Read Tangkhul Naga 2 THOTRINCHĀN 5 Bible Online

2 THOTRINCHĀN 5 - Tangkhul Naga bible

2 THOTRINCHĀN 5

¹Hithāda Solomonna PROHOwui shim kasā ot saikora kuphaowa. Kala avāva̱ Davidna tharchigat kahai otbing lupāsā, sinā, kala khorkhong saikora Khorumshimwui lanshimli kaziphai.

²Chiwui thili Solomonna Israelwui ararbing, shang-shangwui wungva̱bing, kala Israel yurwui avāva̱ ngarā shimkhurwui khararabing saikorali Jerusalemli kazipkhuilaga, Davidwui keinung Zionwui eina PROHOwui tuingashitwui oko chi akhui khavai ngarāna.

³Chiwui athishurda Israelwui mi saikora awungawui mangāli kachāng kashinewui phanit atamli akazipsera.

⁴Israelwui ararnao zangserlaga Levipashina oko chi akhui.

⁵Athumna okola, kachonshimla, kala chiwui alungli khalei kathara khorkhong saikora pāngmonbing eina Levipāshina khuiphunga.

⁶Kala Awunga Solomonli ngasoda Israel yarui saikorana okowui mangāli kazipta yaola, seila kachungkha mashānkharar pha̱phayai.

⁷Chithāda pāngmonbingna PROHOwui tuiāngashitwui oko chi khuikāda alungwui katharapam, tharmathengmeikap kaje pam cherubimwui angachāng zingli hai.

⁸Kaja cherubimwui angachāngna okowuitungli hārkahaiwui vang okolila, thingphānbinglila farora.

⁹Kha thingphān khani chi sangnāhaida katharapamwui eina theizanga, kha ayarwui eina matheimana; kala aja eina tangda chithāda leichingda lei.

¹⁰Israelnaobingli Egyptwui eina thānkashok atamli PROHOna athumli tuingashit sākhavai Horebli Mosesli khami kala sangkahai lungphek khani chi maningla oko chili khangatei khikha akhala masanghaimana.

¹¹Pāngmonbingna katharapamwui eina kashok atamli (kaja, pāngmon saikora kachichāshi meiphung makhaila athum khalatta tharmatheng kahaisera;

¹²laa kasā Levinaobing saikora Asaph, Heman, Jeduthun kala athumwui naomayarabing kala chinaongarā, khamanaka kachon ngavairipta, kortar, tingteilā, lyre singlaga, talla̱ kakhong pāngmon shākha maga̱li ngasoda hanphutwui zingshoshong nganinga;

¹³ PROHOli ningkashi eina ngasoda kala khokkha sāda masotkhami chi talla̱ kakhong kala laa kasābing athumwui otna), kala PROHOli masot mida talla̱la kala khangatatei laawui akap-akai zangda, “Kaja a phālaka, kaja awui leikashi mangacheila leichinga,” da laa chi juikakā chitharan, PROHOwui shim chi muiyāna pemhaowa,

¹⁴muiyā khalei chiwui vang, pāngmonbing china otram mangatha̱paithuwa; kaja Varewui shim chi PROHOwui tekhamateina pemhaowa.