Read Tangkhul Naga NEHEMIAH 6 Bible Online

NEHEMIAH 6 - Tangkhul Naga bible

NEHEMIAH 6

¹Phākho chi ina sakāluihaira kala kakai-khaut maleithura (atam chichangle ngaveibingwui khāmong masāsangrangsai) da Sanballat, Tobiah, Arabpa Geshem kala ithumwui yangkashebingli vākahāng tharan,

²Sanballat eina Geshemna ili pao chihorāda hānga, “Ono tampākwui ruinganai kha̱ akhali ithum samphangsa.” Kha athumna ili makaphā sākida khangarāna.

³Kala ina paome chihovāda hānga, “I ot saklak kahai sāda lei, I marārarmara. Ina nathumli tāsamphangra da khisāda ot kasā ngasāmrakhala?”

⁴Hithāda athumna ili mati shida mi chihorai kala inala kharewui tākam eina ngahānkai.

⁵Kaphangāli Sanballatna kharewui thāda chithikhao manapla awui rao akha chihoralui.

⁶Chili hithāda kapihaisai, “Yurbingna hithāda hānga, kala Geshemnala hānga, na kala Jehudinaobingna rai sākhavai ngarānda lei; chiwui vang phākho chi sakāda khaleina; kala nana athumwui awunga sangaida lei da pao china hānga.

⁷Kala ‘Judahli awunga akha lei’ da nawui pongli hangmarānmi khavai marānbingla Jerusalemli phāsanghaira da hānga. Tui hiwui athishurda ara ithumna awungali hāngra. Chiwui vang eina ralu, ithum ngazekhuisa.”

⁸Chieina ina mi chihovāda ali hānga, “Nana kahāng chithāda masālakmana; kaja tuibing chi nakhalattawui kaphaning eina sākakhuina.”

⁹Kaja athumna ithumli ngachee ngasak khavai, “Ot masālengluila, thāhaihenura” da kaphaningna. Kha O Vare, nana ipāng pangngasakmilu.

¹⁰Mehetabelwui nao Delaiahna kapharā awui shimwui eina ayar makashoka, Shemaiahwui shimli ina khavā tharan, ana hānga, “Varewui shimli ithum samphangsa, kala Khorumshimwui khāmong tāknartitlaga pamhaosa; kaja athumna sāthat khavai rārāda lei, ashama ngayā athumna nali shaothat khavai rāra.”

¹¹Kha ina hānga, “I kathā mina yāmrala? Kala I kathā mina khorum khavai shimli yāmngayinrala? I mazangmara.”

¹²Varena ali kachiho maningmana kaji ina thei, kha ana iwuitungli khamarān chi Tobiah eina Sanballatna ali phākasangna da theikhui.

¹³Ili ngachee ngasaklaga morei sākhavai kala iwui ming zakshi ngasakta zeingasak khavai ali phākasangna.

¹⁴O iwui Vare, Tobiah eina Sanballat kala marānva̱ No-adiah, kala ili ngachee khavai kasā marān khangatateibinglila athumna sākahai otsakbing hiwui athishurda phaningungmilu.

¹⁵Chieina phākho chi zimiksho hangphangāda kakhanethang, Phei kachāngwui zimiksho maga̱da kaphangāthang kuphaowa.

¹⁶Kala ithumwui yangkashe saikorana kashā tharan, ithumli kuimareida khalei yur saikora ngacheeyikhaowa, kaja ithum Varewui khangachon eina ot hi kupkapaina da athumna theihaoda athum khalatta ningkhanganung maleithuwa.

¹⁷Chili lāngda, atam chitharan Judahwui wungnaobingna Tobiahli chithi kachungkha chiphuna, kala Tobiahwui chithila athumna samphanga.

¹⁸Kaja Judahwui mi kachungkhana ali khangashit sahaisai; khikhalajila Arahwui nao Shecaniahwui arihā chi ana; kala anaomayara Jehohananna Berechiahwui naomayara Meshullamwui naongalāva̱li ngakuma.

¹⁹Kala athumna iwui mangalila awui kapha kasā pongli matuichithei, kala iwui tuila ali ahāngsera. Chieina ngachee khavai Tobiahna ili chithi kachungkha chiphunrai.