Read Tangkhul Naga EZRA 1 Bible Online

EZRA 1 - Tangkhul Naga bible

EZRA 1

¹Persiawui awunga Cyrusna pānkhare kum, Jeremiahwui khamor eina hāngkhangasak PROHOwui tui chi ungshung khavai, PROHOna Persiawui awunga, Cyruswui ning ngatha̱ ngasaka; chieina awui wungram saikora vāshungchaoda ana pao akha chishāta, kala chi kakapila kapi:

²“Persiawui awunga Cyrusna kahāngna: Kazingramwui Vare PROHO china okathuiwui wungram saikora mungkhavai ili mihaira, kala Judahli khalei Jerusalemli awui shim akha sākhavai ili kasohaira.

³Awui mibing nathum saikorali Varena ngasomiranu. Jerusalemli khorumda khalei Vare, Israelwui Vare PROHOwui Khorumshim Jerusalemli ungda nathumna sakāluishitlu.

⁴Raithā kahaipamli leida khalei awui mibingna latung khavaiwui vang khangachon ningchāngakha, athumwui khongnainaobingna ngachonmiranu. Athumli sinā lupā eina, kala ot, sha̱kei einala ngachonranu, chili lāngda Jerusalemli khalei Varewui shim chiwui vang kachichāwui mikhangai chi chigatranu.”

⁵Chiwui thili Judah eina Benjaminwui shangwui akhavābing, pāngmonbing eina Levinaobing kala Varena ningli kasatmida saza̱khami kachiva̱na Jerusalemli khalei Varewui shim chi sākālui khavai zata.

⁶Athumwui khongnai saikorana, kachichāwui kachigat chili lāngda lupāsāwui khorkhong, sinā, otyur eina sha̱kei, kala aman kasasak ot, lemmet eina khamiwuitungli sangkhamina.

⁷PROHOwui shimwui khorkhong Jerusalemwui eina Nebuchadnezzarna phungthuihaida awui khorumshimli haikasā chibingla Cyrus awungana khuishokmi.

⁸Lan kazipme Mithredathwui pāngwui eina Persiawui awunga Cyrusna otbing chi khuishokta Judahwui wungnao Shesh-bazzarwui pāngli shānsangmi.

⁹Otbingwui mashing chiya: Sināwui khongsai thingkha, lupāsāwui khongsai thingkha, meikhong maga̱da chiko,

¹⁰sināwui koklui thumrā, lupāsāwui koklui thingkhani shāmatida tharā; khangatatei khorkhong thingkha;

¹¹kala sināwui, lupāsāwui khorkhong saikora kaziplaga thing phangā shāmati hangtharukta chikona. Raithā kahaibingli Babylonwui eina Jerusalemli khuikhaung tharan, Shesh-bazzarna otbing chi khuiunga.