Read Tangkhul Naga NEHEMIAH 13 Bible Online

NEHEMIAH 13 - Tangkhul Naga bible

NEHEMIAH 13

¹ Chithang, mibingna shākhavai athumna Moseswui lairikwui eina pai; kala chili, Ammonnaobing nilala, Moabnaobing nilala, Varewui yarui kazipli mazangpailakmana da kapihaisai;

²kaja athumna Israelnaobingli samkaphang tharan kashakazāla tara̱la mamimana; kha athumli khonshi khavai Balaamli phāsanga, chithālala ithumwui Varena khonkashi chi sokhami ngachei ngasaka.

³Mibingna ain chi kashā tharan, athumna yur kateiwui ara̱-azā saikora Israelwui eina ngatei ngasakhaowa.

⁴Hi mashokranglakha, ithum Khorumshimwui zātshimli kapangsang kahai pāngmon Eliashibna Tobiahli khamashit wui vang,

⁵zātshim kahakva akha Tobiah wui vang sāmathāda ngarānhaisai; khare kachāng rākachigata zāt, nganamkaphā thao, thongthāng, māngumwui tithe, drakhāthei, thao, hikathāthā, kaso kahai athishurda Levi shili, laa kasābingli, khāmong khamayonabingli khami, kala pāngmonbingli rākachigat ot saikora shim chili haihaisai.

⁶Hithāmahunglakha I Jerusalemli mapamsāmana, kaja Babylonwui awunga Ar-ta-xerxeswui thumrāda kakhane kum I awungawuili vahairasai. Atam khaleilaga awungali khamayā pokhuilaga,

⁷Jerusalemli hanunga, kala Varewui shim kayanglungli Eliashibna Tobiahwui vang kā akha ngarānkhami makaphā chi ina ungtheihaowa.

⁸Kala I malungvātnahaida Tobiahwui thongthāng saikora ayarli horshokmiserhaowa.

⁹Kala ina kakaso athishurda athumna shim chi samathākhui; kala chili Varewui khorkhongli ngasoda muisakchigat eina nganamkaphā thao chi khuiungluishita.

¹⁰Kala Levinaobingwui yarla athumli mamimana kajila ina theihaowa, chiwui vang eina, chili ot sākasā Levinaobing eina laa kasābing athum ichichāwui luili yāmvāserhairasai.

¹¹Chieina ina otva̱bingli kaharda, “Khiwui vang Varewui shim chi horkahai khala?” da hānga. Kala ina athumli kazipkhuiserlaga kachichāwui pamli chipamsera.

¹² Chiwui thili zātshimli Judah saikorana māngumwui tithe, drakhāra̱ kala thaola khuirai.

¹³Chiwui thili Shelemiah pāngmon, kapime Zadok kala Leviwui eina Pedaiah athumli zātshim chiwui lansingmebing sākhavai kapangsanga, kala athumwui ngachonme sākhavai Mattaniahwui nao Zaccurna kapharā Hananli phāsanga; kaja athum shitsangkapaibingna, kala athumwui achinā ngarāli ngayarmi maronki kaji athumwui otna.

¹⁴O iwui Vare, hiwui pongli ili kaphaningungmilu, kala iwui Varewui shimwui vang kala ali otram khangatha̱wui vang ina khamathā ot sākahai chi mayangkheimihaialu.

¹⁵ Atam chitharan Judahwui mibingna sabbaththang drakhāra̱ kasur ina thei kala gadhāli māngum shaksālaga kachuchung phungunga; kala drakhāra̱, drakhāthei, khaorāthei kala ot khangatateila sabbaththang Jerusalemli phungsanga; kala athumna kashakazā, ot khayor chitharan ina athumli hāngmathina.

¹⁶Tyrewui mibing, keinung chili kapambingnala sabbaththang khaila, otyur khangatateila khuirāda Judahwui mibing kala Jerusalemli khaleibingli yorsanga,

¹⁷Chiwui vang, ina Judahwui wungnaobingli kaharda hānga, “Makaphā ot sāda nathumna sabbath makhao khangasak hi khiwui vangkhala?

¹⁸Navā ngarānala hithāda masāmala, kala ithumwuitungli, kala keinung hili ithumwui Varena makaphā saikora hi khuikharā maningmala? Laga sabbath sākhamakhao eina Israelwuitungli lungvat chungmeida rāngasakluili.”

¹⁹Sabbath marāranglakha Jerusalemwui ngaveili tangmangkaphok tharan khāmongbing shungserphalungra, kala sabbathwui thimāngli shophalungra da ina kasoi. Kala sabbaththang kharitphun makhuirāpaimara da ina ngaveili iwui mi kaikha haihaowa.

²⁰Chiwui thili leihkhalonbing, kala ot khayorbing Jerusalemwui ayarli akha khanishida rāpisanga.

²¹Kha athumli hāngmathinda ina hānga, “Khisāda nathumna ngavei mangāli pikhala? Hithaluishitakha nathumwuitungli ipang parra.” Chiwui eina thuilaga sabbaththang athum marāluilakthuwa.

²²Kala Levinaobingli, athum khalatta tharkhuilaga ngavei mayon khavai, kala sabbaththang kathar eina mayon khavai ina kasoi. Hila ili kaphaningungmilu, O iwui Varivara, kala nawui makhangachei leikashi china ili kahuimilu.

²³ Chiwui atamli Jehudinaobingna Ashdodwui, Ammonwui, kala Moabwui sha̱naoli khangakumla ina thei;

²⁴kala anaomayara ngayarpakna Ashdod tui matui, Judah tui mamatuitheila yur khagateiwui tui matuiya.

²⁵Chiwui vang ina khararda khonkashila khonshi, kashaola shaoda samla maokaphotmi; kala Varewui ming singngasakta, “Nathumna nathumwui naongalāva̱ ngarā athumwui naomayara ngarāli mangakum ngasakpaimara; athumwui naongalāva̱ ngarā nathum naomayara ngarāwui vang nilala, nathum khalatta wui vang nilala makhuipaimara.”

²⁶ “Israelwui awunga Solomonla hikathā sha̱naowui vang morei kasā maningmala? Yur saikorawui alungli awunga Solomon kathā maleimana, kala ali Varena leishi, kala Israel saikorawuitungli Varena ali awunga sāngasaka; chithālala, yur kateiwui sha̱naona alila morei sāngasaka.

²⁷Chieina ithumla nathumli nganāda yur kateiwui preinao kakhui eina makaphā chungmeida sāda ithumwui Vareli ithum mashitsangkapaiya ngasarala?”

²⁸ Kala Eliashibwui nao Jehoiada pāngmon khareina kapharā nao akhana Horonpa Sanballatwui arihā sāsai, chiwui vang eina ali ina kashamhaowa.

²⁹Athumli katheimilu, O iwui Vare, khikhalajila athumna pāngmonpam kala pāngmonbing eina Levinaobingwui tuingashitla sākhamangmihaira.

³⁰Chithāda sāda yur kateiwui otsak kachiva̱wui eina ina tharkhuida pāngmonbing eina Levinaobingli kachichāwui otpam chi sakāmiluishita;

³¹kala retkahai atamli matheikhare athei pha̱khavaiwui vang thing ina ngarānmi. O iwui Vare, ili phaningungmi chinglu.