Read Tangkhul Naga 2 THOTRINCHĀN 6 Bible Online

2 THOTRINCHĀN 6 - Tangkhul Naga bible

2 THOTRINCHĀN 6

¹Chiwui thili Solomonna hānga, “PROHOna muiyā kashālungli pamrada hānghaira,

²mashimānda pamkhavai ina nawui vang tekhamatei shim akha sākāhaira.”

³Chiwui thili Israelwui yaruina nganinglakha awungana mai ngareivāda Israel yarui kazip chili somi.

⁴Kala ana hānga, “Ishāvā Davidli akhamor eina ngashitmi kahai chi ungshung khangasaka PROHO Israelwui Vare chili soserranu. Kaja ana hithāda hānghaisai,

⁵‘Iwui mibingli ina Egyptwui eina thānshokthang eina thuida Israel shang saikorawui alungli shim akha sākāda iwui ming leikhavai keinung akhala makapangkhuimana; kala iwui yur Israelwuitungli mungkhavai wungnao sākhavai mi akhala maphāsangmana;

⁶kha iwui ming leikhavai Jerusalemli ina kapangkhui, kala iwui yur Israelwuitungli mungkhavai Davidli hākhui kahaina.’”

⁷“Ishāvā Davidna, Israelwui PROHO Vare mingwui vang shim akha sākhavai phaninga.

⁸Kha PROHOna ishāvā Davidli hānga, ‘Imingwui vang nana shim akha sākhuigada kaphaning chi phālaka,

⁹chithālala nana shim chi masākāmara, kha nana pharākakhui nanaona imingwui vang shim chi sānaora.’

¹⁰“Ara PROHOna ngashit kahai chi ungshungmihaira; kaja ishāvā Davidwui pamli ina thuishinda PROHOna ngashit kahai thāda Israelwui wungpamkhongli pamda lei, kala Israelwui PROHO Varewui vang ina shim akha sākhuihaira.

¹¹Kala Israelnaobingli ngasoda kasā PROHOwui tuingashit oko chi ina shim hili khuiunghaira.”

¹²Chiwui thili Solomonna hanphutwui ngalemli nganingda kazipta khalei Israel saikorawuitungli pāng khāngkai.

¹³Ana pithrai eina sākakhui tārong, khuining phangā kasāng, khuining phangā kapāk kala khuining kathum kajui, kayāng alungli haikahai chiwuitungli nganinga. Kala Israelwui kazip saikorawui miktāli khuktizanga, kala apāng khani kazingramshong khāngkāda hānga,

¹⁴“O PROHO, Israelwui Vare, kazingramlila okathuilila na kathā Vare katei maleimana, ningtongda nawui thi kashur raobingli leikashi makhangachei chitheimi, kala tuingashit mayonmi;

¹⁵ishāvā narao Davidli hāngmi kahai chi mayontita; mha, nakhamor eina hāngkahai chi aja otsak eina ungshunghaira.

¹⁶Chiwui vang eina O PROHO, Israelwui Vare, narao ishāvā Davidli nana, nanao ngarāna ningngasharda, nana iwui kahāng khanganā thāda zatakha, Israelwui wungpamkhongli kapama, nawui mahut kashina mavātlakmara, da hāngkahai chi phaningungmichinglu.

¹⁷Chiwui vang eina ara, O PROHO, Israelwui Vare, narao Davidli hāngkahai tui chi ungshung ngasakmilu.”

¹⁸“Kha okathuili Varena mili ngasopamkachangrala? Yanglu, kajuia kala juikhamataia kazingram hi nawui vang teonai; chithākha ina sākahai shim hi kayākha teomei!

¹⁹Chithālala narao ina seihā sāda kapo hi, O PROHO iwui Vare, narao iwui khangakao kala seihā khuisangmida;

²⁰naming leingasakra da nana ngashit kahaipam, shim hishong ngashun ngayā yangrāmida, shim hishong naraona seihā sāda kapo chi kashāmilu.

²¹Narao kala nawui yur Israelnaobingna shim hishong ngareiungda kapo tharan khashāmilu; mha, nawui pam kazingli shakāmida kapheomilu.”

²²“Mi akhana awui khongnainaoli khayon ot sāhaida tuingashit khuikhavai, shim hili kālaga hanphutwui ngalemli tuingashit kākhuiakha,

²³kazingramli nana shakāmida khayonali khayonwui athishurda, khamashungali khamashungwui athishurda bichar sāmilu.”

²⁴“Nali morei kasāwui vang nawui mi Israelli yangkashebingna maikashi mikahai tharan, athumna mai ngareiungda namingli seihā sāda shim hili rāpoakha,

²⁵nana kazingramli shakāmida nawui mi Israelli kapheomilu, kala athumwui avāva̱ ngarāli kala athumli mikahai ngalei chili kathānungmiluilu.”

²⁶“Athumna nawui mangāli morei sāhaida kazing maromila kāngmarānghaida, nana rekakharek tharan, athumna shim hishong ngareiungda namingli seihā sāda athum moreiwui eina ngareiungakha,

²⁷nana kazingramli shakāmida, narao Israel mibingwui morei kapheomilu; kala nana sāngasak khangai chi tamchitheimida, nawui mibingli shimlui sāda mikahai ngalei chili kazing kharotāmilu.”

²⁸“Ram chili zāt kasak atamlila, sākazat nilala, zingkumshāt, majing katāk, khaohsom kala aga̱-akaina shimān khangasak nilala; yangkashebingna keinung keinungli kuinam kahai nilala; mimaokaza̱ nilala, kazātyur khangatatei kakazā atamlila;

²⁹khalattawui kakhanang, kachotkachāng theida, mi akhana nilala, Israel mi saikorana nilala, shim hishong ngareiungda pāng katingda nali kapo chi;

³⁰nawui pam kazingramli shākāmida, kapheomilu; kala mi kachiva̱li kachichāwui kaphaning athishurda sāmilu; (kaja namāngna naongarā kachiva̱wui ning katheina);

³¹chithāda sāda avāva̱ ngarāli mikahai lam chili athumna nali ngacheeda nathi shurda okthuichingra.

³²“Chi tākam eina, nawui mi Israel makhaninga yur katei akhana nawui reikhamatai ming, nawui pangshap, kala pāngthei kharei theida ngalei katāva̱wui eina rāda shim hili seihā kasā tharan,

³³nawui pam kazingramli kashākāmilu, kala yur kateina khangakao chiwui athishurda sāmilu; chithāda okathuiwui miyur saikorana, nawui mi Israelnaobingwui thāda naming theida ngacheera, kala ina sakakā shim hi nawuina kaji athumna theira.”

³⁴“Nana vālu kajipamli nawui mibingna rai akhangarar tharan, nana kapangkhui kahai keinung kala ina sakā kahai shim hili ngareiungda nali seihā sā-akha,

³⁵athumwui seihā kasā kala kapo chi nana kazingli shākāmida athumli khangachonmilu.”

³⁶“Nawui mangāli morei sākahai tharan—kaja khipākha morei makasā maleimana— kala nana athumli malungvāthaida yangkashebingwui pāngli horsangmihaida, chiwui vang athumli tālala nailala tukthuihaiakha;

³⁷athumli narkahaipamli athumna ning ngateida, ‘Ithumna makaphā kala khangui khalāng ot sāhaira’ da hāngda;

³⁸kala athumli tukvā kahai apam chili leilakha ningyāng tongda hāngphatakha kala nana avāva̱ ngarāli mikahai nana hākhui kahai keinungli kala chili namingwui vang ina sākahai shim hili ngareiungda seihā saakha,

³⁹nawui kazingramli shākāmida athumwui seihā kala kapo shāmilu, kala athumli ngachonmilu; kala nawui mangāli morei kasābing chili pheomilu.”

⁴⁰O iwui Vare, “Ara, apam hili seihā kasā saikora theimida kakhuisangmilu.

⁴¹ Ara, O PROHO Vare, na kala nawui pangshapwui oko ngasāmkhui khavaipamli ngasāmkhuimilu. Nawui pāngmonbing, O PROHO Vare, huikhamina chonvai sāranu, kala nawui shitkasangabingna nawui kaphā kasālungli mathānranu.

⁴²O PROHO Vare, nawui thao neomi kahaiya chiwui mai mangareithui ngasakmilu! Narao Davidli mangacheila leishikhami chi kaphaningungmilu.”