Read Tangkhul Naga EZRA 3 Bible Online

EZRA 3 - Tangkhul Naga bible

EZRA 3

¹Kachāng kashine kharā tharan, Israelwui naomayarabing keinungli khaleibing china khokkha sāda atang akha eina Jerusalemli kazipa.

² Chiwui thili Jozadakwui naomayara Jeshuali ngasoda avānao pāngmonbing, kala Shealti-el wui naomayara Zerubbabelli ngasoda ashibing hanphut akha sakai, Varewui mi Moseswui ningkhamili hāngkahai athishurda rikkatā hanphut akha sakai.

³ Apam chiwui mibingli khangacheewui vang athumna hanphut chi khangachāwui apamli sakāmi, kala hanphut chili ngathor ngazinwui rikkatā kachigat chi chigata.

⁴ Kapi kahai athishurda, athumna Tabernaclewui zātkhān chila mayona, kala thangthang sāphalungki kaji chi sharphahorwui athishurda sāching kaji mashing eina chigatchinga,

⁵ kala chiwui thili khamatak maleila rikkatā kachigat, changwokli kachigat, kala PROHOwui langchin sākahai phanit saikora, kala kachichāna PROHOli mikhangaiwui kachigat miya.

⁶Kachāng kashinewui kharethang eina thuida PROHOwui mangāli athumna rikkatāchigat chigatchinga. Kha PROHOwui Khorumshimwui shimphunga masārangsai.

⁷Chieina athumna ngalung mistri eina thing mistribingli pheisā mi, kala Persiawui awunga Cyrusna athumli mayākhami athishurda, Sidon eina Tyrewui mibingli Lebanonwui eina Joppali cedarthing shamadrutungli khuiung khavai ra̱shakshirei kala thao mi.

⁸Athumna Jerusalemli Varewui shimli ungda kum kakhanewui kachāng kakhaneli, She-alti-elwui naomayara Zerubbabel eina Jozadakwui naomayara Jeshua, achinā ngarā, pāngmonbing kala Levi kala raithā kahaiwui eina Jerusalemli hankhaung saikorali ngasoda ot sāphoka. Kala Levinaobingwui ngachaili kum maga̱wui eina atungbing saikora Varewui shim kasā chili yangmi khavai kapangsanghaowa.

⁹Jeshuana naomayarabing kala theisābing, Kadmi-el eina anaomayarabing, Judahwui naomayarabingli ngasoda Varewui shim kasā mibing chili yangmi; chili Henadadwui kala Leviwui naomayarabing kala athumwui naomayarabing eina theisābing zangda yangngaruma.

¹⁰ Kala shim kasābingna PROHO shimwui shimphunga sāphokthang, pāngmonbingna athumwui sāri shaksāda talla̱ singlaga rai, Levinaobing, Asaphwui naobingna kortar singda Israelwui awunga Davidna hāngkahai athishurda PROHOli sochikat khavai rai;

¹¹ kala athumna PROHOli ningkashi khami eina laasak ngasha̱da ngatakta masot chikata, “Khikhalajila a kaphāna, kaja awui makhangachei leikashi Israelli mahorhailakmana.” Kala athumna PROHOli masotkhami tharan mi saikorana panglāk eina vaoshoka, khikhalajila athumna PROHO shimwui shimphunga sākuphaowa.

¹²Kha khare shim chi theikahai pāngmonbing, Levinaobing, kala avāva̱ ngarā shimkhurwui khararnaobingna shimphunga sākup kahai chi kathei tharan, kachungana khamathānwui vang panglāk eina vaoshoklala athumna panglāk eina vaoda chapa;

¹³chiwui vang eina mibingna kachap khonwui eina khamathān khon khangatei matheirarthuwa, kaja mibingna panglāk eina vaokshokta akhon chi katāva̱lila shāvai.