Read Tangkhul Naga 2 THOTRINCHĀN 7 Bible Online

2 THOTRINCHĀN 7 - Tangkhul Naga bible

2 THOTRINCHĀN 7

¹Solomonna awui seihā sākup kahai thili kazingramwui eina mei tālaga rikkatāchigat kala pha̱kaphayā chi chuitāhaowa, kala PROHOwui tekhamateina khorumshim chi pemhaowa.

²Kala pāngmonbingna PROHOwui shim chili mazangrarthuwa; khikhalajila PROHOwui tekhamatei china PROHOwui shim chi pemhaowa.

³Israelnaobing saikorana mei chi kala PROHOwui tekhamatei chi shimtungli katā chi kathei tharan, athumna ngaleili ngakhumshāmzangda PROHOli khorumda ningkashi milaga hānga, “Kaja a phālaka, kaja awui makhangachei leikashi leichinga.”

⁴ Chiwui thili awunga kala mi saikorana PROHOwui mangāli pha̱kaphayā chigata.

⁵Awunga Solomonna kachigat sāda mukvā thingmaga̱da khani kala yao lakh akha thingmaga̱ chigata. Chithāda awunga kala mi saikorana Varewui shim chi tharchigata.

⁶Pāngmonbingna athumwui otpamli nganingripa; kala Levinaobingnala Awunga Davidna ngarān kahai PROHOli masot chigat khavai laawui akap-akai singripta ningkashiwui masotlaa sai, kaja awui makhangachei leikashi leichinga kala pāngmonbingna otram khangatha̱ tharan Davidna masot mi, kala pāngmonbingna mibingli mai yangngasungda talla̱ khonga kala Israel saikorana nganingkāsera.

⁷PROHOwui shim alungshongwui yāngkhup chi Solomonna tharchigata; kaja chili ana rikkatā kachigat kala ningyatsharwui athao riktai, kaja Solomonna sākakhui pithraiwui hanphut chi ngazinahaida mapha̱paithuwa.

⁸Atam chili Solomonna phanit shinithang sai, kala Israel saikora awungali ngasoda, haklak kahai kazip, Hamath zangkhavai eina thuilaga Egypt Kong vāshungda khalei mi kazipa.

⁹Athumna hanphutwui dharkat eina phanit shinithang kasāwui vang kachishatathang athumna chingri kahai kazip khui.

¹⁰Kachāng kashinewui maga̱da kakathumathang athum kachiva̱wui ramli shiunserhaowa; kaja Davidli, Solomonli kala awui Israel mibingli PROHOna kaphā sākhamiwui vang ning mathānda ringphālakhaowa.

¹¹ Chithāda Solomonna PROHOwui shimla awungawui shimla kupserhaowa; kala Solomonna sākida ngarān kahai saikora tākam eina kāpeilak eina sākhui.

¹²Chiwui thili chithang ngayā PROHOna Solomonli rāchitheida hānga, “Nawui seihā kasā ina shāhaira, kala apam hi ili pha̱phayā khavaiwui shim sākhavai ina kapangkhuihaira.

¹³Ina kazing khāmong shunghaida kazing marokatā tharan, lah ngalei hili khalei shaikhavai khaohli kagaso tharan, lah iwui mibingwui alungli kazātkashi kashirāt tharan,

¹⁴iwui ming eina hokhui kahaiya iwui mibingna athum khalatta hamsangakha, kala seihā sāda ili phaakha kala athumwui makhayā apongwui eina ili latungakha, ina kazingramwui eina shāmira, kala athumwui morei pheomida athumwui ngaleiwui kazāt raimira.

¹⁵Apam hili seihā kasā saikora ina theimira kala kashāla shāmira.

¹⁶Kaja ara iwui ming hili leiching khavai ina apam hi hākhuida shim hi tharchigathaira; imikyan kala ining atam saikorali hili leichingra.

¹⁷Nawui vanga, navā Davidna kazat thāda iwui mangāli zatakha, ina nali sālu kaji kaso kahahai saikora athishurda iwui ain kala shiyan-chikan mayonakha,

¹⁸navā Davidli ngashitta hāngkahai, ‘Israelli mungkhavai mi mavāt ngasakmara’ da kahāng thāda ina nawui wungpamkhong sakāmira.

¹⁹Kha ina nali mikahai iwui shiyan kala ningkhami mamayonla thuihaida vare khangateili khorumhaiakha,

²⁰ina nali mikahai ngalei hiwui eina kashamhaora; kala imingwui vang tharchigat kahai shim hila iwui mikyanwui eina katāva̱li horhaida mibingwui chānjam kala tantaktui ngasāhaora.

²¹“Kala hiyākha khayākakā shim hi rākhamakān kachiva̱na kashuirakhaida hāngra, ‘Khiwui 8vang PROHOna ngalei hili kala shim hili hithāda shok khangasakkhala?’ jira.

²²Chieina mibingna, ‘Khikhalajila Egyptwui eina athumwui avāva̱ ngarāli thānshok-khame PROHO Vare chili horhaida yur khangateiwui varebingli khoruma kala otram ngatha̱haowa; chiwui vang ana hithāda makaphā saikora hi athumwuitungli khuirā kahaina.’” da hāngra.