Read Tangkhul Naga EZRA 6 Bible Online

EZRA 6 - Tangkhul Naga bible

EZRA 6

¹Chieina awunga Dariusna hukhum akha mida, Babylonli khalei shim, apong saikora kapi kahai lairikbing kazip khavaipam chili phāyang ngasaksera.

²Mediawui keinung Ecbatana kaho chili lairik akhalui akha samphanga, chili hithāda kapihaisai: “Record akha.

³ Cyrus awungawui khare kum, awunga Cyrusna kakaso akha mishoka: Jerusalemli khalei Khorumshimwui pongli, pha̱kaphayā kachigat, rikkatā kachigat khuirā khavai shim chi apam chili sākāluiranu; kajui khuining hangtharuk, kapāk khuining hangtharuk,

⁴kahahak lungphek ngaher kathum kala thing ngaherkha da ngaphora, kala chiwui aman awungawui lanshim eina mira.

⁵Kala sinā, lupāwui khorkhong Jerusalemli Khorumshimwui eina Nebuchadnezzarna Babylonli khuiung kahai chi hanmiluida Jerusalemli khalei Khorumshimli ichichāpamli hailuilu; nathumna chibing chi Khorumshimli haira.”

⁶“Chiwui vang eina Kong Makāndawui lammunga Tattenai, Shethar-bozenai, kala nathum ngasoda Kong makāndawui ngaleili lammunga kasābing, nathum masheikhautlu;

⁷Varewui shimli sāda khalei ot chi thāda sāranu; Jehudiwui lammunga kala ararnaobingli Varewui shim chi awui khangachā apamli sāranu.

⁸Chili lāngda Varewui shim sakākhaluiwui vang Jehudiwui ararnaobingli athumna kathāda sara̱khala kaji ina kakaso khamina, kaja mibing hili ngalangman ngalāngda peilaga miphalungra. Hi awungawui shai Kong Makanda khalei ngaleiwui samkaphang chieina mira.

⁹Chili lāngda sākhavai khalei mukkāla, yaovāla, kazingramwui Vareli rikkatā chigat sākhavai, kehula, machila, drakhārala, thaola Jerusalemli khalei pāngmonbingna sākhavai saikora, thangthangwui chi mashoila miphalungra,

¹⁰chithāda sāda athumna kazingramwui Varewui mangāli ningyāngkhaung pha̱kaphayā chigatta awunga eina anaomayarabingwui mirin ringphākhavai pomiranu.

¹¹Kala iwui kakaso hila khamina kaja kachikathāna kakaso mikahai hi ngachei ngasakakha, awui shim eina khangen sutkhuida ali shaoshānra, kala awui shim thuikhanam horsang khavai pam ngasāra.

¹²Kala Jerusalemli khalei Varewui shim chi shimān khavai kasā, maningakha kakaso hi ngachei khavai pāng thara̱kasang awungabing, maningakha mibingli apam chili awui ming somkhangasaka Varena shimān ngasakranu. Darius ina kakaso hi kasāna; hi makhunglak eina sāranu.”

¹³Chieina Kong Makandawui lammunga Tattenai eina Shethar-bozenai kala athumwui ngasotnaobingna awunga Dariusna chiphunkharā chiwui athishurda ningsanglak eina sai.

¹⁴ Kala marān Haggai eina Iddowui naomayara Zechariahwui khamarān athishurda Jehudi ararnaobingna shim chi sākāda mangāvalakhaowa. Kala Israelwui Varena kakaso athishurda kala Persiawui awungabing Cyrus, Darius kala Ar-ta-xerxeswui kakaso athishurda shim chi sākuphaowa;

¹⁵kala awunga Dariusna khamung zingkum katharukawui marun kachāng kakathumathang shim chi kuphaowa.

¹⁶Kala Israelwui mibing, pāngmonbing, Levinaobing, kala raithā kahaiwui eina latkhaungbing saikora Varewui shim sākakupwui dharkat phanit mathānthup mayona.

¹⁷Kala Varewui shim dharkat phanitli mukkā shākha, yaovā shākhani, yaonao shāmati, kala Israel saikorawui vang suihamshar sākhavai Israelwui shang mashing athishurda me tharāda khani chigata.

¹⁸Kala Moseswui lairikli kapi kahai thāda Jerusalemli Varewui otram ngatha̱ khavai athum pāngmonbingli kala Levinaobingli kachichāwui otpamli ngateida pamngasaka.

¹⁹ Kala raithā kahaiwui eina latkhaungbingna makānkhami phanit chi kachāng kharewui zimiksho tharāda khamatethang mayona.

²⁰Kaja pāngmonbing eina Levinaobing ngarumda athum khalatta tharmatheng ngasaka, athum tharserhaowa. Chieina raithā kahaiwui eina latkhaungbingwui vang, athum ngasotnao pāngmonbingwui vang, athum khalattawui vang makānkhami phanitwui yaonao taithata,

²¹raithā kahaiwui eina latkhaungbing kala yur khangateibingwui khamakhaowui eina pākthuida Israelwui Vare PROHOli khorumkida yāmshok kahai mi kachiva̱na shai.

²²Kala athumna khawok makazang khamui zātkhān chi ringkaphā eina ngasoda shinithang mayona; kaja PROHOna athumli ringphā ngasaka, kala Israelwui Varena, awui shim kasā chili athumli ngachon khavai Assyriawui awungawui ning ngacheimiwaowa.