharan a kum maga̱ kāshunghairasai, kala ana Jerusalemli kum tharāda tharuk munga. Avāva̱ Davidna kasā thāda ana PROHOwui miktāli khamashung ot masāmana,

²kha Israelwui awungabingwui apongli zata. Baalwui meoma̱ eina tangdala sākhui;

³kala PROHOna Israelwui mangāli, kasham kahai yurbingna sākasā ningkakachai otsak athishurda Hinnomwui naomayarawui tampākli nganamkaphā riktai, kala anaomayara ngarālila pha̱phayāda riktai.

⁴Kajujuipam, kaphunglila, kala khamateka thingphei kachiva̱li pha̱phayāda nganamkaphā thaola riktai.

⁵Chiwui vang awui PROHO Varena ali Syrianaobingwui pāngli horsangmihaowa, kala ali yuihaoda awui mi kachungkha tukphungda athumli Damascusli khuiunghaowa. Ali Israel awungawui pānglila horsangmida awui mi kachungkha sāthatmihaowa.

⁶Kaja, Remaliahwui naomayara Pekahna thangkhali Judahwui mi lakh akha thingmaga̱ sāthata. Athum chi rai kapinga mimānglala avāva̱ ngarāwui PROHO Vareli horkahaiwui vangna.

⁷Kala awungawui naomayara Ma-aseiah, raimi kathāna Azrikam, kala awungawui thi kazanga Elkanah athum kathumli Ephraimwui kapinga Zichrina shaothathaowa.

⁸Israelwui mibingna achināngarā, athumwui preiva̱ngarā, naongarā, sha̱naola, mayarnaola lakh-khani tukthui haowa, kala otla kachungkha athumwui eina ngaponkhuida Samariali khuiunga.

⁹Kha Oded kaho PROHOwui marān akha chili leisai; Samariali kharā raimibing chili ana asamphangda hānga, “Yanglu, Judahli malungkhavātwui vang, navā ngarāwui PROHO Varena nathumwui pāngli horsangkhamina, kha nathumna malungkhavāt eina sāthathaoda chi kazingramli kāshunghaira.

¹⁰Chiwuitungli Judahwui kala Jerusalemwui sha̱nao mayarnaoli nathumna mungkhavai kala raonao sāngasak khavai ngaranda lei. Nathumwui PROHO Varewui mangāli nathum khalatta morei masālakmala?

¹¹Ara iwui tui nganālu, nathumna tukphungda khalei nachinā ngarāli shiunserhaolu; kaja PROHOwui malungvātshun kahai nathumwuitungli leihaira.”

¹²Ephraimwui wungnao kaikha, Johananwui naomayara Azariah, Meshilemothwui naomayara Berechiah, Shallumwui naomayara Jehizkiah, kala Hadlaiwui naomayara Amasa, athumnala nganingkāda raiwui eina khaungbingli mamayāmada hānga,

¹³“Nathumna tukkaphungbing chi hili makhuirāpaimara, kaja ithumwui morei kala khayon khamāng hili ngaror khavai PROHOwuitungli khayonkhamāng khuirā khavai kasāna. Kaja ithumwui khayon khamāng chi haklakhaira, kala Israelwuitungli malungkakang haklak kahai leihaira.”

¹⁴Chiwui vang eina khutlai kasing raimibing china wungnaobingwui kala kazip chiwui mangāli tukkaphungbing kala ngaponkaphung chi haimihaowa.

¹⁵Chieina aming eina hāngkahaibing china nganingkāda tukkaphungbing chili khuilaga ngapon kaphung kashankachon chi khamasai eina kazatbingli ngavaimi, pheihop sangmi, kala kashakazāla mizā mimanga; khamāla ngahāmi. Kala mazat kathukbingli gadhā tongngasaklaga, khaneirong pemting eina khalei Jericho keinungli achinā ngarāwuili thanvāmi. Chiwui thili athumna Samariali latunghaowa.

¹⁶Atam chitharan awunga Ahazna Asyriawui awungali ngachonmi khavai mi chihovai.

¹⁷Kaja Edomnaobingna Judahli rāngararluishitlaga yuihaida tukthuiluihaowa.

¹⁸Philistinenaobingna Shephelahwui keinung kala Judahwui Negebli rāngapona, kala Beth-shemesh, Aijalon, Gederoth, Soco, Timnah, Gimzo kala athum chiwui kha̱bing saikora ngapaikhuilaga athumna chili somhaowa.

¹⁹Kaja Israelwui awunga Ahazna shuikhangarui ot sāda PROHOli mashitkasangwui vang Judahli maishi ngasakhaowa.

²⁰Chiwui vang eina Asyriawui awunga Tilgath-pilneserna ngachonki kajishong maningla rāngararda khanang ngasakhaowa.

²¹Kaja PROHOwui shimli khalei, awungawui shimli khalei kala wungnaobingwui khalalei khuilaga Ahazna Asyriawui awungali shai chigatmāngmada khikha makanāthuwa.

²²Awunga Ahaz kaho china, chotchāngda sipkasa atamli PROHOli malaikhangai malaihaowa.

²³Kaja ali khayuiya Damascuswui varebingli pha̱phayāda hānga, “Asyriawui awungali awui varena ngachonmihaoda ilila ngachonmi khavai pha̱phayāra.” Kha chi awui vangla Israelwui vangla shimān khavai ngasāhaowa.

²⁴Varewui shimli khalei khorkhong saikora khuilaga Ahazna shaokhaiserhaowa, kala PROHOwui shimla khāmong shungtithaida Jerusalemwui achikun kachida aningkhān eina hanphut sākhui.

²⁵Judahwui keinung kachida vare khangateili nganamkaphā riktā khavai kajujui apambing sākhui, chithāda avāva̱ ngarāwui PROHO Vareli malungvātngasaka.

²⁶Yanglu, awui otsak khangatatei, kasā khavā khare eina thuilaga khanao eina tangda, Judah kala Israel Awungabingwui Lairikli kapiserhaida lei.

²⁷ Ahaz thihaida Jerusalem keinungli chifahaowa, kaja athumna Israel awungabingwui chikhurli makhuiungthuwa. Kala anaomayara Hezekiahna awui mahut thuishina.