Read Tangkhul Naga EZRA 5 Bible Online

EZRA 5 - Tangkhul Naga bible

EZRA 5

¹ Chitharan marān Haggai eina Iddowui naomayara Zechariahna Judah eina Jerusalemli khalei Jehudibing, athumwui alungli khaleibingli Israelwui Varewui ming singda marāntui phongmi.

² Chieina She-alti-elwui naomayara Zerubbabel eina Jozadakwui naomayara Jeshuana Jerusalemli khalei Varewui shim chi sāphoklui, kala Varewui marānbingna ngachonmi.

³Atam chitharan Kong makānda khalei ngaleiwui lammunga, Tattenai eina Shethar-bozenai kala athumwui ngasotnaobingna rāda athumli hithāda hānga, “Khipāna nathumli shim hi sākhavai kala phākho hi khaningkā khavai kakaso mikhala?”

⁴Kala “Shim kasābingli aming khi homameikhala?” da athumli ngahāna.

⁵Kha Jehudi ararbingwuitungli Varena ngasomi, kala Dariusli pao vāshungda hiwui pongli awui chithi eina ngahankakā mahanungranglakha eina tangda ot kasā athumli makhāmana.

⁶Kong makānda khalei ngaleiwui lammunga Tattenai kala Shethar-bozenai eina Kong makānda khalei awui ngasotnao lammungabingna awunga Dariusli chithi chiphunvai;

⁷kala chithi chili hithāda kapi: “Awunga Dariusli chingrihairanu.

⁸“Reikhamatai Varewui shim kasapam Judah ngaleili ithumna ayanghaira da awungali chitheikhangaina. Ngalung kahahak khorlaga sāda lei, phākhola thing eina ngaveida lei; athumna makhunlak eina sāda mangā vālak eina lei.

⁹“Chieina ithumna ararnaobingli, ‘Shim hi sākhavai kala kupkhavai khipāna kakaso mikhala?’ da angahāna.

¹⁰Kala athum kathānbingwui mingla kapikhuilaga nali unghang khavai ngahānkhui.

¹¹“Kala athumna hithāda ngahānkai, ‘Ithum kazing eina okathuiwui Varewui raosera, achālakha Israelwui kahaka awunga akhana sākup kahai shim chi ithumna sākālui kajina.

¹² Kha ishāvā ngarāna kazingwui Vareli malungvāt khangasakwui vang Babylon awunga Nebuchadnezzarwui pāngli horsangmihaoda Chaldeanaobingna sakazamserhailaga mibing chi Babylonli tukvāser kahaina.

¹³ Chithālala Babylonwui awunga Cyrusna mungkhare kum, Varewui shim hi sakāluiphalungra da awunga Cyrusna kakaso mihaira.

¹⁴Kala Nebuchadnezzarna Jerusalemli khalei Khorumshimwui eina Babylon kameo shimli khuivā kahai, sinā, lupāsāwui khorkhong saikora awunga Cyrusna Babylon kameo shimwui eina khuishokta Shesh-bazzar kaho ana lammunga sākhangasakawui pāngli sangmi,

¹⁵kala ali hithāda hānga; “Khorkhongbing hi khuilu, Varewui shim Jerusalemli khalei apam chili vahailu, kala Varewui shim chi chiwui apamli sakāluilu.”

¹⁶Chithāda Shesh-bazzarna unglaga Jerusalemli khalei Khorumshim chi shimphunga sakai; kala chiwui eina thuida aja eina tangda sāda khalei hina, kakupla makupranga.’

¹⁷“Chiwui vang eina, awungana mayāmiakha Varewui shim Jerusalemli khalei chi sākālui khavai awunga Cyrusna kakaso mika mamimakhala kaji theikhavai awungawui dolanli khalei lairikbing chi phāyang ngasaklu. Laga hiwui pongli awungawui ningkachāng chi ithumli kahāngmiranu.”