Read Tangkhul Naga NEHEMIAH 1 Bible Online

NEHEMIAH 1 - Tangkhul Naga bible

NEHEMIAH 1

¹Hacaliahwui nao Nehemiahwui tuina. Zingkum khamaga̱ kum, Ngaphei kachāng; ina Susa keinungli pamlakha;

²ichina Hananina Judahwui mi kaikhali ngasoda rārāsai; kala ina raithā kahaiwui eina ngathishok kahai ringda khaleibingwui pongli, kala Jerusalemwui pongli athumli ngahāna.

³Kala athumna hānga, “Raithā kahaiwui eina ngathikashok ngalei chili ringda khaleibing ringshilāk eina kala simasailak eina okthuida lei; Jerusalemwui phākhola shaokhaitāmiserhaira, kala ngaveila mei sa̱tāmiserhaira” da hānga.

⁴Tui chi kashā eina ina pamzangda chapa, kala zimiksho kasāngkhawui vang sifapama; ina kazingramwui Vareli kakhum eina seihā sapama.

⁵Kala ina hānga, “O PROHO, kazingramwui Varivara, reikhamataia kala khangachee khangachā, awui ningkhami mayonda ali leikashibingli makhangachei leikashi kala awui tuingashit eina mayonkhame Vare;

⁶nawui rao Israel mibingwui vang nawui mangāli naraowui seihā, arui ina seihā sāda khalei hi nakhanāna shāmiranu, kala namikna theimiranu, nali mamayāmada ithumna morei sākahai nawui rao Israel mibingwui morei ina hāngphatta ngashun ngayā mateila seihā kasā hi. Mha, I kala ishāvāwui shimkhurna morei sāhaira.

⁷Nali ithumna maphālakla sāhaira, kala narao Mosesli kaso kahai nawui ningkhami, ain kala shiyan-chikan mamayonthuwa.

⁸Kaphaningungmilu, narao Mosesli kasoda hāngmi khangasak, ‘Nathumna ning tongda mashitsangakha, ina mibingwui ngachaili yaoyāngmihaora;

⁹kha nathumna ili latungda iwui ningkhamibing chi mayonda ithi shurakha, tāmeikap kaji kazingramli kashamvā haisālala, chiwui eina iwui ming chili leikhavai ina kapangkakhuipam chili kazipkhuida khuiungluira.’

¹⁰“Athum nawui raobingna, nawui reikhamatai pangshap kala kapanga pāng eina ngatangkakhuia nawui misera.

¹¹O PROHO, naraowui seihā kasā, kala nawui mingli khangacheeli khamathāna naraobingwui seihā kasā nāshungmilu; aja naraoli ungshung ngasakmilu, kala mi hiwui mikyanli naraoli lukhamashan milu.” Chitharan ina awungawui khorām singme sāsai.