Read Tangkhul Naga 2 THOTRINCHĀN 3 Bible Online

2 THOTRINCHĀN 3 - Tangkhul Naga bible

2 THOTRINCHĀN 3

¹ Chiwui thili Solomonna, Moriah Kaphungli kaja, PROHOna avāva̱ Davidli rākachithei, Jebuspa Ornanwui lanpum, Jerusalemli Davidna kapangkahai apam chili PROHOwui shim sakāphoka.

²Ana mungda kum khamatewui kachāng kakhaneli sāphoka.

³Varewui shim sakā khavai Solomonna asān-aret onkakhui chi hina: achālakha zatnākasa tamkhavai eina, asān khuining hangtharuk, aret khuining maga̱na.

⁴Shimrei chiwui mangāshong zangkhavaili shimpho sākashok chi, aret ungshung vāshungda khuining maga̱, kala kajuila khuning maga̱na. Alung peida ana sinā eina heimitsanga.

⁵Shimrei chi cypressthing eina ngaveida sinā akachanga eina romlui, kala khaneinā eina sinā huishon ruksanga.

⁶Aman kasaka ngalungla sāsangda shim chi mathā ngasaka. Sinā chi Parvaimwui sināsera.

⁷Shim peida khāngenla, sāzerla, phākhola, khāmongla, sinā ruksanga, kala phākholi cherubim yeksanga.

⁸Tharmathengmeikap kaje apam chi asān-aret ungshung vāshungda khuining maga̱ jiya. Chila sinā heimitsanghaida sinā ton maga̱ zanga.

⁹Sināwui yotpi kharit gram shāphangā-hangshini kāshunga. Ato kābingla sinā heimitsanga.

¹⁰Tharmathengmeikap kaje kāli thing eina cherubim khani sākhuida sinā eina heirora.

¹¹Cherubim khani chiwui angachāng pharonlaga khuining maga̱ kai: akhawui angachāng khuining phangā kasāng china phākholi za̱ya, angachāng akhapa khuining phangā kasāng china cherubim akhapāwui angachāng akhali ngasunkhui;

¹²kala cherub hipawui angachāng, khuining phangā sāngda shim chiwui phākholi aza̱ya, kala angachāng akhapala khuining phangā sāngda cherub kharepā chiwui angachāngli ngasunkhui.

¹³Cherubim khaniwui angachāng pharonlaga khuining maga̱ya; anina phei eina nganingda mangāshong mai ngareishoka.

¹⁴Ana chonrānla sākhuida khamayinga, hungrisi mayingrisi, khamanaka chonsā eina sākhuida chiwuitungli cherubim phorsanga.

¹⁵Mangāshong khuining thumrāda phangā kasānga pākra̱ khani ana shuna, kala khanini chiwui atungli khuining phangā kasānga agui sāsanga.

¹⁶Ana chā khangachā thāda pākra̱ tungli huishon khanongmi, kala kabothei shākha sākhuilaga huishon tungli thāngtā ngasaka.

¹⁷Pākra̱ khani chi khorumshimwui mangāli azingshong akha kala zingtunshong akha da shuna. Azingshong shunkahai chili Jachin hoi, kala atungshong shunkahai chili Boaz hoi.