Read Tangkhul Naga 2 THOTRINCHĀN 30 Bible Online

2 THOTRINCHĀN 30 - Tangkhul Naga bible

2 THOTRINCHĀN 30

¹Israel eina Judah saikorali kala Ephraim eina Manassehlila Hezekiahna chithi kapida, Israelwui PROHO Varewui makānkhami phanit mayon khavai Jerusalemli rāserlu da hānga.

²Kaja awungala, wungnaobingla kala Jerusalemli khalei kazip saikorana kachāng kakhaneli phanit chi mayon khavai ngazek kahaina—

³kaja pāngmonbingna atam chāda mangarangrarthu, yaruinala Jerusalemli makazipphāthuda athumwui khangachā atamli mamayonrarthuwa—

⁴chieina awungala kala yaruinala atam chipapamra jikahaina.

⁵Chiwui vang eina Israel saikora vāpeida, Beersheba eina thuilaga Dan eina tangda, Israelwui PROHO Varewui mangāli makānkhami phanit chi Jerusalemli rāzangserda mayon khavai kasaka kakaso akha mihaowa; kaja chikathā kahaka kazip mamayonlakrangsai.

⁶Awungana kala awui wungnaobingna kakapi chithi paophungabingna Israel eina Judah apam saikorali vāpeida phungvai. Kala chithi chili awungana hithāda hānga; “O Israelwui mibing, Abrahamwui, Isaacwui kala Israelwui PROHO Vareli latungserlu, chithākha Assyria awungabingwui pangwui eina shākkahai nathumlila ana latungra.

⁷Navā ngarā, nachinā ngarāna PROHO Vareli mashitkasangwui vang mutmi kahai nathumna theihaira, athumwui thāda masaalu.

⁸Navā ngarāwui thāda ara hāngla makakhui masaalu, kha PROHOli hamsangda ana katang makhavaiwui vang tharmatheng kahaipamli rāda nathumwui PROHO Vareli otram ngatha̱lu, chieina awui sākashi malungkhavāt chi nathumwui eina ngalatthuihaora.

⁹Kaja nathumna PROHOli latungakha, nachinā ngarā, nanao ngarāli tukkathuibingna lumashanmida athumna apam hili latungluishitra. Kaja nathumwui PROHO Vareva, lumashankatha̱a kala leishikatha̱ana, kala nathumna ali latungakha nathumwui eina mai mangareithuimara.”

¹⁰Chiwui vang paophungabingna Ephraim, Manasseh, kala Zebulun vāshungda keinung kachiva̱li hāngvai; kha chiwui mibingna athumli mana̱shida zeinganaowa.

¹¹Asher, Manasseh, kala Zebulunwui mi kateokhamāngna Jerusalemli rāmaya.

¹²PROHOwui tui awungana kala wungva̱bingna kaso kahai chili Judahli ningkha sākhavai Varena ngasomi.

¹³Kachāng kakhaneli, khawok makazang phanitli zangkhavai Jerusalemli mi kachungkha rāda kahaka kazip khui.

¹⁴Athumna ot sāphokta, Jerusalemli khalei hanphut, kala nganamkaphā ot riktā khavai hanphut saikora chi khuishoklaga Kidron tampākli ahorserhaowa.

¹⁵Kachāng kakhanewui zimiksho tharāda khamatethang athumna makānkhami phanit chiwui yao taithata. Kala pāngmonbing eina Levinaobingli vaishi ngasakhaowa, chiwui vang athum khalatta tharmathengkhuida PROHOwui shimli rikkatāchigat khuirai.

¹⁶Varewui mi Moseswui ainli hāngkahai athishurda kachichāwui otpamli nganingripa; kala Levinaobingwui eina ashee khuilaga pāngmonbingna yikrora.

¹⁷Kaja kazip chili matharkhamatheng mi kachungkha leisahaowa; chiwui vang, PROHOwui mangāli tharmatheng khavai Levinaobingna makathara saikorawui vang makānkhami phanitwui yao taithata.

¹⁸Kaja Ephraim, Manasseh, Issachar kala Zebulunwui mi kachungkha hāngkahai thāda masāla mangaranglala phanitsā shai. Kaja Hezekiahna athumwui vang hithāda seihā sāmi: “Kapha PROHOna

¹⁹kathara shimwui ain athishurda mangaranglala avāva̱ ngarāwui PROHO Vareli kaphā mi kachiva̱li pheomiranu.”

²⁰PROHOna Hezekiahwui kapo khuisangmida athumli pheomi.

²¹Israelnaobing Jerusalemli khavā saikorana khawok makazang phanit chi mathānthup eina shinithang mayona; kala Levinaobing eina pāngmonbingna PROHOwui mingli ningsanglak eina thangkachida masot chigata.

²²Kala Levinaobingna PROHOli mathālak eina otram khangatha̱bing chili Hezekiahna ninglum khavai hāngchithei. Chithāda athumna ningyatshār chigatta avāva̱ ngarāwui PROHO Vareli ningkashi eina ngasoda shinithang phanitwui kashakazā zai.

²³Chiwui thili kazipta khalei mi katongana phanit chi shinithang pamvā khavai mayā ngaroka; chiwui vang khamathān eina ngasoda shinithang pamvāluishita.

²⁴Kaja chigat khavai Judahwui awunga Hezekiahna mukkā thingkha, yao thingshini yaruili mi, kala wungnaobingnala mukkā thingkha kala yao thingtharā kazip chili mi. Chiwui vang pāngmonbing kachungkha tharmathengluishita.

²⁵Judahwui kazip katonga, pāngmonbing eina Levinaobing, kala Israelwui eina kharā kazip katonga, Israel ngaleiwui eina kharā ramkazatabing, kala Judah ngaleili ramkazatabing katongana ringphangaruma.

²⁶Chiwui vang Jerusalemli ringpha matailakhaowa, kaja Israelwui awunga, Davidwui nao Solomonwui eina thuida hikathā Jerusalemli maleilakrangsai.

²⁷Chiwui thili pāngmonbing eina Levinaobingna ngakarthuida mi saikorali somi, kala athumwui khon, seihā sākhami chi awui katharapam kazingramli shākāmi.