Read Tangkhul Naga NEHEMIAH 4 Bible Online

NEHEMIAH 4 - Tangkhul Naga bible

NEHEMIAH 4

¹Ithumna phākho chi sakāda lei kaji Sanballatna kashā tharan, a malung thuilakhaowa, kala ana Jehudinaobingli zeikakharui tui kachungkha hānga.

²Kala achinā ngarāwui mangāli kala Samaria raimibingwui mangāli hithāda hānga, “Khangazana Jehudibing hi khisālikhala? Athumna otbing hi sākhuiluirala? Athumna pha̱phayārala? Athumna thangkhawui alungli sākupshaprala? Mei chuikahai kala khorkasāk kahai ngalungbing hieina ngamuikhuilaga sākāluishitrala?”

³Ammonwui rao Tobiahla awui ngalemli nganingsāda hānga, “Mha, athumna sakāda khalei hi ramfana kānaisi kaje ja̱shapra!”

⁴Nganāmilu, O ithumwui Varivara, kaja ithumli ningkachaihaira; athumwui zeikakharui chi athum khalattawuitungli tāranu, kala athumli tukvā khavaipamli ngaponthui khavai mihaolu.

⁵Athumwui khayon mafakhammialu, kala athumwui morei namikyanwui eina mapheomialu, kaja shim kasābingwui mangāli athumna nali malungvātngasakhaira.

⁶Chithāda ithumna phākho chi sākai; kala kuimareida ngavei chi ngahunshing kāhaowa. Kaja mibingna ningli ot sālakra kaji hi leihaowa.

⁷Kha Sanballat, Tobiah, Arabwui mibing, Ammonnaobing, kala Ashdodnaobingna Jerusalemwui phākho kachipho mangā vāda apam saikora ngasunki jihaira kaji kashā tharan malungvātlakhaowa;

⁸chieina athumna Jerusalemli rāngararlaga pa̱ngapā khavai ngathumda ngakuka.

⁹Chieina ithumwui Vareli ithumna seihā sai, kala athumwui eina kanmi khavai ngashun ngayā mateila mayonkhami raikān phāsanga.

¹⁰Kha Judahna hānga, “Ot kasābingwui pangshap ngazanhaira, kala thothap kachungkha leili; ithumna phākho hi masārarthura.”

¹¹Kala ithumwui yangkashibingna hānga, “Athumwui alungli ithumna vāda shaothatlaga ot mangasām ngasakranglakha athum matheimara.”

¹²Athumwui ngalemli kapam Jehudinaobingna ithumli tharā shida, “Khalalei apam kachiva̱wui eina athumna ithumli rāngararra” da hānga.

¹³Chiwui vang eina, shang-shangwui athishurda, raighai, kazei, malā chisinlaga, phākhowui khanuk khanema khamasai pambingli ina raikān phāsanga.

¹⁴Kala ina yanglaga ngakarthuida, wungnaobing, otva̱bing, kala yarui saikorali hānga, “Athumli mangacheealu. Phaningunglu, reikhamatai, khangachee-khangachā PROHO ana nachinā ngarā, nanaomayara ngarā, nanao ngalāva̱ ngarā, napreiva̱̱ ngarā, kala nathumwui shimkhur saikorawui vang ngararmira.”

¹⁵Varena athumwui khangarān maungshung ngasakthura kala ithumna theihaira da yangkashebingna theikahai tharan, ithum saikora phākho chili latunga, kala ichichāwui ot chi sai.

¹⁶Chithang eina thuida iwui mi ngayarpakna ot sai, ngayarpakna kazei, chāngvei, malā singa; kala Judahwui mibing ot sāda khalei saikorawui shim khanuk kachida kathānabingna raikān nganingripa,

¹⁷Thing, ngalung khangava̱bingna pāngreikha eina ot sai, pāngreikha eina khutlai sing jiya.

¹⁸Kala shim kasābingna raighai thāngriplaga ot sai. Talla̱ khongme china iwui ngalemli nganinga.

¹⁹Kala ina wungnaobing, otva̱bing kala mi kateibingli hānga, “Ot hi haklaka, apamla mashālaka, kala ithumli phākhona khayinhaida ithum akha eina akha katāva̱li matak ngarokhaira.

²⁰Talla̱khon kashāpam chili rāda ithum khaleipam chili rangalengserlu. Ithumli Varena ngararmira.”

²¹Chithāda ithumna ot sai, kala ngayarpakna, kazing kathang eina thuida sirā mashokranglakha eina tangda kazei singpama.

²²Atam chilila ina mibingli hānga, “Mi kachiva̱na kachichāwui raobingli ngasoda Jerusalemwui alungli pilu, chithāda ngayā raikān sāra, ngashun ot sāra.”

²³Chithāda sāda ila, ichinā ngarā nilala, iwui raobing nilala, ili shurda raikān kapambing nilala, khipānakha kashankachon makhuishokla kachichāwui khutlai singriplaga pama.