Read Tangkhul Naga EZRA 9 Bible Online

EZRA 9 - Tangkhul Naga bible

EZRA 9

¹Ot sakupser kahaiwui thili otva̱bingna ili hithāda rāhānga, “Israelnaobingla, pāngmonbingla, Levinaobingla ngalei hiwui Canaannaobing, Periznaobing, Jebusnaobing, Ammonnaobing, Moabnaobing, Egyptnaobing kala Amornaobingna kasā ningkakachai otwui eina athum khalatta mapākrarthuwa.

²Kaja athum kaikhana, athum kala naomayarabingwui vang preiva̱ngarā sākhavai hiwui ngalā ngakhothaira; chiwui vang kathara yur hi ngalei hiwui yurbingli manātkharomserhaira. Kala shitkasang makhalei ot hikathā hi otva̱bing eina khareibingna mataimeikapta sāhaira.”

³Tui chi kashā tharan, I wukkhanangnāhaida iwui kachonla, pha̱honla serkhāklaga ikuisamla, morhāla maokazampama.

⁴Chieina raithā kahaiwui eina latkhaungbingna shitkasang makhalei ot kasā chiwui vang Varewui tui kashābingna malungringda ngazinwui pha̱kaphayā masāranglakha eina tangda iwui ngalemli rākazipa.

⁵Kala ngazinwui pha̱kaphayā atamli kakhum eina iwui kachon phahon kakāk chi ngavaida pāng tarāmda iwui Vare PROHOli hānga,

⁶“O iwui Varivara, nawui mangāli imai ngareikākida khayakhaowa, kala vaishihaowa, iwui Varivara, kaja ithumwui khayonkhamāng ithumwui kui kānkāhaira, kala morei kazingram kāzokhaira.

⁷Awo-ayi thot eina thuida aja eina tangda khayon hakmahālaka; kala ithumwui khayonkhamangwui vang, ithumla, awungabingla, ithumwui pāngmonbingla, ngalei khangateiwui awungabingwui pāngli horsangmihaida raighai eina sākathat, phātopli tukkhavā, sākakhayāng, kala maishi khangasak aja eina tangda leili.

⁸Kha kasha̱nakhawui vang PROHO ithumwui Varena lukhamashan chitheimida mimazum ithumli taishokmi, kala katharapamli ithumli ngakkhui ngasakta narkahaiwui eina thuimathuk ngasakta ithumwui PROHOna ithumwui mik mathing ngasakra.

⁹Kaja ithum narkahaiya mina, chithālala Varena ithumli mahorhailakmana, kha awui makhangachei leikashi ithumli tāshungmida Persia awungawui mangāli ithum Varewui shim sākhavai, ja̱tā kahai chi sākālui khavai mathuk ngasakmi, kala Judea eina Jerusalemli ithumli nganingkhammi.

¹⁰“Ara, O ithumwui Vare, hiwui thili ithumna khi hāngrakhala? Kaja ithumna nawui ningkhami mamayonthura,

¹¹narao marānbingli nana, nathumna vāda akhuiki kaji lam chi apam chiwui mibingwui khamakhao china ngalei chi mathar ngasakthura; athumwui makathar ningkakachai china haokaphokwui eina akatangli chipemhaira.

¹²Chiwui vang eina nanao ngalāva̱ ngarā, athumwui naomayarabingli mavālei ngasakalu, athumwui naongalāva̱bing nilala nanao mayarabingwui vang makhuipaimara, kala chingri kahai mayākasang, nathum pangshap shokmei khavai, ngalei chiwui heithei zākhavai, kala nanaomayarali katang makhavai shimlui haimi khavai maphālakalu” da hāngngasaka.

¹³Ithumwui makaphā otsakwui vang, kala khangui khalāngwui vang ithumli rāshok kahai saikorawui thili, ithumwui Vare, nana ithumli kashong ngavengmida mimazum sāda shākmi,

¹⁴chithālaga ithumna nawui ningkhami kailuida ningkakachai kasā miyur hili ngalā ngakhotrala? Nana ithumli malungvātta mimazum akhala mashākla mamutchao ngasakmarala?

¹⁵O PROHO Israelwui Vare, nava khamashungana, kaja aja hithāda khalei nana ithumli yāmshok ngasakta shākmi. Yanglu, nawui mangāli ithum yonda lei, hiwui vang nawui mangāli khipākha manganingrarmana.