Read Tangkhul Naga EZRA 4 Bible Online

EZRA 4 - Tangkhul Naga bible

EZRA 4

¹Chitharan Judah eina Benjaminli yangkashebingna raithā kahaiwui eina latkhaungbingna Israelwui Vare PROHOwui shim sāda lei kaji kashā tharan,

² Zerubbabel kala avāva̱ ngarā shimkhurwui akuibingli athumna asamphanga, kala “Ithum sakrumsa, kachiwui vangkhala jilaga Assyriawui awunga Esar-haddonna ithumli hili khuikharā eina thuida nathumna khokharum thāda ithumla nathumwui Vareli khorumsai” da ahānga.

³Kha Zerubbabel, Jeshua, kala Israelwui shimkhurwui avāva̱ ngarāwui akuibingna athumli hānga, “Ithum Varewui vang shim kasāli nathum khikha zangkhavai maleilakmana; kha Persiawui awunga Cyrusna kaso kahai thāda Israelwui Vare PROHOwui shim ithummāngna sāra.”

⁴Chieina ngalei chiwui mibingna Judahwui mibingli ning suitā khavai sālaga shim chi masāleng khavai hāngmachita,

⁵kala Persiawui awunga Cyrusna munglakha eina thuilaga Persiawui awunga Dariuswui khamung eina tangda athumwui kharin chi maungshung khavai thangkhamei mi phāsanglaga hapkhano ngasaka.

⁶Ahasu-erusna mungkaphok atamli, athumna Judah eina Jerusalemli kapāna mibingli phenda ali lairik kapiya.

⁷Kala Ar-ta-xerxeswui atamli Bishlam, Mithredath, Tabeel kala athumwui ngasotnao kateibing zangda Persiawui awunga Ar-ta-xerxesli kapiya; kala chithi chi Aramaic tui eina kapilaga khalatshoka.

⁸Raithāna Rehum eina kapime Shimshaina Jerusalemwui mibingli makhamayā chithi akha awunga Ar-ta-xerxesli hithāda kapi—

⁹raithāna Rehum eina kapime Shimshai kala athumwui ngasotnao khaleibing, bichar akhavābing, lammungabing, otva̱bing, Persianaobing, Erechwui mibing, Babylonnaobing, Susawui mibing chiya, Elamnaobing,

¹⁰kala yur khangateibingli, khangama Osnapparna kashamhaida Samaria keinungbingli vākapam yurbingli, kala Kong makānda khalei ngaleiwui mibing saikorana kakapi chithi kachiphun chiwui namkakhui chi hina—

¹¹“Awunga Ar-ta-xerxesli: narao Kong Makānda khalei ngaleiwui mibingna shālam hāngchiphunli.

¹²Nawui eina ithumwuili kharā Jehudibing Jerusalemli vāhaira kaji awungana katheimilu. Athumna makaphā kala ngakaikashi keinung chi sakāluida lei. Shimphunga sakhuiluida phākho kupki jihaira.

¹³Awungana hi theimilu, kaja keinung hi sakāluida phākhobing chi kuphaikha athumna shai, khajana, shongfa kanung-kanvā kasāwui pheisā mamiluimara, chieina wungnaowui shaibing shimān ngasakhaora.

¹⁴Awungawui eina ithumna machi kasathei kashai samphanglaga, awungawui maishi khavai khalei chili ithumna mayangpampaimara, chiwui vang awungali pao hi kachishātna,

¹⁵navā ngarāwui kapi kahai athishurda lairik nana kaphākhuimilu. Lairik hili yangakha nana samphangra kala theikhuira, kaja khare kachāng eina thuida keinung hi rai sakazara, awungabingli kala athumwui ngaleili khanang khangasaka, kala achālakhawui eina khonzār khangasaka akhana. Chiwui vang keinung hi shimān ngasak kahaina.

¹⁶Hi awungali kachitheina kaja keinung hi sakāluida phākhobing hi sākhuihaiakha, Kong makāndawui ngalei hi nawui awunga ngalei mangavāluimara.”

¹⁷Awungana ngahānkai: “Raithāna Rehum eina kapime Shimshai, kala Samariali khaleibing kala Kong Makānda khalei athumli shālam hāngli,

¹⁸“Nathumna ithumli chithi kachiphun chi iwui mangāli tharlak eina pāhaira.

¹⁹Ina kakaso athishurda phāyanghaira kala hithāda samphanga kaja khare kachāng eina thuida keinung hiwui mina awungabingli makhamayā ngakaikashi kala khonkazar kachungkha shokhaira.

²⁰Kala kapanga awunga kachungkha Jerusalemli mungda Kong makānda khalei ngaleilila khamungwui vang shaila, khajanāla, shongfawui shaila misai.

²¹Chiwui vang eina iwui kakaso masamphangranglakha eina tangda keinung hi masāpaimara da hānghaolu.

²²Atam mashimān ngasakalu, awungali saza̱ khavai khisāda hitha ngasakrakhala?”

²³Awunga Ar-ta-xerxeswui chithi chi Rehum eina kapime Shimshai kala athumwui ngasotnao saikorawui mangāli pālaga thaklāk eina vāda Jerusalemli khalei Jehudinaobingli pangshap eina ot chi ngasām ngasakhaowa.

²⁴ Chieina Jerusalemli sāda khalei Varewui shimwui ot chi ngasāmhaowa; kala Persiawui awunga Dariuswui khamung kakhane kum makāshungranglakha eina tangda chi ngasāmhaowa.