Read Tangkhul Naga 2 THOTRINCHĀN 36 Bible Online

2 THOTRINCHĀN 36 - Tangkhul Naga bible

2 THOTRINCHĀN 36

¹Josiahwui mahut anaomayara Jehoahazli ngalei chiwui mibingna Jerusalemli awunga sanghaowa.

²Jehoahazna mungkaphok tharan a kum maga̱da kathum kāshunghairasai, kala kachāng kathum Jerusalemli munga.

³Egyptwui awungana ali Jerusalemli tuknarhaowa; kala lupāsā kg. thingkathum shāmati hangchikoda chiko kala sinā kg. thumrāda mati da shai khui.

⁴Kala Egyptwui awungana achinā Eliakimli Judah eina Jerusalemwui awunga sāngasaka, kala awui mingla Jehoiakim phokmi; kha Necona Jehoahazliva Egyptli khuivāhaowa.

⁵Jehoiakimna mungkaphok tharan a kum maga̱da phangā kāshunghairasai, kala ana Jerusalemli kum tharāda akha munga. Ana awui PROHO Varewui mangāli makaphā ot chi sai.

⁶Kala Babylonwui awunga Nebuchadnezzarna rai sāda mari khanghui eina khalapta Babylonli tuktāhaowa.

⁷PROHOwui shimli kahai khorkhong ngayarda Nebuchadnezzarna khuilaga Babylonli khalei awui konungli tāhaihaowa.

⁸Jehoiakimwui otsakbing, ana kasā ningkakachai otsak, kala ali mamayākhangai saikora, Israel eina Judah Awungabingwui Lairikli kapiserhaida lei. Kala anaomayara Jehoiachinna awui mahut thuishina.

⁹Jehoiachinna mungkaphok tharan a kum chishathairasai, kala ana Jerusalemli kachāng kathum zimiksho tharāthangmāng munga. Ana PROHOwui mikyanli makaphā ot chi sai.

¹⁰Chikumwui kanrei atamli awunga Nebuchadnezzarna mi chihovāda ali kala PROHOwui shimli kahai aman kasaka khorkhongbing eina ngasoda khuiung ngasaka; kala achinā Zedekiahli Judah eina Jerusalemwui awunga sāngasakhaowa.

¹¹ Zedekiahana mungkaphok tharan a kum maga̱da akha kashunghairasai; kala ana Jerusalemli kum tharāda akha munga.

¹²Ana awui PROHO Varewui mikyanli makaphā ot chi sai. PROHOwui tui rāhāngkhame Jeremiah marānwui mangāli khalatta mahamsangaimana.

¹³Vare ming singda ali mingzai khangasaka awunga Nebuchadnezzarlila ngakaishi; ning mararkhuihaida Israelwui PROHO Vareli ningateilaga malatungai jihaowa.

¹⁴Yarui kala pāngmon kathānabingla, yurbingwui ningkakachai saikora chili shurda mashitsang phaphuthuwa, kala Jerusalemli khalei tharchigat kahai PROHOwui shim makhao ngasaka.

¹⁵Avāva̱ ngarāwui PROHO Varena athumli kala aramli lukhamashanwui vang, marān chiholui chiholui ji;

¹⁶kha awui tuili ningkachaida PROHOwui makhamayā lungvat kharā eina tangda athumna Varewui paomebing kala marānbingwui tui chili chipatta mana̱shipama.

¹⁷Chiwui vang eina Chaldeawui awungali Varena chihoda, kathara shimli mayarnao kachungkha sāthathaowa; kala lukhamashan maleilakla, mayar-ngalā matei, kasar-kafa mateila awui pāngli horsangmiserhaowa.

¹⁸Kala PROHOwui shimli kahai, kateola, khareila, khorkhong katonga, chili khalei PROHO shimwui lan saikora, awunga kala wungnaobingwui lan saikora Babylonli khuivāserhaowa.

¹⁹Kala athumna Varewui shimla mei sa̱tāmihaowa, Jerusalemwui phākhola shaokhaimiserhaowa; kala konungla mei sa̱tāmihaida aman kasasaka khorkhong chuitāserhaowa.

²⁰Mashaothat khangakanbing chi Babylonli tukunglaga, Persiawui wungram masākāranglakha eina tangda awui kala anao mayarawui raonao sāngasakchinga,

²¹hi mibingna kum hangshini sabbath makhamayon chi hāngsang khavai ngalei hi macho ngasakra da PROHOwui tui Jeremiahna hāngkahai chi ungshung ngasak khavaina.

²²PROHOwui tui Jeremiahna hāngkahai chi ungshung ngasak khavai, Persiawui awunga Cyrusna pankhare kum, PROHOna Persiawui awunga Cyruswui manglā mathuk ngasakta, chiwui vang ana awui wungram saikora vāpeida kachishāt sāda kakapila kapida hānga,

²³“Persiawui awunga Cyrusna hithāda hānga, ‘Kazingramwui PROHO Varena okathuiwui wungram, saikora ili mihaira, kala Judahli khalei Jerusalemli awui vang shim akha sakā khavai ili kasohaira. Nathumwui ngachaili PROHOwui mi khalalei awui PROHO Varena ali ngasomiranu. PROHOna nathumli ngasomiranu.’”