Read Tangkhul Naga NEHEMIAH 12 Bible Online

NEHEMIAH 12 - Tangkhul Naga bible

NEHEMIAH 12

¹Hi She-alti-elwui nao Zerubbabel eina Jeshuali ngasokhaunga pāngmonbing kala Levinaobingna: Seraiah, Jeremiah, Ezra,

²Amariah, Malluch, Hattush,

³Shecaniah, Rehum, Meremoth,

⁴Iddo, Ginnethoi, Abijah,

⁵Mijamin, Ma-adiah, Bilgah,

⁶Shemaiah, Joiarib, Jedaiah,

⁷Sallu, Amok, Hilkiah, Jedaiah. Hibing hi Jeshuawui atamli leikasā pāngmonbing kala athumwui achinā ngarāwui akhokabingna.

⁸Kala Levibing: Jeshua, Binnui, Kadmi-el, Sherebiah, Judah, kala Mattaniah, achinā ngarāli ngasoda ningkashi khamiwui laa kasāli thānmi.

⁹Kala Bakbukiah eina Unno athumwui achinā ngarāna kāroda nganinga.

¹⁰Jeshuana Joiakimwui avāva̱na, Joiakimna Eliashibwui avāva̱na, Eliashibna Joiadawui avāva̱na.

¹¹Joiadana Jonathanwui avāva̱na, kala Jonathanna Jaddu-awui avāva̱na.

¹²Kala Joiakimwui atamli pāngmonbingwui avāva̱ ngarā shimkhurwui wungva̱bingna: Seraiahshiwui Meraiah; Jeremiahshiwui Hananiah,

¹³Ezrashiwui Meshullam; Amariahshiwui Jehohanan;

¹⁴Malluchishiwui Jonathan; Shebaniahshiwui Joseph;

¹⁵Harimshiwui Adna; Meraiothshiwui Helkai;

¹⁶Iddoshiwui Zechariah; Ginnethonshiwui Meshullam,

¹⁷Abijahshiwui Zichri; Miniaminshiwui, Moadiahwui Piltai;

¹⁸Bilgahshiwui Shammua; Shemaiahshiwui Jehonathan;

¹⁹Joiaribshiwui Mattenai; Jedaiahshiwui, Uzzi;

²⁰Sallaishiwui Kallai; Amokshiwui, Eber;

²¹Hilkiahshiwui Hashabiah; Jedaiahshiwui Nethanel.

²²Levipashiwuina, Eliashib, Joiada, Johanan, kala Jaddu-awui atamli avāva̱ ngarā shimkhurwui kharara amingbing hi kapihaida lei; kala Persiawui Dariusna munglakha eina tangda pāngmonbingwui chila kapihaidalei.

²³Leviwui naomayarabing, avāva̱ ngarā shimkhurwui wungva̱bing Eliashibwui nao Johananwui eina tangda Thotrinchānwui Lairikli kapihaisai.

²⁴Levinaobingwui akhokabing: Hashabiah, Sherebiah, kala Kadmielwui nao Jeshua athumwui chinao ngarāli ngasoda Varewui mi Davidna kaso kahai athishurda mai yangngasungda nganinglaga ningkashi eina seihā kasā atamli tanglenda hāngngaroka.

²⁵Mattaniah, Bakbukiah, Obadiah, Meshullam, Talmon, kala Akkub athumna ngavei khamayona sāda ngaveiwui zātshimli raikān sāmi.

²⁶Hibing hi Jozadakwui nao Jeshuana kapharā Joiakimwui thotli, kala Nehemiah rammungawui atamli, kala Ezr pāngmon kapimewui thotli kashokna.

²⁷Jerusalemwui phākho dharkatli kortar, tingteilā, kala lyre singda khamathān, sokachikat kala laa kasā eina ngasoda dharkat mayon khavai athumna Levinaobingli apam saikorawui eina hokhuida Jerusalemli khuirā ngasaka.

²⁸Kala laa kasābingwui naomayarabing Jerusalem kuikhamarei pamwui eina, kala Netophathwui kha̱ kha̱ eina rākazipa;

²⁹kala Beth-gilgalwui eina kala Gebawui eina Azmavethwui eina rai, kaja laa kasābingna Jerusalemwui kuikhamareili athum khalattawui vang kha̱ tāsai.

³⁰Pāngmonbing kala Levinaobingna athum khalatta tharkhuiya; kala athumna mibing kala ngavei kala phākho tharngasaka.

³¹Chiwui thili ina Judahwui wungnaobingli phākhotungli thānkai, kala kānglup khani sāda ningkashi mida kuizata. Kala akhashina yāshong Thothap Ngavei vāk;

³²kala athumwui thili Hoshaiah eina Judahwui wungnaobing ngakaipak,

³³kala Azariah, Ezra, Meshullam,

³⁴Judah, Benjamin, Shemaiah, kala Jeremiah,

³⁵kala pāngmonwui naobing kaikha talla̱ khongda ngasozata: Asaphwui nao Zaccurna pharā khamaron Micaiah, Mathaniah, Shemaiah, Jonathanwui nao Zechariah;

³⁶kala achinā ngarā, Shemaiah, Azarel, Milalai, Gilalai, Maai, Nethanel, Judah, kala Hanani athumna Varewui mi Davidwui laawui akap-akai zangda, kala kathema Ezrana athumwui mangāshong zata.

³⁷Ura̱ Ngaveili David keinungwui chonchak eina athumna angatar eina ngaveili ngareikai kala zingshoshong Davidwui shim atungli Tara̱ Ngavei eina tangda vai.

³⁸Ningkashi laa kasā khum khangatei akha china uishong vai, kala mi ngayarpak ina ngasoda, phaklāngwuitungli, Sharkha̱wui Raikānphung tungli vāda Khamashā phakoli vai;

³⁹kala chiwui eina Ephraimwui Ngaveitungli kala Kachama Ngavei eina Khai Ngavei kala Hananelwui Raikānphung, Shākhawui Raikānphungwui eina Yao Ngavei chili shurvai; kala athumna Raikānwui Ngaveili ungnganinga.

⁴⁰Chithāda ningkashi khamiwui kānglup khanini chi Varewui shimli nganinga, kala otshinme ngakaipakna ili ngasoi.

⁴¹Kala pāngmon Eliakim, Ma-aseiah, Miniamin, Micaiah, Eli-o-enai, Zechariah, kala Hananiah athumna talla̱ eina ngasozata;

⁴²kala Ma-aseiah, Shemaiah, Eleazar, Uzzi, Jehohanan, Malchijah, Elam kala Ezer athumla zanga. Kala Jezrahiahna kathāna sāda laa kasābing china laa sai.

⁴³Kala chithang athumna hakmahālak eina pha̱kaphayā sāda mathāna, kaja Varena athumli mathān ngasaka; sha̱naobingla, naoshinaobingla mathānshunhaowa. Kala Jerusalemwui khamathān chi apam katāva̱ eina tangda shāvai.

⁴⁴Chithang zātshim yangmi khavai, vākshot, matheikhare athei, tithe saikora kazipmi khavai, ainwui athishurda pāngmonbing eina Levibingwui sharuk ngayarmi khavai keinungli khalei lam athishurda mi phāsanga; kaja otram khangatha̱ pāngmonbing eina Levinaobingli Judahna ningyāng unglakhaowa.

⁴⁵Kala David eina anaomayara Solomonna kaso kahai athishurda laa kasābing eina ngavei khamayonabingna tharkakhui thāda athumna tharkhuida athum Varewui otram khangatha̱ sapapama.

⁴⁶Kaja Davidwui thotli kala achālakha Asaphwui thotli laa kasābingwui kathān akhoka leisai, kala masotlaa kala Vareli ningkashi eina ngasoda masochikata.

⁴⁷Chiwui vang Zerubbabel eina Nehemiahwui thotli Israel saikorana laa kasābing eina ngavei khamayonabingwui vang thangthangwui yar misai; kala Levinaobingwui yar athumna ngateida mi; kala Levinaobingna Aaronwui naomayarabing wui vang ngayarshokmi.