Read Tangkhul Naga 2 THOTRINCHĀN 9 Bible Online

2 THOTRINCHĀN 9 - Tangkhul Naga bible

2 THOTRINCHĀN 9

¹Solomonwui mingkhamayāng chi Shebawui awungva̱na shālaga, Solomonli kasasaka ngahān khavai, rao kachungkhali thānphunglaga utbingna nganamkaphā otyur, sinā kala aman kasaka ngalung kachungkha khuiphungda Jerusalemli vai. Ana Solomonli samkaphang tharan awui ningli khalalei saikora angahāna.

²Awui khangahān saikora Solomonna ngahānkāmisera; Solomonwui eina ali mangahānkākharar thumkahai khikhala maleisāmana.

³Shebawui awungva̱na Solomonwui thangmei, ana sākahai shim,

⁴awui kashakazā, kathānabingwui otpam, raobingna otram khangatha̱, athumwui sāri, awui khorkhong singmebing kala PROHOwui shimli rikkatā kachigat, saikora chi theilaga awungva̱ khakshingakhaowa.

⁵Awungva̱na hānga, “Nawui otsak kala thangmei, iramli leilakha ina kashā rākahāng saikora mashunglaka,

⁶kha imik eina marātheiranglakha eina tangda kahāng kashā chi mashitsangsāmana; yanglu, nawui thangmeiwui hakkhamahā tangkhai ili mahangrangsai; ina shākasapāli nana henmei.

⁷Napreiva̱ ngarāwui khamahai! Kala nawui mangāli nganingda thangmei tui kashā samphangda khalei nawui raobingwui ringkaphā!

⁸Nawui PROHO Varewui vang awunga sāngasakta awui wungpamkhongli pamkhangasaka kala nawui otsakli kapen khalei nawui PROHO Vareli sochikatranu! Khikhalajila nawui Varena Israelli leishihaoda athumli katang mavaila sakāmi khavai, nana khangarong kala mashun chi singmi khavai athumwuitungli awunga sāngasakhaira.”

⁹Chiwui thili ana awungali sinā kg. thinghangmati nganamkaphā otyur kala aman kasak ngalungla kachungkha mi; Shebawui awungva̱na, Awunga Solomonli khami nganamkaphā otyur chikathā maleilakranga.

¹⁰Chili lāngda Ophirwui sinā khuikhaung Huram eina Solomonwui raobingna algumthing kala aman kasaka ngalungla khuiunga.

¹¹Kala awungana algumthing eina PROHOwui shimlila awui shimlila chonchak sāsanga; kala laa kasābingwui vang lyre, tingteilāla sākhui; hikathā ot Judah ngaleili matheilakrangsai.

¹²Kala Shebawui awungva̱na ningkachāng saikora awunga Solomonna mi, ana khuikharāli lāngda awungva̱ china ningkachāng saikora mi. Kala awui raobingli ngasoda aramli latunghaowa.

¹³Chitharan kumkhali Solomonna samkaphang sinā kg. thingmaga̱da kathumna,

¹⁴chili lāngda leih kasābingna kala Arabiawui awungabingna, kala ngalei khamungabingna sinala, lupāla Solomonli khuirāmisera.

¹⁵Awunga Solomonna sinā eina shaokakhui chāngvei kahahakva̱ shākhani sākhui; chāngvei ava̱va̱ kasāli sinā kg. shini sha̱kha zanga.

¹⁶Kala sinā kg. kathum sha̱kha kazanga chāngvei shākathumla sākhuilaga saikora chi Lebanon Ngahong shimli haihai.

¹⁷Awungana mafahāwui wungpamkhong kahakva akhala sākhuilaga sinā heirormithai.

¹⁸Wungpamkhong chiwui chonchak tharuk kala pheinai akha, sinā eina saserda wungpamkhongli sāshana. Wungpamkhongwui uishong yāshong pāngpo kai, kala pāngpowui ngalemli kazingkha̱ khani runghai,

¹⁹chonchak tharuk chiwui lākharip kazingkha̱ akharip runghaida chonchak tharukwui kazingkha̱ tharāda khaniya. Hikatha ot wungram kachilikha masālakmana.

²⁰Awunga Solomonwui mangkhavai khorkhong saikora sināmang eina sai, kala Lebanon Ngahong Shimwui khorkhong saikora sinā kachangamāng eina sai; Solomonwui atamli lupāsā hi khikhakhana da makhuimana.

²¹Kaja awungawui jahas Huramwui raobingli ngasoda Tarshishli chihovāda kakathuma kum kachida Tarshishwui jahasna sinala, lupāsāla, mafahāla, nāyongla, yongyingkuila khuiungchinga.

²²Chithāda sāda lanwui ponglila, thangkhameiwui ponglila okathui awunga saikorali Awunga Solomon kathā maleisāmana.

²³Varena Solomonwui ningli sangmi kahai thangmei chi nganā khavai okathuiwui awunga saikorana awui ngalemli vāngai.

²⁴Kala khavā kachiva̱na, sinā, lupāsā, kashankachon, myrrh, nganamkaphā thao yur ayāyāva̱, sigui, gadhā, kachungkha kum kumli khuirāmi.

²⁵Solomonwui sigui kala siguigari haikhavai shim thingmati, kala siguiraimi thingtharāda khani lei: athumli siguigariwui keinungli kala awungali ngasoda Jerusalemli pamngasaka.

²⁶Kala Euphrates eina thuilaga Philistia ngalei, Egyptwui thari tāshungda awunga saikorawuitungli ana munga.

²⁷Kala awungana Jerusalemli, lupāsā lunggui thāda singnganaowa, kala cedarthingla Shephelahwui sycamore thāda sorngasaida singngasaka.

²⁸Kala Solomonwui vang Egypt kala apam kachiva̱wui eina sigui alokhui.

²⁹Ara Solomonwui otsak khangatatei, khare eina thuilaga khanao eina tangda, marān Nathanwui khararchānli, Shilonpa Ahijahwui khamarān tuili, kala Nebatwui naomayara Jeroboamwui pongli marān Iddowui khamahāli makapiserhaimala?

³⁰ Israel saikorawuitungli Solomonna Jerusalemli kum hangmati munga.

³¹Solomon thihaoda avāva̱ Davidwui keinungli chifahaowa, kala anaomayara Rehoboamna awui mahut thuishina.