Read Tangkhul Naga 2 THOTRINCHĀN 8 Bible Online

2 THOTRINCHĀN 8 - Tangkhul Naga bible

2 THOTRINCHĀN 8

¹ PROHOwui shimla, awui shimla kuphaida kum maga̱ kāshung kahai eina,

²Huramna khami keinung saikora chi Solomonna sakāluishitta Israelnaobingli chipama.

³Solomonna Hamath-zodahli vāda chi akhuiya.

⁴Ana lamhāngli Tadmor sakai kala Hamathli khalei lankazip keinung saikora hi ana sākhuisera.

⁵Ato Beth-horon eina Aze Beth-horonla, pan, ngavei, phākashut sanglaga ngaveikhui.

⁶Baalathla, kala Solomonna sākakhui lankazip khavai keinung, kala siguigari haikhavai, siguiraimiwui pamkhavai, kala ana sākhangai Jerusalemlila, Lebanonlila kala awui wungram ngaleili kachungkha sākhui.

⁷Miyur saikora, Hitnao, Amornao, Periznao, Hivnao, Jebusnao, notha kahaibing Israel makhaninga,

⁸Israel mibingna masāthatngakanla taimi kahaibingwui ara̱-azā athum hili Solomonna thoukai phungngasaka, kala aja eina tangda phungda lei.

⁹Kha Solomonna Israelnaobingle thoukai maphung ngasakmana: athumva raimi, awui otva̱a, kala awui siguigariwui kala siguiraimiwui kathāna sāngasaka.

¹⁰Mibing hi Awunga Solomonwui khareiya otva̱bing sāda, athum shākhani hangphangāna mibingwuitungli pangshap singda yangkhame sai.

¹¹Apreiva̱ Pharaohwui naongalāva̱li Davidwui keinungli mahailuila awui vang sākhami shimli khuiunga; kaja “PROHOwui ningkhami Oko khalei pam chi katharana, chiwui vang eina Davidwui keinungli ipreiva̱ mapampaimara” da hānga.

¹²Shimphowui mangāli sākahai hanphut chili Solomonna rikkatā hanphut chigata;

¹³thang-thangwui sāki kaji Mosesna kaso kahai athishurda, sabbaththang, changwokthang, kala kumkhali kathum shida phanit, khawok makazang khamui phanit, haptābingwui phanit, kala tabernaclewui phanit chili chigata.

¹⁴Avāva̱ Davidwui shiyan-chikan athishurda ana pāngmonbing khumkhum eina athumwui otpamwui vang phāsanga, kala Levinaobingna, thangthangwui otsinwui vang pāngmonbingwui mangāli otram khangatha̱ kala masot mikhavai, kala ngavei kachungkha chili mayon khavai khumkhum eina kapangsanga; kaja hi Varewui mi Davidna kaso kahaina.

¹⁵Pāngmonbing, Levibingli awungana kaso kahai ot saikora, lansinwui pongli nilala akhanida makailakmana.

¹⁶Chithāda sāda Solomonna PROHOwui shim chi shimphunga haokaphok eina thuida masākupranglakha thangthangwui chi sāda saikora sakupa. Chiwui vang PROHOwui shim chi sākuphaowa.

¹⁷Chiwui thili Solomonna Edom ngaleiwui ngayipheili khalei Ezion-geber eina Elothli vai.

¹⁸Kala Huramna awui marikhong huikatheibingli chihoda marikhong khuivāmi ngasaka. Athumna Solomonwui raobingli ngasoda Ophirwui eina sinā kg. thingtharāda phangā awunga Solomonli khuiungmi.