Read Tangkhul Naga 2 THOTRINCHĀN 31 Bible Online

2 THOTRINCHĀN 31 - Tangkhul Naga bible

2 THOTRINCHĀN 31

¹Saikora hi kupkahaiwui thili, chili khalei Israel saikorana Judahwui keinungbingli vālaga pakra̱bing kala Asherim shaokhaitāda Judah eina Benjamin, kala Ephraim eina Manassehli khalei kajujuipam eina hanphut saikora makupranglakha eina tangda shaokhaivai. Chiwui thili Israelwui mi saikorana kachichāramwui ichichā shimli latungserhaowa.

²Kala Hezekiahna pāngmonbing eina Levinaobing khum khum athishurda pāngmonbing eina Levinaobingwui otpam athishurda rikkatā kachigatwui vang, ningyatchigatwui vang, PROHOwui shim ngavei mayon khavai otram khangatha̱, kala masot mida ningkashi mikhavai kapangsanga.

³Awungana awui khaleiwui eina rikkatā kachigatwui vang mikashoka: ngathor ngazin rikkatā kachigat, sabbaththangwui vang rikkatā kachigat, changwokthangwui vang, kala retmi kahai phanit phanaowui vang PROHOwui ainli hāngkahai chithāda chigata.

⁴Kala PROHOwui ain athishurda pāngmon eina Levinaobingli mirān chi mikhavai, Jerusalemli khalei mibingli awungana kasoi.

⁵Kakaso chi ngayaokhaleoda Israelnaobingna, samphangkhare theishirai; drakhāthei, thao, khuira̱, kala luiwui eina samkaphang saikorawui eina ot kachiva̱ tithe kachungkha chigata.

⁶Judahwui keinungli khalei Israelnaola, Judahpashila seiwui tithe, yaowui tithe, kala athumwui kala Israelnaobing Judah keinungli khaleibingna athumwui sei, yao, kala athumwui PROHO Varewui mingli tharchigat kahai ot saikora khuida rākaziphaisera.

⁷Kachāng kakathumali athumna kaziphokta kashine kachāngli kuphaowa.

⁸Hezekiah eina awui wungnaobingna kachungkha kazip kahai chi atheilaga PROHOli ningkashi mida awui mi Israelnaobingli somi.

⁹Kala Hezekiahna pāngmonbing eina Levinaobingli kazip kahai chiwui pongli ngahāna.

¹⁰Pāngmon kharei, Zadok shimkhurwui Azariahna ngahānkai, “PROHOwui shimli athumna rāchigatkaphok eina thuida ithumna kashap zāhaira, kala kachungkha taidalei; kaja PROHOna awui mibingli sokhamiwui vang sorngasaida taihaida lei.”

¹¹Chieina Hezekiahna PROHOwui shimli zātshim sākhuilu da kakaso eina athumna chi sākhui.

¹²Kala tithela, thāda kachigatla, tharchigat kahai otla athumna khuirāsera. Kala Conaniah Levipana chiwui otsinli kathāna sai; agato Shime-i kakhanena;

¹³kala awunga Hezekiah eina Varewui shimwui akhoka Azariahna phāsang kahaibing, kaja Jehiel, Azaziah, Nahath, Asahel, Jerimoth, Jozabad, Eliel, Ismachiah, Mahath kala Benaiah athumna Conaniah eina agato Shime-ili ngachonmi.

¹⁴Imnah Levipawui naomayara Core, zingshoshongwui ngavei khamayona chili, Vareli lemmet kachigat, kala PROHO eina tharmeikap kaji kachigatwui vang yar samiki kaji yangmi ngasaka.

¹⁵Ali ngachonkhamebing chiya: Eden, Miniamin, Jeshua, Shemaiah, Amariah kala Shecaniah athumna, pāngmonwui keinungbingli, khararnaosan mateila, khum-khumwui athishurda achinā ngarāli athumna ningtonglak eina ngayarmi,

¹⁶kha PROHOwui shimli kachichāwui ot sāda otram khangatha̱, kum kathum eina thuida rarkhamei atungwui mayarnaobingli akhum makaila ngaraichāda ngayarmisera.

¹⁷Pāngmonbingna avāva̱ ngarā shimkhurwui eina aming chana, kala Levinaobingna khumkhum eina otsakwui athishurda kum maga̱ kākashung kala atungbingmāngli aming chana.

¹⁸Pāngmonbingna naoshinaobing, preiva̱̱ ngarā, naomayara ngarā, athumwui naongalāva̱ ngarā, kala yarui katonga ming chana; kaja athumna ningtonglak eina tharmathengda pama.

¹⁹Aaronwui naongarā pāngmonbing, athumwui ngaleiwui keinungbingli khaleibingwui vanga, pāngmon ngachaili mayarnao kachiva̱ kala Levibingwui ngachaili aming chankahai kachiva̱li yarbing chi yaomi khavai mibingwui aming eina hāngmihaida lei.

²⁰Judah saikorali vāpeida Hezekiahna chithāda sāmi, kala awui PROHO Varewui mangāli kaphā kala khamashung ningtongda ot sai.

²¹Varewui shimli otram khangatha̱ ain eina ningkhami athishurda khamayon, Vareli kaphā, saikora hi ana wuklung tongda kasāwui vang mataisanga.